1 Chronicles 9

Kamba (Mbivilia) 1956

← Chapter 8 Jump to: Chapter 10 →

1Ũu nĩw’o Isilaeli onthe matalilwe kũatĩĩa ũtalo wa nzyawa; na, sisya, nĩmaandĩkĩtwe ĩvukunĩ ya asumbĩ ma Isilaeli. Na Yuta matwawa me atave Mbaviloni nũndũ wa kũvĩtya kwoo.

2Na ĩndĩ ala ma mbee ala matwĩe ng’ũndũnĩ syoo ndũanĩ syoo nĩ Isilaeli, na athembi, na Alivai, na Anethini.

3Na Yelusaleme kwatwĩe ana ma Yuta, na ana ma Mbenyamini, na ana ma Evalaimu na Manase:

4Uthai mwana wa Amiuti, mwana wa Omili, mwana wa Imili, mwana wa Mbani, wa ana ma Velesi mwana wa Yuta.

5Na ma Asilo: ĩkithathi Asaia, na ana make.

6Na ma ana ma Nzela: Yeueli, na ana‐a‐ĩthe moo, maana thanthatũ na mĩongo kenda.

7Na ma ana ma Mbenyamini: Salu mwana wa Mesulamu, mwana wa Otavia, mwana wa Asenua,

8na Ivineia mwana wa Yeloamu, na Ela mwana wa Usisi, mwana wa Mikili, na Mesulamu mwana wa Sevatia, mwana wa Leueli, mwana wa Iviniya;

9na ana‐a‐ĩthe moo, kũatĩĩa nzyawa syoo, maana kenda na mĩongo ĩtano na thanthatũ. Andũ asu onthe maĩ atongoi ma nyũmba sya aaĩthe kũatĩĩa nyũmba sya aaĩthe moo.

10Na ma athembi: Yetaia, na Yeoialivu, na Yakini,

11na Asalia mwana wa Ilikia, mwana wa Mesulamu, mwana wa Nzatoki, mwana wa Melaiothi, mwana wa Aituvu, mũtongoi nyũmbani ya Ngai;

12na Ataia mwana wa Yeloamu, mwana wa Vasuli, mwana wa Malikiya, na Maasai mwana wa Atieli, mwana wa Yasela, mwana wa Mesulamu, mwana wa Mesilemithi, mwana wa Imeli;

13na ana‐a‐ĩthe moo, atongoi ma nyũmba sya aaĩthe moo, ngili na maana mũonza na mĩongo thanthatũ; andũ me ũtonyi mũno kwondũ wa wĩa wa ũthũkũmi wa nyũmba ya Ngai.

14Na ma Alivai: Semaia mwana wa Asuvu, mwana wa Asilikamu, mwana wa Asavia, wa ana ma Melali;

15na Mbakivakali, na Elesi, na Ngalali, na Matania mwana wa Mika, mwana wa Nzikili, mwana wa Asavu,

16na Ovatia mwana wa Semaia, mwana wa Ngalali, mwana wa Yetuthuni, na Mbelekia mwana wa Asa, mwana wa Elikana, ũla wekalile mĩsyĩ ya Anetovathi.

17Na asũvĩi ma mĩomonĩ: Salumu, na Akuvu, na Talimoni, na Aimani, na ana‐a‐ĩthe moo (Salumu aĩ mũnene),

18ala kuma tene masyaĩĩsyaa mbingĩlonĩ ya mũsumbĩ ngalĩ ya wumĩlonĩ wa syũa: asu maĩ asũvĩi mĩomonĩ ya mwako wa maeema wa ana ma Livai.

19Na Salumu mwana wa Kole, mwana wa Eviasavu, mwana wa Kola, na ana‐a‐ĩthe make, ma nyũmba ya ĩthe wake, Akola, maĩ aũngamĩi ma wĩa wa ũthũkũmi, asũvĩi ma myalyonĩ ya ĩeema: na aaĩthe moo maĩ asyaĩĩsya ma mwako wa maeema wa Yeova, asũvĩi ma vandũ va ũlikĩla.

20Na Vineasi mwana wa Eleasali aĩ mũtongoi woo ĩvinda ya tene, na Yeova aĩ vamwe nake.

21Nzekalia mwana wa Meselemia aĩ mũsũvĩi wa mũomonĩ wa ĩeema ya kũmbanĩa.

22Asu onthe ala manyuviwe methĩwe asũvĩi mĩomonĩ maĩ maana elĩ na ĩkũmi na elĩ. Asu nĩmatalilwe ũtalonĩ wa nzyawa mĩsyĩ kwoo, ala Ndaviti na Samueli ũla mwoni mamaiie wĩanĩ woo wa kũĩkĩĩwa.

23Na ĩndĩ mo na ana moo maĩ asyaĩĩsya ma mbingĩlo sya nyũmba ya Yeova, o nyũmba ya yĩla ĩeema, makyumanĩasya.

24Asũvĩi ma mĩomonĩ maĩ ngalĩ inya, ngalĩ ya wumĩlonĩ wa syũa, na ya ũthũĩlonĩ wa syũa, na ya ĩũlũ, na ya ĩtheo.

25Na ana‐a‐ĩthe, ala maĩ mĩsyĩ kwoo, matyaĩ ndĩi ya kũlea kũka kĩla mũthenya wa mũonza ĩvinda kwa ĩvinda methĩwe nao:

26nũndũ asũvĩi ana anene ma mĩomonĩ, namo nĩ Alivai, maĩ wĩanĩ wa kũĩkĩĩwa, na maĩ asũvĩi ma tũsũmba na asũvĩi ma kũla kwiawa ũthwii nyũmbanĩ ya Ngai.

27Na nĩmakomaa mathyũlũlũkĩte nyũmba ya Ngai, nĩkwĩthĩwa wĩaĩo wayo waĩ ĩũlũ woo; na kũmĩvingũaa kĩla kĩoko kwaĩ ũndũ woo.

28Na amwe moo nĩmasũvĩaa mĩio ya ũthũkũmi nũndũ mĩio ĩsu yalikaw’a nthĩnĩ yĩ mĩtale na yaumaalaw’a yĩ mĩtale.

29O na amwe moo maiawa kũsũvĩa mĩio, na ĩla mĩio yonthe ya vala vandũ vatheu, na mũtu mũvinyu, na mbinyu, na mauta, na ũvumba, na mĩtĩ ĩla ĩnyungaa nesa.

30Na amwe ma ana ma athembi maseũvya mũvulan’yo wa mĩtĩ ĩla ĩnyungaa nesa.

31Na Matithia, ũmwe wa Alivai, ũla waĩ ĩkithathi ya Salumu Mũkola, aĩ na wĩa wa kũĩkĩĩwa wa syĩndũ ila syakaangawa ikaanginĩ.

32Na amwe ma ana‐a‐ĩthe moo, ma ana ma Akoathi, maĩ ma kũsũvĩa imũtũ ila siĩawa Yeova, kwiseũvasya kĩla mũthenya wa savato.

33Na aa nĩo aini, atongoi ma nyũmba sya aaĩthe ma Alivai, ala mekalile tũsũmbanĩ na matyaĩ na ũthũkũmi ũngĩ; nũndũ nĩmakwataa wĩa woo mũthenya na ũtukũ.

34Asu maĩ atongoi ma nyũmba sya aaĩthe ma Alivai, mosyaanĩonĩ moo onthe, andũ anene: nao nĩmekalaa Yelusaleme.

35Na Ngiveoni kwatwĩe Yeieli, ĩthe wa Ngiveoni, ũla syĩtwa ya kĩveti kyake kyeetawa Maaka;

36na ĩkithathi yake nĩ Avitoni, na ĩndĩ Nzuli, na Kisu, na Mbaali, na Neli, na Natavu,

37na Ngetoli, na Aio, na Nzekalia, na Mikilothi.

38Na Mikilothi asyaa Simeamu. Nao matũaa na ana‐a‐ĩthe moo Yelusaleme melekanĩle ana‐a‐ĩthe moo.

39Na Neli asyaa Kisu; na Kisu asyaa Saulo; na Saulo asyaa Yonathani, na Maliki‐suua, na Avinatavu, na Esi‐mbaali.

40Na mwana wa Yonathani nĩ Melivi‐mbaali; na Melivi‐mbaali asyaa Mika.

41Na ana ma Mika: Vithoni, na Meleki, na Taalea, na Aasu.

42Na Aasu asyaa Yala; na Yala asyaa Alemethi, na Asimavethi, na Nzimili; na Nzimili asyaa Mosa;

43na Mosa asyaa Mbinea; na Levaia mwana wake, na Eleasa mwana wake, na Aseli mwana wake.

44Na Aseli aĩ na ana thanthatũ, ala masyĩtwa moo nĩmo aa: Asilikamu, na Mbokelu, na Isumaeli, na Sealia, na Ovatia, na Aananu: asu nĩ ana ma Aseli.

← Chapter 8 Jump to: Chapter 10 →