Acts 16

Mien Bible (Thai Script) © Thailand Bible Society, 2007

1เปาโล แอ๋ง มี่ง เดบี ฒี่ง เหธา ลิสะตา มู้ง. ลิสะตา มู้ง ม่าย เต้า ไซ-ก๋อ, บั๋ว เห่ว ทิโมไท. นิ่น เญย มา เซ ยิวไท เมี่ยน หย่า เสียน เยซู เญย. มป่า นิ่น เญย เตีย เป๋น จั๋น-กีก.

2ลิสะตา เหธา อีโคนียูม เญย ก๋อ-โย์ว หย่า เธง ทิโมไท.

3เปาโล อ๋อย ต้อ ทิโมไท กัน นิ่น มี่ง ฯฒฯ เถง นิ่น เจี๋ย ก๊าด เญย เล์ย, เหว่ย หฒุ วั้ว นอม เต่ย-ปูง เญย หฒวัง ยิวไท เมี่ยน ฮิ้ว ตุ๊ ทิโมไท เญย เตีย โหฒว จั๋น-กีก.

4เปาโล บัว เฒว่ย มู้ง โย่ว เจี๊ยน มี่ง. มี่ง เถา หาย หย่า เฒาะ กง-โฒ่ เหธา เมี่ยน โก๋ เยียม เยลูซาเลม ฒี่ง ตี่ง ต้าย เญย เล์ย จิว ปุน เมี่ยน เอย เจี๊ยน โหฒว.

5เหว่ย น้าย หฒวัง จิว-ปาง ฯฒฯ เก้า เสียน ตุ๊ เฮ้น. ฮนอยๆ ม่าย เมี่ยน ทิม เปียะ ธั้ม เจี๊ยน ฝาว.

6สีง ลี่ง ไม้ ปุน เปาโล เยียม เอเซีย แซ้ง ฒุ่น โต์. นิ่น บัว ฯฒฯ เจี๋ย ฟาลีเจีย เหธา กาลาเทีย เต่ย-ปูง.

7เถา มิเซีย เต่ย-ปูง เญย กั๊บ-จ๋าย กะเฮลน นิ่น บัว อ๋อย เปียะ บิทีเนีย, มป่า เยซู เญย สีง ลี่ง ไม้ ปุน นิ่น บัว เปียะ.

8นิ่น บัว ฯฒฯ เจี๋ย มิเซีย เต่ย-ปูง มี่ง เถา โตอัด.

9มี่ง เถา วั้ว ม์วน, เปาโล ปวัด หิ่น ย่าง เญย สี่. นิ่น ปวัด เต้า มาซีโดเนีย เมี่ยน โซ้ว เจี๊ยน ชะ โท้, “โท้ เจี๋ย เถา น้าย มาซีโดเนีย เต่ย-ปูง เถง เยีย บัว ม่าะ!”

10เปาโล ปวัด ลิ์ว หิ่น ย่าง เญย สี่, เยีย บัว ฯฒฯ เลี่ยม เฒ่ย หลิ่ว เล์ย มี่ง มาซีโดเนีย, เหว่ย หฒุ เยีย บัว ฝุน ตี่ง ทิน-ฮู่ง หฒะเก้ง เห่ว เยีย บัว มี่ง ฒุ่น คู้ เฝียน ปุน วั้ว เต๋ย เมี่ยน หมวัง.

11เยีย บัว ฯฒฯ เยียม โตอัด เปียะ ฑั้ง, แปง หฒะ มี่ง เถา สาโมทัด ค้อย-โฑว. ตะเหญ่ย ฮนอย มี่ง เถา เนอาบุลี มู้ง.

12เยียม หน่าย เยีย บัว ธ้วด ฑั้ง ยั่ง เจ๊า มี่ง ฟีลิบพอย ฒี่ง. ฟีลิบพอย เซ มาซีโดเนีย เต่ย-ปูง เญย เหยียด นอม ต้ม ฒี่ง, เซ โลมา กั๊วะ เหลียบ ต้าย เญย ฒี่ง. เยีย บัว ฯฒฯ เยียม เหฒีย ฮนอย วั้ว.

13เถา ตี้ง กง ฮนอย เยีย บัว ธ้วด กะเหญี่ย หฒิ ฒี่ง มี่ง วั้ว ด้าย เฮลน, ฮนั้ม ต้าย ม่าย นอม ต๋อง กั๊บ ฒุ้น เต๋า เก๋า. เยีย บัว ล์อ ปวัด ฯฒฯ เฒว์ย เหฌี่ย เหธา กั๊บ ฒุ้น ต้าย วั้ว เต๋ย มเซียะ ตอน ก๊อง หว่า.

14ม่าย เต้า ทิยาทิลา ฒี่ง เญย มเซียะ ตอน, บั๋ว เห่ว ลิเดีย. นิ่น เญย กง เซ หม่าย เซ้ด หลัวะ เญย เดีย-ฒุ. ลิเดีย เซ หฒั่ง ทิน-ฮู่ง เญย เมี่ยน. เฒี้ยว หย่า ปุน นิ่น เญย เฮญี้ยว ฆอย, ฮนั้ม ตุ๊ ทง เปาโล ก๊อง เญย หว่า.

15นิ่น เหธา นิ่น เญย เปย๊า ฒง ฮมวั้ง ต่อย เหยียด ฒู้ง ฯฒฯ เจี๋ย ววม เญย เล์ย. ฆะฮ้า นิ่น เห่ว เยีย บัว มี่ง ฮิด นิ่น เญย เปย๊า. นิ่น ก๊อง, “สี ก๊อง เม่ย บัว ฝุน เยีย หฒะเก้ง เสียน เฒี้ยว นอ, โท้ เม่ย บัว ต้าย ฮิด เยีย เญย เปย๊า โอ่.” นิ่น ชะ เลี่ยว เยีย บัว, เยีย บัว ฮนั้ม ไม้ เจี๋ย เอ๋ย, ฯฒฯ มี่ง ฮิด นิ่น เญย เปย๊า.

16ม่าย ฮนอย เยีย บัว มี่ง เมี่ยน กั๊บ ฒุ้น เต๋า เก๋า เญย ต๋อง. มี่ง เกา, ม่าย เต้า โน่ว เป์ย ต้าย ปวั้ง หฒุ เยีย บัว. น้าย เต้า โน่ว เป์ย ม่าย เมี้ยน เยียม นิ่น เญย ซิน, ปุน นิ่น ไฮ่ ก๊อง ฒิ่น โฮ์ เญย สี่ ฯฒฯ เถง เมี่ยน หมั่ง แหม่ง, ปุน นิ่น เญย เฒี้ยว ตุ๊ ญ่าน ธั้ม.

17น้าย เต้า โน่ว เป์ย กัน เจี๊ยน เปาโล เหธา เยีย บัว มี่ง เห่ว เจี๊ยน ก๊อง, “น้าย เต๋ย เมี่ยน เซ เยียม ฮลัง เจี๋ย เญย ทิน-ฮู่ง เญย โปว. นิ่น บัว ฒุ่น ตุ๊ เหฌียว เญย เจ๊า ปุน เม่ย บัว หมวัง.”

18นิ่น ฮนั้ง น้าย นอ โหฒว ธั้ม-ฮนอย อ๊ะ. โหฒว เกา, เปาโล ไฮ์ เฮญี้ยว ไม้ หลง เหยียด เต๋ย ฯฒฯ ฮวิน หฑวน ก๊อง บั๋ว วั้ว เต้า เมี้ยน, “เยีย เต๊ง เยซู กีตู่ เญย บั๋ว หัด เม่ย เยียม น้าย เต้า เมี่ยน เญย ซิน ธ้วด มี่ง ม่าะ!” เมี้ยน ฯฒฯ เลี่ยม เฒ่ย ธ้วด หมี่ อ๊ะ.

19น้าย เต้า โน่ว เป์ย เญย เฒี้ยว เฒียะ ตุ๊ นิ่น บัว ตุ๊ ญ่าน เญย เจ๊า ไม้ ลั่ม ฮนั้ม อ๊ะ, นิ่น บัว ฯฒฯ เญา เจี๊ยน เปาโล เหธา ซีลา, ทอ มี่ง ต้ม หฒวัง หฒ่าม, โหฒว โฮล วั้ว เต๋ย เญย หฑะเฮมียน.

20เยียม โลมา เจียน เญย หฑะเฮมียน นิ่น บัว โก๋ ก๊อง, “น้าย เต๋ย เมี่ยน เซ ยิวไท เมี่ยน. นิ่น บัว โหฒว ปุน เยีย บัว เญย ฒี่ง หลุ่น เหฑ่ง.

21นิ่น บัว หฌาว เญย เล์ย เซ ต่อง เยีย บัว โลมา เมี่ยน เญย เล์ย. เยีย บัว ไม้ ไฮ่ หล่ง, ไม้ ไฮ่ กัน นิ่น บัว เญย เล์ย.”

22หฒวัง เมี่ยน เถง เจี๊ยน โหฒว โตะ ปุน เปาโล เหธา ซีลา. วั้ว เต๋ย เจียน ฯฒฯ เห่ว แปง เธี้ย เปาโล บัว เญย ลุย-โหว กวั่ง, หล่ง ปย๊า เบ๊าะ นิ่น บัว.

23แปง ฯฒฯ เบ๊าะ ตุ๊ นิ่น บัว เซียง ไห่, ฆะฮ้า แอ๋ง ต้อ นิ่น บัว มี่ง หววน เจี๊ยน โล่, หย่า บั๋ว กุ๊น โล่ เญย เจียน หลงๆ ฒั้ว เจี๊ยน นิ่น บัว.

24กุ๊น โล่ เจียน ตุ๊ ต้ม เจียน เญย หว่า ฯฒฯ เฒาะ เปาโล บัว หววน เจี๊ยน กะญั์ว วั้ว ฉง โล่, แอ๋ง เฒาะ เดี๋ยง กับ เจี๊ยน นิ่น บัว เญย เหฒา.

25ด๊าม ม์วน เญย เฒี่ยง โห่, เปาโล เหธา ซีลา เต๋า เก๋า หย่า ป๋าว ฑูง เธง ทิน-ฮู่ง. เยียม โล่ เญย ฒุ์ย-เมี่ยน เหยียด ฒู้ง หย่า หมวัง นิ่น บัว.

26เลี่ยม เฒ่ย เดา ต์ง ตุ๊ เสย ไห่, ดั่น เถา โล่ เญย กอน-โด๊ะ. เต้าๆ โล่ แก้ง ฆอย เหฑ่ง. หฒวัง ฒุ์ย-เมี่ยน เญย หลิ่ม หย่า ดุ๊ด เหฑ่ง หมี่ อ๊ะ.

27กุ๊น โล่ เจียน เญีย ต้าย ปวัด โล่ แก้ง ฆอย เหฑ่ง, หล่าย ตุ๊ ฒุ์ย-เมี่ยน เปย๋า เหฑ่ง อ๊ะ มเปย. นิ่น ฯฒฯ แปง ธ้วด นิ่น เญย หฑุ ด๊าว อ๋อย ไต๋ นิ่น กั้น อ๊ะ.

28มป่า เปาโล ฮววน นอม ค้าด, “เฮว้ย! ไม้ ตู๋ง ห่อย เม่ย กั้น. เยีย บัว เหยียด ฒู้ง เยียม น้าย เญย.”

29กุ๊น โล่ เจียน เห่ว เมี่ยน ล์อ ตัง ต้าย หฒิว เจี๊ยน ถิว เปียะ เปาโล บัว วั้ว, บ๊าบ เหฌี่ย เปาโล เหธา ซีลา เญย หฑะเฮมียน, ซิน หฒิน ญั่นๆ เญย.

30นิ่น ต้อ เปาโล บัว ธ้วด ต้าย หน่าย ก๋า นิ่น บัว, “ต้ม ก๋อ อ้า! เยีย อ๋อย หฒุ ฮนั้ง หาย นอ โหฒว หธีง ไฮ่ ตุ๊ เหฌียว?”

31เปาโล บัว เตา, “อ๋อย หฒุ เสียน เขา เฒี้ยว เยซู, เม่ย เหธา เม่ย เญย เหยียด เปย๊า เมี่ยน ฯฒฯ ตุ๊ เหฌียว.”

32เปาโล บัว ฯฒฯ ก๊อง เฒี้ยว เญย โต์ ปุน นิ่น เหธา นิ่น เญย เหยียด เปย๊า เมี่ยน หมวัง.

33ต้ง หน่าย ม์วน, วั้ว นอม เฒี่ยง โห่, กุ๊น โล่ เจียน ต้อ เปาโล บัว มี่ง หฑาว เหฑ่ง หฒุ เบ๊าะ มุน เญย ต๋อง. หฑาว ลิ์ว, กุ๊น โล่ เจียน เหธา เหยียด เปย๊า เมี่ยน เลี่ยม เฒ่ย เจี๋ย ววม เญย เล์ย อ๊ะ.

34เจี๋ย ลิ์ว เล์ย, กุ๊น โล่ เจียน แอ๋ง ต้อ เปาโล เหธา ซีลา เปียะ นิ่น เญย เปย๊า เบ่น หฮนาง ปุน นิ่น บัว หญั่น. กุ๊น โล่ เจียน เหธา นิ่น เญย ฮมวั้ง ต่อย หฒะเก้ง เฌียน-โย่ว ไห่, เหว่ย หฒุ นิ่น บัว อี้ หฒั่น เสียน ทิน-ฮู่ง หมี่ อ๊ะ.

35ลู่ง ฌัง, โลมา ต้ม เจียน พ้าย ซิน-เฮลน แปง มี่ง กุ๊น โล่ เจียน วั้ว บั๋ว นิ่น, “ปู๋ง วั้ว เต๋ย อี ล่าน เมี่ยน อ๊ะ.”

36กุ๊น โล่ เจียน ฯฒฯ บั๋ว เปาโล, “ต้ม เจียน เห่ว เยีย ปู๋ง เม่ย เหธา ซีลา ธ้วด โล่. เม่ย บัว อี้ หฒั่น กุ๊น แป้ง ออน เญย มี่ง อ๊ะ.”

37มป่า เปาโล ก๊อง บั๋ว วั้ว เต๋ย ซิน-เฮลน แปง, “เยีย บัว หย่า โลมา เญย แปะ ฝีง. นิ่น บัว ฒู้ง ไม้ ตี่ง เยีย บัว เญย ฒุ์ย ด่าง, หละไกว้ ตอง หฒวัง เบ๊าะ เยีย บัว. หธ่อ แอ๋ง ต้อ เยีย บัว มี่ง หววน เจี๊ยน โล่. อี้ หฒั่น นิ่น บัว อ๋อย ปี๋ง เจี๊ยน ปู๋ง เยีย บัว. ฮนั้ง หน่าย เซ ไม้ หอบ. วั้ว เต๋ย ต้ม เจียน กั้น อ๋อย หฒุ ต้าย ปู๋ง เยีย บัว ธ้วด.”

38แปง ฯฒฯ เฒียง น้าย เต๋ย หว่า มี่ง ก๊อง ปุน ต้ม เจียน หมวัง. ต้ม เจียน ฮิ้ว ตุ๊ เปาโล เหธา ซีลา เซ โลมา เมี่ยน, นิ่น บัว ฯฒฯ กั้ม เหฑีย ไห่.

39ต้ม เจียน ฯฒฯ มี่ง โท้ ฒุ์ย เปาโล บัว, แอ๋ง ฝูง นิ่น บัว ธ้วด โล่ หย่า โท้ นิ่น บัว ธ้วด ฒี่ง อ๊ะ.

40เปาโล เหธา ซีลา ธ้วด โล่ ต้าย มี่ง ลิเดีย เญย เปย๊า. เยียม วั้ว นิ่น บัว ปวั้ง ก๋อ-โย์ว, ก๊อง หว่า นุ์น ลิ์ว นิ่น บัว เญย เฮญี้ยว, ฯฒฯ มี่ง หมี่ อ๊ะ.

← Chapter 15 Jump to: Chapter 17 →