1 Chronicles 17

Kamba (Mbivilia) 1956

← Chapter 16 Jump to: Chapter 18 →

1Na kweethĩwa, yĩla Ndaviti wekalaa nyũmbanĩ yake, Ndaviti amwĩa mwathani Nathani, Sisya, nĩkalaa nyũmbanĩ ya mĩtĩ ya mĩkũũ, indĩ isandũkũ ya ũtianĩo ya Yeova nĩyĩkalaa nthĩnĩ wa motũtũ ma ngũa.

2Na Nathani amwĩa Ndaviti, Ĩka w’onthe ũla wĩ ngoonĩ yaku; nũndũ Ngai e vamwe naku.

3Na kweethĩwa, ũtukũ ũsu, ndeto ya Ngai yamũkĩa Nathani, ĩkĩmwĩa,

4Enda ũmũtavye Ndaviti mũthũkũmi wakwa, Ũũ nĩw’o Yeova ũnũkwasya, Ndũkambakĩa nyũmba ya kwĩkala:

5nũndũ ndyaaĩkala nyũmbanĩ kuma mũthenya ũla nambatisye Isilaeli, kũvika ũmũnthĩ, ĩndĩ nĩnĩendaa kuma ĩeemanĩ kũthi ĩeemanĩ, na kuma wĩkalonĩ ũmwe kũthi ũngĩ.

6Kũndũ kw’onthe kũla naatambũka na Isilaeli onthe, naaneena ndeto na mũsili o na ũmwe wa Isilaeli, ala nameaĩe mamaĩthye andũ makwa, ngamakũlya, Nũndũ wa kĩ mũtyaambakĩa nyũmba ya mĩtĩ ya mĩkũũ?

7Na yu kwondũ wa ũu ũkamwĩe mũthũkũmi wakwa Ndaviti atĩĩ, Ũũ nĩw’o Yeova wa nguthu ũnũkwasya, Nũnakumisye kyengonĩ kya malondu, yĩla waatĩĩaa malondu, nĩ kana wĩthĩwe mũnene wĩ mbee ũsumbĩnĩ andũnĩ makwa Isilaeli:

8na naĩ vamwe naku o vala waendaa, na naveta amaitha maku onthe maume mbee waku; na ngakwonea syĩtwa ya ala anene ala me kũũ nthĩ.

9Na ngatw’a vandũ kwondũ wa andũ makwa Isilaeli, na ngamavanda, nĩ kana matũae vandũ voo ene, na matikathamw’a ĩngĩ; o na ana ma ũthũku matikamananga ĩngĩ, ta ĩvinda ya mbee,

10na kuma mũthenya ũla neeaĩe asili methĩwe anene ma andũ makwa Isilaeli; na ngakĩlya amaitha maku onthe vinya. Na ĩngĩ nĩngũkũtavya kana Yeova akakwakĩa nyũmba.

11Na kũkeethĩwa, yĩla matukũ maku meĩanĩa ũende wĩthĩwe vamwe na aaĩthe maku, ngookĩlya ũsyao waku ĩtina waku, ũla ũkethĩwa wa ana maku; na ngalũlũmĩlya ũsumbĩ wake.

12Nake akambakĩa nyũmba, na ngalũlũmĩlya kĩvĩla kyake kya ũsumbĩ tene na tene.

13Ngeethĩwa ĩthe wake, nake akeethĩwa mwana wakwa; na ndikaumya ũseo wakwa wĩ wendo kwake, o tondũ nawumisye kwa ũla waĩ mbee waku;

14ĩndĩ ngamũlũmya nyũmbanĩ yakwa na ũsumbĩnĩ wakwa tene na tene; na kĩvĩla kyake kya ũsumbĩ kĩkalũlũmĩlw’a tene na tene.

15Kwĩanana na ndeto ii syonthe, na kwĩanana na woni ũũ w’onthe, now’o Nathani wamũtavisye Ndaviti.

16Na ĩndĩ mũsumbĩ Ndaviti alika nthĩnĩ, na ekala mbee wa Yeova; na akũlya, Nyie nĩ ũũ, ame Yeova Ngai, na nyũmba yakwa nĩ kyaũ, ũndũ ũmbikĩtye ta vaa nĩĩ?

17Na ũndũ ũsu no ũnini methonĩ maku, ame Ngai; ĩndĩ nũneenete ũvoo wa nyũmba ya mũthũkũmi waku kũvika ĩvinda yĩ vaasa mũno yĩla yĩkoka, na wanzisya ta nĩ mũndũ wĩ kĩlionĩ kĩnene, ame Yeova Ngai.

18Ndaviti atonya ũkũtavya ũndũ ũngĩ mwaũ mbee wa ũu ũndũ wa ũtaĩo ũla weekiwe mũthũkũmi waku? Nũndũ nĩwĩsĩ mũthũkũmi waku.

19Ame Yeova, kwondũ wa mũthũkũmi waku, na kwĩanana na ngoo yaku mwene, nĩwĩkĩte ũnene ũu w’onthe, ũmanyĩthan’ye maũndũ aa onthe manene.

20Ame Yeova, vati ũngĩ ũilyĩ taku, o na vati Ngai ũngĩ ate o we, kwĩanana na w’onthe ũla twĩw’ĩte na matũ maitũ.

21Na nĩ yĩva mbaĩ ĩmwe kũũ nthĩ ĩilyĩ ta andũ maku Isilaeli, ala Ngai waendie kwĩyovoesya mwene methĩwe ũko wa andũ, wĩyonee syĩtwa nũndũ wa maũndũ manene na ma kũtĩsya, ũkĩlũngya mbaĩ syume mbee wa andũ maku, ala wamovoisye kũmaumya Misili?

22Nũndũ andũ maku Isilaeli nĩwamatw’ĩkĩthisye andũ maku mwene tene na tene; naku, Yeova, watw’ĩka Ngai woo.

23Na yu, ame Yeova, ndeto ĩla ũneenete ũndũ wa mũthũkũmi waku, na ũndũ wa nyũmba yake, nĩlũlũmĩlw’e tene na tene, na ũkĩka o tondũ ũneenete.

24Na syĩtwa yaku nĩyĩlũlũmĩlw’e na kũnenevw’a tene na tene, kũkyaw’a, Yeova wa nguthu nĩ Ngai wa Isilaeli, o Ngai kwa Isilaeli: na nyũmba ya Ndaviti mũthũkũmi waku nĩlũlũmĩlĩtw’e mbee waku.

25Nũndũ we, ame Ngai wakwa, nũmũvuanĩsye mũthũkũmi waku atĩ ũkamwakĩa nyũmba: kwondũ wa ũu mũthũkũmi waku nĩwonete ngoonĩ yake kũvoyea mbee waku.

26Na yu, ame Yeova, nue Ngai, na nũmwathĩte mũthũkũmi waku ũndũ ũũ ũseo:

27na yu nũkwendeew’a nĩ kũathima nyũmba ya mũthũkũmi waku, nĩ kana yĩkalae tene na tene ĩ mbee waku: nũndũ we, ame Yeova, nũathimĩte, na nĩathimĩkĩte tene na tene.

← Chapter 16 Jump to: Chapter 18 →