1 Chronicles 12

Kamba (Mbivilia) 1956

← Chapter 11 Jump to: Chapter 13 →

1Na ĩndĩ aa nĩo ala mamũkĩe Ndaviti ku Nzikilaki, yĩla wevingĩaa nũndũ wa Saulo mwana wa Kisu; nao maĩ amwe katĩ wa ila ngũmbaũ, atethya make kaũnĩ.

2Maĩ na mata, na maĩ matonya kwĩkya mavia na kĩkũtha na kwĩkya mĩsyĩ na ũta na kw’oko kwa aũme o na kwa aka: maĩ ma ana‐a‐ĩthe ma Saulo ma Mbenyamini.

3Ũla mũnene aĩ Aieseli, na ĩndĩ Yoasi, ana ma Semaa Mũngiveathi; na Yesieli, na Veleti, ana ma Asimavethi; na Mbelaka, na Yeu Mũanathothi;

4na Isimaia Mũngiveoni, ngũmbaũ katĩ wa ala mĩongo ĩtatũ, na ĩũlũ wa ala mĩongo ĩtatũ; na Yelemia, na Yaanzieli, na Yoanani, na Yosavati Mũngetelathi,

5na Elusai, na Yelimothi, na Mbealia, na Semalia, na Sevatia Mũaluvi,

6na Elikana, na Isia, na Asaleeli, na Yoeseli, na Yasoveamu, Akola,

7na Yoela, na Nzevatia, ana ma Yeloamu wa ku Ngetoli.

8Na amwe ma Angati meevatha mamũatĩĩe Ndaviti ngomenĩ yĩ vinya weũnĩ, ngũmbaũ nene, andũ mamanyĩĩtw’e kaũ, ala maĩ matonya kũkwata ngao na ĩtumo; ala mothyũ moo mailyĩ ta mothyũ ma mĩnyambũ, na maĩ mĩtũkĩ kũthi ta nthwaia nga iĩmanĩ:

9ũla mũnene Eseli, na wa kelĩ Ovatia, na wa katatũ Eliavu,

10na wa kana Misimana, na wa katano Yelemia,

11na wa thanthatũ Atai, na wa mũonza Elieli,

12na wa nyanya Yoanani, na wa kenda Elisavati,

13na wa ĩkũmi Yelemia, na wa ĩkũmi na ũmwe Makivanai.

14Asu ma ana ma Ngati maĩ makavuteni ma nguthu: ũla waĩ mũnini mbee eanene na ĩana, na ũla mũnene mbee eanene na ngili.

15Asu nĩo ala maingie Yotolani mwei wa mbee, yĩla wavingĩte ũkakĩla ngũka syonthe syaw’o; na malũngya onthe ala matwĩe myandanĩ, ngalĩ ya wumĩloni wa syũa na ngalĩ ya ũthũilonĩ wa syũa.

16Na kwooka ngomenĩ yĩ vinya vala ve Ndaviti amwe ma ana ma Mbenyamini na Yuta.

17Na Ndaviti aumaala akomane nao, na amasũngĩa, amea, Ethĩwa mũkĩte kwakwa na mũuo mũndethye, ngoo yakwa ĩkalũman’ya nenyu; ĩndĩ ethĩwa nĩmũkĩte mũmbũnyanĩe kwa amaitha makwa, nũndũ kũti ĩvĩtyo mokonĩ makwa, Ngai wa aaĩthe maitũ nasisye ũndũ ũsu, na ookan’ye.

18Nĩvo ĩndĩ Veva amũvw’ĩkie Amasai, ũla waĩ mũnene wa ala mĩongo ĩtatũ, na asya, Ithyĩ twĩ maku, Ndaviti, na twĩ ngalĩ yaku, we mwana wa Yese: mũuo, mũuo wĩthĩwe kwaku, na mũuo wĩthĩwe kwa atethya maku; nũndũ Ngai waku nũkũtethasya. Na ĩndĩ Ndaviti amosa, na amatw’ĩkĩthya makavuteni ma ĩla nguthu.

19O na amwe ma Manase meetila maende na Ndaviti yĩla wokie na Avilisiti kũvithũkĩa Saulo: ĩndĩ matyaamatethya; nũndũ eaĩi ma Avilisiti masũanĩa mamwĩa athi, makyasya, Akeetila asyoke kwa vwana wake Saulo na mĩtwe yaitũ ĩkalika mũisyonĩ.

20Aendete Nzikilaki, ala ma Manase ala meetilile maende nake nĩ Atena, na Yosavati, na Yetiaeli, na Mikaeli, na Yosavati, na Eliu, na Nzilethai, makavuteni ma ngili ila syaĩ sya Manase.

21Na mamũtethya Ndaviti okite na nguthu ya amaitha: nũndũ asu onthe maĩ ngũmbaũ nene, na maĩ makavuteni ĩ nguthunĩ.

22Nũndũ mũthenya na mũthenya andũ mamũkĩaa Ndaviti mamũtethye, mũvaka kweethĩwa nguthu nene, o ta nguthu ya Ngai.

23Na aa nĩmo motalo ma atongoi ma ala mekĩĩte mĩio ya kaũ, ala mamũkĩe ndaviti ku Eviloni, maalyũle ũsumbĩ wa Saulo wĩthĩwe wake, kwĩanana na ndeto ya Yeova.

24Ana ma Yuta ala makuaa ngao na ĩtumo maĩ ngili thanthatũ na maana nyanya, mekĩĩte mĩio ya kaũ.

25Ma ana ma Simeoni, ngũmbaũ nene ũndũ wa kaũ, ngili mũonza na ĩana.

26Ma ana ma Livai ngili inya na maana thanthatũ.

27Na Yeoiata aĩ mũtongoi wa nyũmba ya Aluni; na vamwe nake kwaĩ ngili itatũ na maana mũonza,

28na Nzatoki, mwanake ngũmbaũ nene, na ma ala ma nyũmba ya ĩthe wake makavuteni mĩongo ĩlĩ na elĩ.

29Na ma ana ma Mbenyamini, ana‐a‐ĩthe ma Saulo, ngili itatũ: nũndũ kũvika ĩvinda yĩu ala aingĩ moo nĩmalũmanĩtye na nyũmba ya Saulo.

30Na ma ana ma Evalaimu ngili mĩongo ĩlĩ na maana nyanya, ngũmbaũ nene, andũ me nguma nyũmbanĩ sya aaĩthe moo.

31Na ma nyunzu ya mbaĩ ya Manase ngili ĩkũmi na nyanya, ala mawetiwe na masyĩtwa, moke mamũtw’ĩkĩthye Ndaviti mũsumbĩ.

32Na ma ana ma Isakali, andũ ala maĩ na ũmanyi wa mavinda, mesĩ ũndũ Isilaeli maĩle kwĩka, atongoi moo maĩ maana elĩ; na ana‐a‐ĩthe moo onthe maĩ mwĩaonĩ woo.

33Ma Nzevuluni ala maĩ matonya kũthi nguthunĩ, ala maĩ matonya kũtaũsya kaũ, me na mĩio ya mĩthemba yonthe ya kaũ, ngili mĩongo itano, ala maĩ matonya kũkitĩthya kaũ, na matyaĩ na ngoo ilĩ.

34Na ma Navitali makavuteni ngili, na vamwe nao andũ ngili mĩongo ĩtatũ na mũonza me na ngao na ĩtumo.

35Na ma Andani ala maĩ matonya kũtaũsya kaũ, ngili mĩongo ĩlĩ na nyanya na maana thanthatũ.

36Na ma Aseli, ala maĩ matonya kũthi nguthunĩ, ala maĩ matonya kũtaũsya kaũ, ngili mĩongo ĩna.

37Na mũingo ũya wa Yolotani, ma Aleuveni, na Angati, na ma nyunzu ya mbaĩ ya Manase, me na mĩthemba yonthe ya mĩio ya kaũ ũndũ wa kũkita, ngili ĩana na mĩongo ĩlĩ.

38Asu onthe, nũndũ nĩ andũ ma kaũ, ala maĩ matonya kũkitĩthya kaũ, mooka na ngoo mbĩanĩu ku Eviloni, mamũtw’ĩkĩthye Ndaviti mũsumbĩ wa Isilaeli onthe: o na ala angĩ onthe ma Isilaeli maĩ na ngoo ĩmwe ya kũmũtw’ĩkĩthya Ndaviti mũsumbĩ.

39Na maĩ kw’o na Ndaviti mĩthenya ĩtatũ, makĩya na kũnyw’a; nũndũ ana‐a‐ĩthe moo nĩmeeyũmbanĩtye kwondũ woo.

40Na ĩngĩ ala maĩ vakuvĩ nao, o na kũvika nthĩ ya Isakali na Nzevuluni na Navitali, maete imũtũ ikuĩtwe nĩ mang’oi, na ngamĩle, na nyũmbũ, na ng’ombe, lĩu wa mũtu, na tũkũmbwa twa makũyũ, na ĩtũngo sya nzavivũ mbovu, na mbinyu, na mauta, na ng’ombe, na malondu maingĩ mũno: nũndũ kwaĩ ũtanu nthĩnĩ wa Isilaeli.

← Chapter 11 Jump to: Chapter 13 →