1 Chronicles 28

Kamba (Mbivilia) 1956

← Chapter 27 Jump to: Chapter 29 →

1Na Ndaviti amombanĩsya Yelusaleme anene onthe me mbee ũsumbĩnĩ ma Isilaeli, anene me mbee ũsumbĩnĩ ma i mbaĩ, na makavuteni ma nguthu ila syathũkũmaa mũsumbĩ iatĩanĩe, na makavuteni ma ngili ngili, na makavuteni ma maana, na asyaĩĩsya ma ũthwii w’onthe na syĩndũ syonthe sya mũsumbĩ na sya ana make, vamwe na anene ma nyũmbanĩ, na ngũmbaũ, o ngũmbaũ nene syonthe.

2Nĩvo ĩndĩ mũsumbĩ Ndaviti waũngamie na maũũ make, na asya, Mbĩthukĩĩsyai, ana‐a‐asa makwa, na andũ makwa: ngalĩ ĩ yakwa, kwaĩ ngoonĩ yakwa nake nyũmba ya ũthũmũo kwondũ wa ĩsandũkũ ya ũtianĩo ya Yeova, na kwondũ wa kavĩla ka nyaĩĩ ka Ngai waitũ; nakwa naĩ nĩnoomban’ya ũndũ wa mwako.

3Ĩndĩ Ngai ambĩa, Ndwĩaka nyũmba kwondũ wa syĩtwa yakwa, nĩkwĩthĩwa wĩ mũndũ wa kaũ, na nĩwĩtĩkĩtye nthakame.

4Ĩndĩ Yeova, Ngai wa Isilaeli, nĩwanyuvie nyie katĩ wa nyũmba yonthe ya asa wakwa nĩthĩwe mũsumbĩ wa Isilaeli tene na tene: nũndũ nũnyuvĩte Yuta ethĩwe mũtongoi; na nyũmbanĩ ya Yuta anyuva nyũmba ya asa wakwa; na ananĩ ma asa wakwa endeew’a ninyie andw’ĩkĩthye mũsumbĩ wa Isilaeli onthe;

5na ananĩ makwa onthe (nũndũ Yeova nũnengete ana aingĩ), nũnyuvĩte Solomoni mwana wakwa ekale kĩvĩlanĩ kya ũsumbĩ kya Yeova asumbĩke Isilaeli.

6Na ambĩa, Solomoni mwana waku, nĩwe ũkaka nyũmba yakwa na nza syakwa; nũndũ nĩnĩmũnyuvĩte ethĩwe mwana wakwa, nakwa ngeethĩwa ĩthe wake.

7Na ngalũlũmĩlya ũsumbĩ wake tene na tene, ethĩwa akeekaa na kĩthito mĩao yakwa na motw’ĩo makwa, o tondũ kũilyĩ ũmũnthĩ.

8Yu kwondũ wa ũu, Isilaeli onthe, o ũmbano wa Yeova, mene, na Ngai waitũ akĩw’a, sũvĩai na mũimantha mĩao yonthe ya Yeova Ngai wenyu; nĩ kana mũmesye nthĩ ĩno nzeo, na mwĩmĩtia yĩthĩwe ũtĩĩwa wa syana syenyu ĩtina wenyu tene na tene.

9Naku, Solomoni mwana wakwa, mũmanye Ngai wa ĩthe waku, noimũthũkũma na ngoo mbĩanĩu na kĩlĩko kya kwenda; nũndũ Yeova nũmanthaa ngoo syonthe, na nũmanyaa mosũanĩo onthe ma malilikano. Ethĩwa ũkamũmantha, akooneka nue; ĩndĩ ethĩwa ũkamũeka, akakũveta tene na tene.

10Ĩsũvĩe yu; nũndũ Yeova nũkũnyuvĩte wakĩe vala vandũ vatheu nyũmba: ĩthĩwa na vinya, na ũkĩka ũu.

11Nĩvo ĩndĩ Ndaviti wanengie Solomoni mwana wake ngelekan’yo ya valasya wa ĩkalũ, na ya nyũmba syayo, na ya kũndũ kwiawa ũthwii kwayo, na ya tũsũmba twa ĩũlũ twayo, na ya tũsũmba twa nthĩnĩ twayo, na ya vandũ va wĩkalo wa tei;

12o na ngelekan’yo ya onthe ala wanengiwe nĩ Veva, kwondũ wa nza sya nyũmba ya Yeova, na kwondũ wa tũsũmba tw’onthe tũthyũlũlũkĩte, kwondũ wa kũndũ kwiawa ũthwii wa nyũmba ya Ngaĩ, na kũla kwiawa ũthwii wa syĩndũ ivathĩtwe syĩthĩwe ntheu;

13o na kwondũ wa nguthu sya athembi na Alivai, na kwondũ wa wĩa w’onthe wa ũthũkũmi wa nyũmba ya Yeova, na kwondũ wa mĩio yonthe ya ũthũkũmi nyũmbanĩ ya Yeova;

14ya thaavu wĩ mũthime kwondũ wa mĩio ya thaavu, kwondũ wa mĩio yonthe ya kĩla mũthemba wa ũthũkũmi; ya vetha wĩ mũthime kwondũ wa mĩio yonthe ya vetha, kwondũ wa mĩio yonthe ya kĩla mũthemba wa ũthũkũmi;

15o na wĩ mũthime kwondũ wa syĩndũ sya thaavu ila syĩkĩawa mataa, na kwondũ wa mataa masyo, ma thaavu, wĩ mũthime wa kĩla kĩndũ kĩkĩawa mataa na kwondũ wa mataa makyo; na kwondũ wa syĩndũ sya vetha ila syĩkĩawa mataa, vetha wĩ mũthime kwondũ wa kĩla kĩndũ kĩkĩawa mataa na mataa makyo, kwĩanana na wĩa wa kĩla kĩndũ kĩkĩawa mataa ũndũ ũilyĩ;

16na thaavu wĩ mũthime kwondũ wa mesa sya imũtũ ila siĩawa Yeova, kwondũ wa kĩla mesa; na vetha kwondũ wa mesa sya vetha;

17na itonyi sya nyama, na masaani manene, na ikombe, sya thaavu mũtheu; na kwondũ wa mbakũli sya thaavu wĩ mũthime kwondũ wa kĩla mbakũli; na kwondũ wa mbakũli sya vetha wĩ mũthime kwondũ wa kĩla mbakũli;

18na kwondũ wa kĩthembeo kya kũtoeeasya ũvani thaavu ũtheetw’e wĩ mũthime; na thaavu kwondũ wa ngelekan’yo ya ĩkasya, o ya akeluvi, ala matambũũkĩtye nthwau syoo, na kũvw’ĩka ĩsandũkũ ya ũtianĩo ya Yeova.

19Ndaviti asya, Ũsu w’onthe nĩmanyĩthĩtw’e wĩ mũandĩke nĩ kw’oko kwa Yeova, o mawĩa onthe ma ngelekan’yo ĩno.

20Na Ndaviti amwĩa Solomoni mwana wake, Ĩthĩwa na vinya na ũkũmbaũ mũnene, na ũkĩka ũu: ndũkakĩe, o na ndũkateve; nũndũ Yeova Ngai, o Ngai wakwa, e vamwe naku; ndakakũnyivĩa, o na ndakakũtia, kũvika wĩa w’onthe ũndũ wa ũthũkũmi wa nyũmba ya Yeova wĩanĩa.

21Na, sisya, kwĩ nguthu sya athembi na Alivai, kwondũ wa ũthũkũmi w’onthe wa nyũmba ya Ngai: na kũkeethĩwa vamwe naku mũthembanĩ w’onthe wa wĩa kĩla mũndũ wĩ na ngoo ya kwenda ũla wĩ na ũtũĩka, kwondũ wa mũthemba o na wĩva wa ũthũkũmi: o na makavuteni na andũ onthe makeethĩwa mĩaonĩ yaku vyũ.

← Chapter 27 Jump to: Chapter 29 →