1 Chronicles 16

Kamba (Mbivilia) 1956

← Chapter 15 Jump to: Chapter 17 →

1Na maete ĩsandũkũ ya Ngai nthĩnĩ, na mayia ĩeemanĩ nthĩnĩ yĩla Ndaviti wambĩte kwondũ wayo: na mamũthembea Ngai nthembo sya kũvĩvw’a na nthembo sya mũuo.

2Na yĩla Ndaviti waminie kũthemba nthembo ya kũvĩvw’a na nthembo sya mũuo, aathima andũ syĩtwanĩ ya Yeova.

3Na amaaaĩa kĩla ũmwe wa Isilaeli, aũme o na aka, kĩla ũmwe kĩlungu kya kĩmũtũ, na kĩlungu kya nyama, na kakũmbwa ka nzavivũ mbovu.

4Na aia amwe ma Alivai mathũkũmĩae vu mbee wa ĩsandũkũ ya Yeova, na kũmalilikanasya na kũtũngĩaa mũvea na kũtaĩaa Yeova, Ngai wa Isilaeli:

5nĩo aa, mũnene Asavu, na wa kelĩ Nzekalia, na Yeieli, na Semilamothi, na Yeiieli, na Matithia, na Eliavu, na Mbenaia, na Oveti‐etomu, na Yeieli, me na inanda na mbeve; na Asavu e na tũmasaya, tũkũkaya mũno;

6na athembi Mbenaia na Yaanzieli me na masoo ĩvinda yonthe, vu mbee wa ĩsandũkũ ya ũtianĩo ya Ngai.

7Na mũthenya ũsu nĩw’o Ndaviti wambie kũtw’a kana Yeova atũngĩwe mũvea, na kw’oko kwa Asavu na ana‐a‐ĩthe make.

8Mũtũngĩei Yeova mũvea, ĩkaĩlei syĩtwa yake; Manyĩthyai ngo sya andũ meko make. Mwinĩeĩ mũkumyei;

9Neenai ũndũ wa mawĩa make onthe ma ũseng’ya.

10Ĩkathĩĩei syĩtwanĩ yake ĩtheu; Ngoo ya ala mamanthaa Yeova nĩtane.

11Manthai Yeova na vinya wake; Manthai ũthyũ wake ĩvinda yonthe.

12Lilikanai mawĩa make ma ũseng’yo ala wĩkĩte, Moseng’yo make, na mosili ma kanyw’a wake,

13Inyw’ĩ ũsyao wa Isilaeli, mũthũkũmi wake, Inyw’ĩ ana ma Yakovo, anyuve make.

14Nĩwe Yeova Ngai waitũ; Mosili make me nthĩ yonthe.

15Lilikanai ũtianĩo wake tene na tene, Ndeto ĩla weaĩe nzyawa ngili,

16Ũtianĩo ũla watianĩe na Avalaamu, Na wĩvĩto wake kwa Isaka,

17Naw’o oolũlũmĩlya kwa Yakovo wĩthĩwe mwamũlo, Kwa Isilaeli wĩthĩwe ũtianĩo wa tene na tene,

18Akyasya, Nue ngaũnenga nthĩ ya Kanaani, Yĩthĩwe kĩlungu kya ũtĩĩwa wenyu;

19Yĩla mwaĩ andũ avũthũ ũtalonĩ, Ĩĩ, avũthũ mũno, na ekali ma ũeninĩ nthĩnĩ wayo;

20Na mangangaa kuma mbaĩnĩ kũthi mbaĩnĩ, Na kuma ũsumbĩnĩ ũmwe kũthi andũnĩ ma ũko ũngĩ.

21Ndaamũeka mũndũ o na wĩva ameke naĩ; Ĩĩ, amakan’ya asumbĩ kwondũ woo,

22Akĩmea, Mũtikakiite ala makwa metĩkĩw’e mauta, Na mũtikameke athani makwa ũthũku.

23Nthĩ yonthe, mwinĩei Yeova; Onan’yai ũtangĩĩo wake mũthenya na mũthenya.

24Tavan’yai ũtheu mũtisu wake katĩ wa i mbaĩ, Mawĩa make ma kũseng’ya katĩ wa ngo syonthe sya andũ.

25Nũndũ Yeova nĩ mũnene, na nĩ wa kũtaĩwa mũno: Nake nĩ wa ũkĩwa kũvĩtũka ngai syonthe.

26Nũndũ ngai syonthe sya ngo sya andũ nĩ mĩvw’anano: Ĩndĩ Yeova nĩwombie matu.

27Ndaĩa na ũnene syĩ mbee wake: Vinya na ũtanu syĩ vala ũĩ.

28Mũnengei Yeova, inyw’ĩ mĩvĩa ya ngo sya andũ, Mũnengei Yeova ndaĩa na vinya;

29Mũnengei Yeova ndaĩa yaĩlĩte syĩtwa yake: Etei nthembo, na mũkyũka mbee wake; Mũthaithei Yeova na ũseo wa ũtheu.

30Nthĩ yonthe, tetemeai mbee wake: Nthĩ nayo nĩlũmĩtw’e ũndũ ĩtatonya kũthingithw’a.

31Matu nĩmatane, na nthĩ yĩw’e mũyo; Na nĩmaneene katĩ wa i mbaĩ, Yeova nũsumbĩkĩte.

32Ũkanga nũlitũke, na wusũu waw’o; Mũũnda nũtane, na kyonthe kĩla kĩ nthĩnĩ waw’o;

33Nĩvo ĩndĩ mĩtĩ ya mũtitũnĩ ĩkainĩa mbee wa Yeova nũndũ wa ũtanu; Nũndũ nĩwũkĩte asilĩle nthĩ.

34Mũtũngĩei Yeova mũvea; nũndũ nĩ mũseo; Nũndũ ũseo wake wĩ wendo nĩwĩkalaa tene na tene.

35Na neenai atĩĩ, Tũtangĩĩe, ame Ngai wa ũtangĩĩo witũ, Tũmban’ye vamwe, noitwovosya kuma i mbaĩnĩ, Tũtũngĩe syĩtwa yaku ĩtheu mũvea, Na kũkĩlya vinya ndaĩnĩ yaku.

36Nataĩwe Yeova, Ngai wa Isilaeli, Kuma tene o na kũvika tene na tene. Na andũ onthe masya, Ameni, na mamũtaĩa Yeova.

37Na ĩndĩ amatia vo, mbee wa ĩsandũkũ ya ũtianĩo ya Yeova, Asavu na ana‐a‐ĩthe make, mathũkũmĩae vu mbee wa yĩla ĩsandũkũ mavinda onthe, o tondũ wĩa wa kĩla mũthenya waĩ na vata;

38na Oveti‐etomu, vamwe na ana‐a‐ĩthe moo, mĩongo thanthatũ na nyanya; o na Oveti‐etomu mwana wa Yetuthuni na Osa methĩwe asũvĩi ma mĩomonĩ;

39na mũthembi Nzatoki, na ana‐a‐ĩthe make athembi, vu mbee wa wĩkalo wa Yeova vandũ vatũlu vala vaĩ ku Ngiveoni,

40mamũthembeae Yeova nthembo sya kũvĩvw’a kithembeonĩ kya nthembo ya kũvĩvw’a ĩtatw’ikanaa kĩoko na wĩoo, o kwĩanana na w’onthe ũla ũandĩkĩtwe mĩaonĩ ya Yeova, ĩla wameaĩe Isilaeli;

41na vamwe nao Emani na Yetuthuni, na angĩ ala manyuviwe, ala mawetiwe na masyĩtwa, mamũtũngĩae Yeova mũvea, nũndũ ũseo wake wĩ wendo nĩwĩkalaa tene na tene;

42na vamwe nao Emani na Yetuthuni me na masoo na tũmasaya sya ala maambasya mũno, na me na syĩndũ sya kũinga kwondũ wa mbathi sya Ngai; na ana ma Yetuthuni methĩwe mbingĩlonĩ.

43Na andũ onthe mathi kĩla mũndũ nyũmbanĩ yake; na Ndaviti asyoka aathime nyũmba yake.

← Chapter 15 Jump to: Chapter 17 →