1 Chronicles 15

Kamba (Mbivilia) 1956

← Chapter 14 Jump to: Chapter 16 →

1Na Ndaviti eeyakĩa nyũmba ndũanĩ ya Ndaviti; na aseũvya vandũ va ĩsandũkũ ya Ngai, na ayambĩa ĩeema.

2Na ĩndĩ Ndaviti asya, Vati mũndũ o na wĩva waĩle kũkua ĩsandũkũ ya Ngai ate o Alivai: nũndũ nĩmo Yeova ũmanyuvĩte makuae ĩsandũkũ ya Ngai, na mamũthũkũmae tene na tene.

3Na Ndaviti oomban’ya Isilaeli onthe ku Yelusaleme, nĩ kana maete ĩsandũkũ ya Yeova vandũ vayo, vala waseũvĩtye kwondũ wayo.

4Na Ndaviti amomban’ya ana ma Aluni, na Alivai:

5ma ana ma Koathi, mũnene Ulieli, na ana‐a‐ĩthe make ĩana na mĩongo ĩlĩ;

6na ma ana ma Melali, mũnene Asaia, na ana‐a‐ĩthe make maana elĩ na mĩongo ĩlĩ;

7na ma ana ma Ngelisoni, mũnene Yoeli, na ana‐a‐ĩthe make ĩana na mĩongo ĩtatũ;

8na ma ana ma Elisavani, mũnene Semaia, na ana‐a‐ĩthe make maana elĩ;

9na ma ana ma Eviloni, mũnene Elieli, na ana‐a‐ĩthe make mĩongo nyanya;

10na ma ana ma Usieli, mũnene Aminatavu, na ana‐a‐ĩthe make ĩana na ĩkũmi na elĩ.

11Na Ndaviti ameta athembi Nzatoki, na Aviathali, na Alivai, Ulieli, na Asaia, na Yoeli, na Semaia, na Elieli, na Aminatavu,

12na amea, Inyw’ĩ mwĩ atongoi ma nyũmba sya aaĩthe sya Alivai: ĩvathan’yei mwĩthĩwe atheu, inyw’ĩ o na ana‐a‐ĩthe menyu, nĩ kana mũete ĩsandũkũ ya Yeova, Ngai wa Isilaeli, vandũ vala nĩseũvĩtye kwondũ wayo.

13Kwondũ wa kwĩthĩwa mũtyaayĩkua mbee, Yeova Ngai waitũ nĩwatũkũnie ĩkũna, nũndũ tũtyaamũmantha kwĩanana na ũtw’ĩo.

14Kwondũ wa ũu athembi na Alivai meevathan’ya methĩwe atheu nĩ kana mambatye isandũkũ ya Yeova, Ngai wa Isilaeli.

15Na ana ma Alivai makua ĩsandũkũ ya Ngai ituonĩ syoo na mĩtĩ yayo, o tondũ Mose weaĩte kwĩanana na ndeto ya Yeova.

16Na Ndaviti aneena na mũnene wa Alivai aie aini ana‐a‐ĩthe moo, me na syĩndũ sya kũinga, inanda, na mbeve, na tũmasaya, makĩinga na kũkĩlya wasya na ũtanu.

17Kwondũ wa ũu Alivai maia Emani mwana wa Yoeli; na ma ana‐a‐ĩthe make, Asavu mwana wa Mbelekia; na ma ana ma Melali ana‐a‐ĩthe moo. Ethani mwana wa Kusaia;

18na vamwe nao ana‐a‐ĩthe moo ma kĩanda kya kelĩ, Nzekalia, na Mbeni, na Yaasieli, na Semilamothi, na Yeiieli, na Uni, na Eliavu, na Mbenaia, na Maaseia, na Matithia, na Eliveleu, na Mikineia, na Oveti‐etomu, na Yeieli, asũvĩi ma mĩomonĩ.

19Na ĩndĩ aini, Emani, na Asavu, na Ethani, maiwa, me na tũmasaya twa ũthuku twa kũkayĩthw’a wasya mũnene;

20na Nzekalia, na Asieli, na Semilamothi, na Yeiieli, na Uni, na Eliavu, na Maaseia, na Mbenaia, me na inanda sinaa na mawasya ma eĩtu;

21na Matithia, na Elieveleu, na Mikineia, na Oveti‐etomu, na Yeieli, na Asasia, me na nbeve sinaa na mawasya ma ĩtheo, matongoeasye.

22Na Kenania, mũnene wa Alivai, aĩ mwinĩthya: nĩwamanyĩasya kwina, nũndũ aĩ na ũĩ.

23Na Mbelekia na Elikana maĩ asũvĩi ma mĩomonĩ kwondũ wa yĩla ĩsandũkũ.

24Na athembi Sevania, na Yosavati, na Nethaneli, na Amasai, na Nzekalia, na Mbenaia, na Elieseli, mavuvĩaa masoo vu mbee wa ĩsandũkũ ya Ngai; na Oveti‐etomu na Yeia maĩ asũvĩi ma mĩomonĩ kwondũ wa yĩla ĩsandũkũ.

25Na ĩndĩ Ndaviti, na atumĩa ma Isilaeli, na makavuteni ma ngili ngili, maenda mambatye ĩsandũkũ ya ũtianĩo ya Yeova kũyumya nyũmbanĩ ya Oveti‐etomu me na ũtanu.

26Na kweethĩwa, yĩla Ngai watethisye Alivai ala makuĩte ĩsandũkũ ya ũtianĩo ya Yeova, mathemba tũsalũ twa mũew’a mũonza na ndũũme mũonza.

27Na Ndaviti nake eekĩĩte ngũa ndasa ya katane nzeo, na Alivai onthe ala makuĩte yĩla ĩsandũkũ, na aini, na Kenania mũnene wa wini vamwe na aini: na Ndaviti eekĩĩte evoti ya katane.

28Ũu nĩw’o Isilaeli onthe maetie ĩsandũkũ ya ũtianĩo ya Yeova makyũkĩlya mawasya manene, vamwe na wasya wa soo mũkelemu, na masoo, na tũmasaya, ikĩamba mũno vamwe na inanda na mbeve.

29Na kweethĩwa, yĩla ĩsandũkũ ya ũtianĩo ya Yeova yalikile ndũanĩ ya Ndaviti, Mikali mwĩĩtu wa Saulo asyaĩlya mbũthinĩ, na oona mũsumbĩ Ndaviti akĩsũnga na kũtana mũno; na amũvũthya ngoonĩ yake.

← Chapter 14 Jump to: Chapter 16 →