1 Chronicles 20

Kamba (Mbivilia) 1956

← Chapter 19 Jump to: Chapter 21 →

1Na kweethĩwa, ĩvinda ya mwaka ũkyambĩlĩlya, ĩvinda yĩla asumbĩ maendaa kaũnĩ, Yoavu atongoesya ita, na aananga nthĩ ya ana ma Amimoni, na ooka athyũlũlũka Lava amĩtw’ĩkanĩsye. Ĩndĩ Ndaviti ekala Yelusaleme. Na Yoavu akũna Lava, na amĩng’uthũlangya.

2Na Ndaviti aumya ngovia ya ũsumbĩ mũsumbĩ woo mũtwe kwake, na eethĩa ũito wayo nĩ talendi ya thaavu, na kwaĩ tũvila twĩ thooa mũnene nthĩnĩ wayo; na yeekĩwa mũtwe wa Ndaviti: na aumaalya mũtavo wa ĩ ndũa, mwingĩ mũno.

3Na aumaalya andũ ala maĩ nthĩnĩ wayo, na amatilanga na mang’weli, na syĩndũ mbũĩ sya iaa sya kũvukũlya mavali, na mathoka. Na Ndaviti asyĩka ndũa syonthe sya ana ma Amimoni ũu. Na Ndaviti na andũ onthe masyoka Yelusaleme.

4Na kweethĩwa ĩtina wa ũu, kwookĩla kaũ na Avilisiti ku Ngeseli; nĩvo ĩndĩ Sivekai Mũusathi wamũaie Sivai, wa ana ma yĩla ĩmũndũ: nao makĩlw’a vinya.

5Na kwaĩ kaũ ĩngĩ na Avilisiti; na Elianani mwana wa Yaili amũaa Lami mwanaa‐ĩthe wa Ngoliathu Mũngiti, ũla mũtĩ wa ĩtumo yake wailyĩ ta mũamba wa mũtumi wa ngũa.

6Na kwaĩ kaũ ĩngĩ Ngathi, vala vaĩ mũndũ mũasa mũno, ũla syaa syake sya moko na sya maũũ syaĩ mĩongo ĩlĩ na inya, thanthatũ kĩla kw’oko na thanthatũ kĩla kũũ; nake asyaiwe nĩ yĩla ĩmũndũ.

7Na yĩla wavũthisye Isilaeli, Yonathani mwana wa Simea, mwana‐a‐inyia wa Ndaviti, amũaa.

8Asu masyaĩwe nĩ yĩla ĩmũndũ ku Ngathi; na mavalũkw’a nĩ kw’oko kwa Ndaviti, na moko ma athũkũmi make.

← Chapter 19 Jump to: Chapter 21 →