Acts 6

Mien Bible (Thai Script) © Thailand Bible Society, 2007

← Chapter 5 Jump to: Chapter 7 →

1วั้ว เต๋ย หธาม, หฒั่นๆ ม่าย เมี่ยน ทิม เปียะ ต้าย โหฒว ไซ-ก๋อ จา ธั้ม เจี๊ยน ฝาว. โหฒว เกา, ก๊อง กีก หว่า วั้ว เต๋ย ยิวไท เมี่ยน งบ ก๊อง ฮิบลู หว่า เญย ยิวไท เมี่ยน เหว่ย หฒุ ฮนอยๆ จวัง กะน้าย, เควย หฒุ ก๊อง กีก หว่า วั้ว เต๋ย เญย เอ๊า-กว๊า.

2เหฒียบ เหญ่ย เต้า กง-โฒ่ ฯฒฯ เห่ว ไซ-ก๋อ บัว ต้าย ฒุ้น, บั๋ว นิ่น บัว, “เยีย บัว กวั่ง เจี๊ยน ไม้ ฒุ่น ทิน-ฮู่ง เญย โต์, มี่ง หลิ่ว เล์ย จวัง เอ๊า-กว๊า เซ ไม้ หอบ.

3ก๋อ-โย์ว อ้า! เยียม เม่ย บัว น้าย กะญั์ว อ๋อย หฒุ กิ๊น เสี่ย ล่าน เมี่ยน, ต้ง ม่าย เม่ง เต้า หลง, ม่าย สีง ลี่ง ปวั๊ง เฮญี้ยว, หย่า ม่าย ธง-เม่ง เญย เมี่ยน. เยีย บัว อ๋อย พ้าย นิ่น บัว หลิ่ว เล์ย น้าย เต๋ย กง.

4เยีย บัว ฯฒฯ ไฮ่ หล่ง เหฑ่ง เฮญี้ยว เต๋า เก๋า, ฒุ่น ทิน-ฮู่ง เญย โต์.”

5หฒวัง เมี่ยน ไฮ์ น้าย เต๋ย หว่า นิ่น บัว หอบ เฮญี้ยว เญย, ฯฒฯ กิ๊น สะเทเฟน. สะเทเฟน เสียน ตุ๊ หลง ไห่ หย่า ม่าย สีง ลี่ง ปวั๊ง เฮญี้ยว. นิ่น บัว แอ๋ง กิ๊น ฟีลิบ, โปโคลัด, นิคาโน, ทิโมน, ปานเมนัด เหธา เยียม อันทีโอก ฒี่ง ต้าย เญย จั๋น, ต้ง กัน ยิวไท เมี่ยน เสียน ทิน-ฮู่ง วั้ว เต้า นีโคเลา.

6หฒวัง เมี่ยน ต้อ น้าย เต๋ย ไซ-ก๋อ มี่ง กง-โฒ่ บัว วั้ว. กง-โฒ่ บัว ฯฒฯ มาน เจี๊ยน นิ่น บัว เต๋า เก๋า.

7ฆะฮ้า ทิน-ฮู่ง เญย โต์ หฮยาง เจี๊ยน มี่ง. เยียม เยลูซาเลม ฒี่ง, ไซ-ก๋อ เญย โสว โหม่ว กุ๊น โหฒว กุ๊น ธั้ม เจี๊ยน ฝาว. แอ๋ง ม่าย ไซ เมี่ยน ธั้ม เญย ต้าย เสียน.

8สะเทเฟน ตุ๊ ทิน-ฮู่ง เญย เอน เหธา ต้ม ชะ เยียม หฒวัง เมี่ยน บุด๋ง โหฒว ต้ม จั๋ง-โห่ เหธา บัวะ ฮ่อง เญย สี่.

9มป่า ม่าย เต๋ย เมี่ยน ต้าย เหธา นิ่น ต๋อย-เตก แฑง. ต้าย แฑง น้าย เต๋ย เมี่ยน เยียม ไซลีน มู้ง, อาเล้กซานเดเลีย ฒี่ง, ซีลีเซีย แซ้ง เหธา เอเซีย แซ้ง ต้าย เญย ยิวไท เมี่ยน. นิ่น บัว เซ จวั่ง หวุ่ย เญย เมี่ยน, ต้ง เมี่ยน เห่ว, “ปู๋ง ฆอย เญย เมี่ยน เญย หวุ่ย.”

10มป่า นิ่น บัว แฑง ไม้ ฮี่ง เหว่ย หฒุ สีง ลี่ง ปุน สะเทเฟน ม่าย ธง-เม่ง ก๊อง หว่า.

11นิ่น บัว ฯฒฯ เป่ย เดี๊ย ธี้ง เมี่ยน ก๊อง, “เยีย บัว ไฮ์ น้าย ล่าน เมี่ยน คี โมเซ หย่า คี ทิน-ฮู่ง.”

12นิ่น บัว ฯฒฯ โธะ หฒวัง เมี่ยน เหธา เมี่ยน โก๋ เหธา หฌาว เล์ย เญย ฟิน-แซง มี่ง เฒาะ สะเทเฟน ต้อ มี่ง ยิวไท เมี่ยน เญย กุ๊น สี่ หวุ่ย วั้ว.

13นิ่น บัว แอ๋ง ล์อ เมี่ยน โหฒว จ๊า ฒอง-เหฒง ก๊อง, “น้าย ล่าน เมี่ยน ไม้ ตี้ง เลี่ยว เญย ก๊อง คี หฒั่ง ทิน-ฮู่ง เญย เปย๊า เหธา เล์ย-หลัด,

14เหว่ย หฒุ เยีย บัว ไฮ์ นิ่น ก๊อง นาซาเล้ด มู้ง เญย เยซู อ๋อย โหฒว หว่าย น้าย นอม ต๋อง หย่า ก๊อย เหฑ่ง โล์-ฮนอย โมเซ จิว ปุน บัว เญย เล์ย-ฝีง.”

15เฒว์ย เจี๊ยน กุ๊น สี่ หวุ่ย เญย หฒวัง เมี่ยน นุๆ เญย หมั่ง เจี๊ยน สะเทเฟน เญย เฮมียน, ปวัด ฮนั้ง ฟิน-เมี่ยน เญย เฮมียน นอ.

← Chapter 5 Jump to: Chapter 7 →