1 Chronicles 23

Kamba (Mbivilia) 1956

← Chapter 22 Jump to: Chapter 24 →

1Na ĩndĩ Ndaviti aĩ mũkũu na wa matukũ maingĩ; na amũtw’ĩkĩthya Solomoni mwana wake mũsumbĩ wa Isilaeli.

2Na oomban’ya anene onthe me mbee ũsumbĩnĩ ma Isilaeli, vamwe na athembi na Alivai.

3Na Alivai matalwa ala mavikĩtye myaka mĩongo ĩtatũ na mbee: na ũtalo woo mũtwe na mũtwe, mũndũ na mũndũ, waĩ ngili mĩongo ĩtatũ na nyanya.

4Ma asu, ngili mĩongo ĩlĩ na inya maĩ ma kũsyaĩĩsya wĩa wa nyũmba ya Yeova; na ngili thanthatũ maĩ anene na asili;

5na asũvĩi ma mĩomonĩ maĩ ngili inya; na ngili inya syamũtaĩaa Yeova na syĩndũ sya kũinga ila naseũvisye sya kũtaĩaa nasyo, Ndaviti asya ũu.

6Na Ndaviti amaaan’ya nguthu nguthu kwĩanana na ana ma Livai: Ngelisoni, na Koathi, na Melali.

7Ma Angelisoni: Latani na Simei.

8Ana ma Latani: mũnene Yeiieli, na Nzethamu, na Yoeli, atatũ.

9Ana ma Simei: Selomothi, na Aasieli, na Aalani, atatũ. Asu maĩ atongoi ma nyũmba sya aaĩthe sya Latani.

10Na ana ma Simei: Yaathi, na Nzina, na Yeusu, na Mbelia. Asu ana maĩ ana ma Simei.

11Na Yaathi nĩwe waĩ mũnene, na Nzisa aĩ wa kelĩ: ĩndĩ Yeusu na Mbelia matyaĩ na ana aingĩ; kwondũ wa ũu makũnanw’a vamwe matw’ĩka nyũmba ya aaĩthe.

12Ana ma Koathi: Amilamu, na Isali, na Eviloni, na Usieli, ana.

13Ana ma Amilamu: Aluni na Mose; na Aluni avathwa, avathe syĩndũ ila ntheu mbee, we na ana make, tene na tene, atoeeasye Yeova ũvani, amũthũkũmae, na kũathimaa syĩtwanĩ yake, tene na tene.

14Ĩndĩ ũndũ wa Mose mũndũ wa Ngai, ana make meetanĩaw’a na mbaĩ ya Livai.

15Ana ma Mose: Ngelisoni na Elieseli.

16Ana ma Ngelisoni: mũnene nĩ Sevueli.

17Na ana ma Elieseli: mũnene Leavia; na Elieseli ndaĩ na ana angĩ; ĩndĩ ana ma Leavia maĩ aingĩ mũno.

18Ana ma Isali: mũnene Selomithi.

19Ana ma Eviloni: mũnene Yelia, na wa kelĩ Amalia, na wa katatũ Yaanzieli, na wa kana Yekameamu.

20Ana ma Usieli: mũnene Mika, na wa kelĩ Isia.

21Ana ma Melali: Mali na Musi. Ana ma Mali: Eleasali na Kisu.

22Na Eleasali akw’a, na ndaĩ na ana, no eĩtu: na ana‐a‐ĩthe moo ana ma Kisu mamatwaa.

23Ana ma Musi: Mali, na Eteli, na Yelemothi, atatũ.

24Asu maĩ ana ma Livai kũatĩĩa nyũmba sya aaĩthe moo, o atongoi ma nyũmba sya aaĩthe ma asu ala matalilwe, ũtalonĩ wa masyĩtwa mũndũ na mũndũ, ala matethasya wĩa wa ũthũkũmi wa nyũmba ya Yeova, ala mavikĩtye myaka mĩongo ĩlĩ na mbee.

25Nũndũ Ndaviti asya, Yeova, Ngai wa Isilaeli, nũmanengete andũ make ũthũmũo; na nũtũaa Yelusaleme tene na tene:

26o na Alivai matikethĩwa vata wa ũkua wĩkalo na mĩio yonthe yaw’o ya ũthũkũmi waw’o.

27Nũndũ kwondũ wa ndeto sya mũminũkĩlyo sya Ndaviti ana ma Livai nĩmatalilwe, ala mavikĩtye myaka mĩongo ĩlĩ na mbee.

28Nũndũ wĩa woo waĩ wa kũthũkũma ana ma Aluni kwondũ wa ũthũkũmi wa nyũmba ya Yeova, ku nza, na tũsũmbanĩ, na ũndũ wa kũthesya mĩio yonthe mĩtheu, o wĩa wa ũthũkũmi wa nyũmba ya Ngai;

29o na kwondũ wa imũtũ ila siĩawa Yeova, na kwondũ wa mũtu mũvinyu wa nthembo ya mũtu, ethĩwa nĩ tũmĩkate tũvũthũ tũte ĩlawa, kana ũla ũkaangĩawa kĩkaanginĩ, kana ũla ũkaangawa ũkĩtheũkw’a, na kwondũ wa mũthemba w’onthe wa kĩthimi na ũndũ kĩndũ kĩana;

30na ma kũũngamaa kĩla kĩoko mamũtũngĩe Yeova mũvea na kũmũtaĩa, na wĩoo o ta ũu;

31na ma kũmũthembeaa Yeova nthembo syonthe sya kũvĩvw’a, masavatonĩ, na mĩtisonĩ ya myei, na mbokanĩ itw’ĩtwe, kwa ũtalo wasyo kwĩanana na ũtw’ĩo kwondũ wasyo, mavinda onthe mbee wa Yeova;

32na nĩ kana masũvĩae wĩaĩo wa ĩeema ya kũmbanĩa, na wĩaĩo wa vala vatheu, na wĩaĩo ũndũ wa ana ma Aluni ana‐a‐ĩthe moo, kwondũ wa ũthũkũmi wa nyũmba ya Yeova.

← Chapter 22 Jump to: Chapter 24 →