Acts 5

Mien Bible (Thai Script) © Thailand Bible Society, 2007

1แอ๋ง ม่าย เต้า เมี่ยน, บั๋ว เห่ว อานาเนีย, เหธา นิ่น เญย เอ๊า, สับฟีลา, หม่าย ฑง นิ่น บัว เญย เดา.

2อานาเนีย เฑ้บ ธ้วด เต๋ย หม่าย เดา เญย ญ่าน เลี่ยว นิ่น กั้น หล่ง. นิ่น เญย เอ๊า หย่า ฮิ้ว เญย. นิ่น แอ๋ง ต้อ เต๋ย มี่ง จิว ปุน กง-โฒ่ บัว.

3ปีเต ก๊อง, “อานาเนีย อ้า! เม่ย โหฒว หาย หญู่ง ปุน ซาตาน กุ๊น เม่ย, ปุน เม่ย ม่าย เฮญี้ยว ก๊อง-แปะ ดั๊ว สีง ลี่ง ฯฒฯ เฑ้บ ธ้วด เต๋ย หม่าย เดา เญย ญ่าน?

4ไม้ แก้ง หม่าย เซ เม่ย เญย เดา ไม้ เฒ์ย? น้าย เต๋ย เดา หม่าย ลิ์ว เซ เม่ย กั้น เญย ญ่าน ไม้ เฒ์ย? หาย หญู่ง ปุน เม่ย เญย เฮญี้ยว ฮนั้ม ธ้วด ฮนั้ง น้าย นอ โหฒว? เม่ย ไม้ เฒ์ย ก๊อง-แปะ ดั๊ว เมี่ยน, เม่ย ก๊อง-แปะ ดั๊ว ทิน-ฮู่ง.”

5อานาเนีย ไฮ์ น้าย เต๋ย หว่า, นิ่น เลี่ยม เฒ่ย คีง เหฌี่ย เดา ไต่ หมี่ อ๊ะ. หาย เต้า ไฮ์ น้าย เต๋ย สี่ หฒะเก้ง! กั้ม เหฑีย ไห่.

6เยียม วั้ว เญย เมี่ยน หลุน เมี่ยน ต์ง ซิน เฒาะ เดีย-ตั้ม, ตั้ม เจี๊ยน อานาเนีย เญย เซย, แกง มี่ง ปย๊บ.

7แอ๋ง แฆะ อ๊า ลั่ม เต๋ย ปัว นอม เฒี่ยง โห่, นิ่น เญย เอ๊า หย่า เปียะ ต้าย. นิ่น เลี่ยม ไม้ ฮิ้ว ตุ๊ น้าย เต๋ย สี่ ธ้วด.

8ปีเต หน่าย นิ่น, “บั๋ว เยีย ม่าะ! เม่ย บัว หม่าย เดา เญย ญ่าน ตุ๊ บัวะ น้าย ฮนั้ง?” นิ่น เตา, “เฒ์ย เญย, ตุ๊ บัวะ น้าย ฮนั้ง.”

9ปีเต ฯฒฯ ก๊อง บั๋ว นิ่น, “เม่ย บัว อี ฮมวั้ง เหว่ย หาย ติ่ว ต้ง เฮญี้ยว เสย เฒี้ยว เญย สีง ลี่ง? หมั่ง ก๋า! ปย๊บ เม่ย เญย โหฆ วั้ว เต๋ย เมี่ยน หฑวน เถา แก้ง ด่าง อ๊ะโล่ะ! นิ่น บัว หย่า อ๋อย หฒุ แกง เม่ย ธ้วด อ๊ะ.”

10วั้ว เต้า เอ๊า เลี่ยม เฒ่ย คีง เหฌี่ย ปีเต เญย เหฒา-เฮลน ไต่ หมี่ อ๊ะ. วั้ว เต๋ย เมี่ยน หลุน เมี่ยน เปียะ ต้าย ปวัด นิ่น ไต่ หมี่ อ๊ะ, ฯฒฯ แกง นิ่น ธ้วด มี่ง ปย๊บ นิ่น เญย โหฆ เญย กะเฮลน.

11หฒวัง จิว-ปาง เหธา ไฮ์ น้าย เต๋ย เจ๊า-โหล่ว เญย เมี่ยน หฒะเก้ง! กั้ม เหฑีย ไห่ อ๊ะ.

12กง-โฒ่ บัว เยียม หฒวัง เมี่ยน บุด๋ง โหฒว จั๋ง-โห่ เหธา บัวะ ฮ่อง เญย สี่ ธั้ม เญย. เสียน เยซู เญย หฒวัง เมี่ยน หาย หฒั่น หย่า กั๊บ ฒุ้น เยียม ซาโลมอน เญย ปี๋ง ล่าง ต๋อง.

13กะเหญี่ย เญย เมี่ยน ไม้ ก๊าม เหธา นิ่น บัว กั๊บ ฒุ้น มป่า หฒวัง เมี่ยน ท่าย นิ่น บัว.

14เสียน เฒี้ยว เญย เมี่ยน มจั่ง มเซียะ กุ๊น โหฒว กุ๊น ทิม เปียะ ธั้ม.

15เหว่ย กง-โฒ่ บัว โหฒว เญย จั๋ง-โห่, เมี่ยน ต้อ ปุ๊ด-แป่ง เมี่ยน ธ้วด เจ๊า-เฮลน ปุน นิ่น บัว เปว๋ย จิ่ว เปว๋ย หฒิ, เยียม วั้ว ฒั้ว ปีเต เจี๋ย เจ๊า วั้ว หฒั่น, ไฮ่ ตุ๊ นิ่น เญย ต้ง ลิ่น ลั่ม หฒุ นิ่น บัว.

16เยียม นิด เยลูซาเลม วั้ว เต๋ย มู้ง เญย เมี่ยน, ต้อ ปุ๊ด-แป่ง เมี่ยน เหธา ม่าย เฮยี่ย ไกว๊ เมี้ยน ขวน ม่อ นิ่น บัว วั้ว เต๋ย. เหยียด ฒู้ง หย่า หฒ่อ หลง เหฑ่ง.

17โหฒว เกา, ต้ม ไซ เมี่ยน เหธา นิ่น เญย เหยียด ฒู้ง ต่อย, ต้ง สะดูสี วั้ว เจ๊า เมี่ยน, หั่น ไห่ กง-โฒ่ บัว.

18นิ่น บัว ฯฒฯ เฒาะ กง-โฒ่ บัว ต้อ มี่ง หววน เจี๊ยน ต้ม หฒวัง โล่.

19มป่า หน่าย ม์วน ม่าย เต้า เฒี้ยว เญย ฟิน-เมี่ยน ต้าย คอย โล่ แก้ง ต้อ นิ่น บัว ธ้วด หมี่ อ๊ะ,

20บั๋ว นิ่น บัว, “เม่ย บัว มี่ง วั้ว หฒั่ง ทิน-ฮู่ง เญย เปย๊า เฒาะ น้าย เซียง-แหม่ง เญย เจ๊า-โหล่ว เหยียด ฒู้ง ก๊อง ปุน หฒวัง เมี่ยน หมวัง โอ่.”

21ลู่ง เบี์ยวๆ ฌัง ฮนั้ง, นิ่น บัว ฯฒฯ เอย เจี๊ยน น้าย เต๋ย หว่า เปียะ หฒั่ง ทิน-ฮู่ง เญย เปย๊า หฌาว หฒวัง เมี่ยน อ๊ะ. ต้ม ไซ เมี่ยน แอ๋ง เหธา นิ่น เยียม วั้ว เญย เมี่ยน ต่อย ต้าย ฒุ้น. นิ่น บัว เห่ว กุ๊น สี่ หวุ่ย เญย เมี่ยน, เซ อิสะลาเอน เญย หฒวัง เมี่ยน โก๋, ต้าย ฑ่อย หย่า พ้าย แปง มี่ง วั้ว โล่ ต้อ กง-โฒ่ บัว ต้าย.

22มป่า มี่ง เถา วั้ว, แปง ล์อ ไม้ ปวัด กง-โฒ่ บัว. นิ่น บัว ฯฒฯ หฑวน กุ๊น สี่ เมี่ยน วั้ว ก๊อง,

23“เยีย บัว เถา วั้ว โล่ หย่า ปวัด ฟ้อ เจี๊ยน หลง เญย. แปง หย่า ฒั้ว เจี๊ยน แก้ง ด่าง เญย, มป่า เยีย บัว คอย แก้ง เปียะ มี่ง, ไม้ ปวัด เหยียด เต้า หมี่ อ๊ะ.”

24โก๋ว หฒั่ง ทิน-ฮู่ง เญย เปย๊า เญย แปง-เปย๊ย เหธา ไซ เมี่ยน เปย๊ย บัว ไฮ์ น้าย เต๋ย หว่า, นิ่น บัว ฮนั้ม ไม้ ทง, ไม้ ฮิ้ว ตุ๊ น้าย เต๋ย สี่ ฆะฮ้า อ๋อย ฮนั้ง หาย นอ.

25วั้ว หฒั่น ม่าย ล่าน เมี่ยน ต้าย ก๊อง, “หมวัง ก๋า! เม่ย บัว เฒาะ หววน เจี๊ยน โล่ วั้ว เต๋ย เมี่ยน, อี้ หฒั่น เยียม หฒั่ง ทิน-ฮู่ง เญย เปย๊า วั้ว หฌาว เมี่ยน แอ๋.”

26แปง-เปย๊ย เหธา เจี๊ยน นิ่น เญย แปง ฯฒฯ มี่ง ต้อ กง-โฒ่ บัว ต้าย, มป่า ไม้ โหฒว เธี้ยว ปุน กง-โฒ่ บัว. แปง กั้ม เหฑีย หฒวัง เมี่ยน ไฮ่ เฒาะ หละเปย๊ย ฒง นิ่น บัว มเปย.

27แปง ต้อ กง-โฒ่ ต้าย โซ้ว เจี๊ยน กุ๊น สี่ เมี่ยน เญย หฑะเฮมียน. ต้ม ไซ เมี่ยน ฯฒฯ ฒ่า หน่าย นิ่น บัว.

28นิ่น ก๊อง, “เยีย บัว หัด เม่ย บัว ธิน-หม่าน ไม้ ตู๋ง หล่ง น้าย นอม บั๋ว หฌาว เมี่ยน นี! หมั่ง ก๋า! เม่ย บัว หฌาว เญย เล์ย ฒุ่น ปวั๊ง เยลูซาเลม ฒี่ง อ๊ะ นีอา. เลี่ยม วั้ว ล่าน เมี่ยน ไต่ เญย สี่ เม่ย บัว อ๋อย ห่อย เยีย บัว ดาม-ตอง.”

29ปีเต เหธา วั้ว เต๋ย กง-โฒ่ บัว เตา, “เยีย บัว อ๋อย หฒุ หมวัง ทิน-ฮู่ง, ไม้ เฒ์ย หมวัง เมี่ยน.

30เม่ย บัว เฒาะ เยซู ตีง เจี๊ยน เหฒียบ หฑั่ง จ๋า ไต๋ นิ่น, มป่า เยีย บัว เญย อง-ถาย เญย ทิน-ฮู่ง ปุน นิ่น แอ๋ง นั่ง ต้าย.

31ทิน-ฮู่ง ท่าย นิ่น ฝาว ฮลัง, ปุน นิ่น เฒว์ย เจี๊ยน ทิน-ฮู่ง เญย บย่าว แหมง โหฒว เปย๊ย เฒ้ย หย่า โหฒว เหฌียว เฒี้ยว, ปุน อิสะลาเอน เมี่ยน ก๊อย เฮญี้ยว ตุ๊ ทิน-ฮู่ง กวั่ง นิ่น บัว เญย ฒุ์ย.

32เยีย บัว เหว่ย น้าย เต๋ย สี่ โหฒว ฒอง-เหฒง. ทิน-ฮู่ง เหธย สีง ลี่ง ปุน หมวัง นิ่น เญย หว่า เญย เมี่ยน. สีง ลี่ง หย่า เหธา เยีย บัว โหฒว ฒอง-เหฒง.”

33กุ๊น สี่ หวุ่ย เญย เมี่ยน ไฮ์ น้าย เต๋ย หว่า, นิ่น บัว เฉีย เจี์ย! ไห่. ฮนั้ง หาย หย่า อ๋อย ไต๋ กง-โฒ่ บัว อ๊ะ.

34มป่า ม่าย เต้า ฟาลิสี เมี่ยน, บั๋ว เห่ว กามาลิเอน, โหฒว หฌาว เล์ย เญย ฟิน-แซง. หฒวัง เมี่ยน หย่า ท่าย นิ่น. นิ่น เยียม กุ๊น สี่ หวุ่ย โซ้ว เจี์ย ต้าย บั๋ว เมี่ยน ต้อ กง-โฒ่ บัว ธ้วด ตั้ง กะเหญี่ย.

35นิ่น ฯฒฯ ก๊อง บั๋ว กุ๊น สี่ หวุ่ย เญย หฒวัง เมี่ยน, “อิสะลาเอน ก๋อ-โย์ว อ้า! เม่ย บัว อ๋อย โหฒว หาย หญู่ง ปุน น้าย เต๋ย เมี่ยน มป่า อ๋อย หฒุ หลงๆ เญย ฮนั้ม ด่าง.

36ฒิ่น ด่าง ม่าย เต้า, บั๋ว เห่ว ทุดาด, เธง นิ่น กั้น โหฒว โฮล. แอ๋ง ม่าย เล่ย ไม้ โก เฝย แป๊ะ เต้า เมี่ยน กัน นิ่น. มป่า ฆะฮ้า นิ่น หฒุ เมี่ยน ไต๋ ไต่. กัน นิ่น เญย เมี่ยน หฑาน เหฑ่ง, เฒียง หน่าย ป่า เหฑ่ง หมี่ อ๊ะ.

37“ฆะฮ้า ฝาว เมี่ยน โฮ์ว วั้ว หฒั่น, ม่าย เต้า กาลิลี เมี่ยน, บั๋ว เห่ว ยูดาด, หยัวะ เมี่ยน ธั้ม กัน นิ่น. มป่า นิ่น ฟี่ ฮนั้ง เญย หฒุ เมี่ยน ไต๋ ไต่. กัน นิ่น วั้ว เต๋ย เมี่ยน เฒียง หน่าย หฑาน เหฑ่ง หมี่ อ๊ะ.

38ฮนั้ง หน่าย, อี้ หฒั่น ธ้วด ต้าย เญย สี่ เยีย ขวิน เม่ย บัว ไม้ ตู๋ง โหฒว หาย หญู่ง ปุน น้าย เต๋ย เมี่ยน. ปู๋ง นิ่น บัว มี่ง อ๊ะ. สี ก๊อง นิ่น บัว โหฒว เญย เหธา ฮนั้ม เญย เยียม ป้าม เมี่ยน ธ้วด นอ, ฯฒฯ ป่าย เหฑ่ง หมี่ อ๊ะ.

39มป่า สี ก๊อง เยียม ทิน-ฮู่ง ต้าย นอ, เม่ย บัว หฒะเก้ง ไม้ ไฮ่ ฮี่ง นิ่น บัว. เหฑีย เม่ย บัว กั้น เหธา ทิน-ฮู่ง เบ๊าะ จ๋า ฮนั้ง.”

40กุ๊น สี่ เญย เมี่ยน ฯฒฯ เอย กามาลิเอน เญย หว่า โหฒว อ๊ะ. นิ่น บัว เห่ว กง-โฒ่ บัว เปียะ ต้าย ปุน เมี่ยน หล่ง ปย๊า-ปิน เบ๊าะ, แอ๋ง หัด นิ่น บัว ไม้ ตู๋ง หล่ง เยซู เญย บั๋ว ก๊อง หาย หญู่ง. หัด ลิ์ว ฯฒฯ ปู๋ง นิ่น บัว มี่ง อ๊ะ.

41กง-โฒ่ บัว ธ้วด หวุ่ย มี่ง นิ่น บัว เฌียน-โย่ว ไห่, เหว่ย หฒุ ทิน-ฮู่ง ฝุน นิ่น บัว ผุย ตุ๊ เหว่ย เยซู เญย บั๋ว เตี๊ย ไญ้.

42นิ่น บัว ฮนอยๆ เยียม หฒั่ง ทิน-ฮู่ง เญย เปย๊า หย่า เฒว่ย เมี่ยน เญย เปย๊า, ไม้ ตี้ง เลี่ยว เญย หฌาว เจี๊ยน มี่ง หย่า ฒุ่น คู้ เฝียน ก๊อง เยซู โหฒว กีตู่.

← Chapter 4 Jump to: Chapter 6 →