1 Chronicles 5

Kamba (Mbivilia) 1956

← Chapter 4 Jump to: Chapter 6 →

1Na ana ma Leuveni ĩkithathi ya Isilaeli (nũndũ aĩ ĩkithathi; ĩndĩ, nĩkwĩthĩwa nĩwathũkisye ũkomo wa ĩthe wake, ũkithathi wake wanengiwe ana ma Yosevu mwana wa Isilaeli; na ũsyaanĩo ti wa kũtalwa kũatĩĩa ũkithathi.

2Nũndũ Yuta nĩwakĩlilye ana‐a‐ĩthe vinya, na ũla mũnene wĩ mbee ũsumbĩnĩ aumie kwake; ĩndĩ ũkithathi waĩ wa Yosevu),

3ana ma Leuveni ĩkithathi ya Isilaeli: Anoki, na Valu, na Esiloni, na Kalimi.

4Ana ma Yoeli: Semaia mwana wake, na Ngoki mwana wake, na Simei mwana wake,

5na Mika mwana wake, na Leaia mwana wake, na Mbaali mwana wake,

6na Mbeela mwana wake, ũla Tilikathivilineseli mũsumbi wa Asuli wamũtwaie e mũtave: nake aĩ mũnene wa Aleuveni.

7Na ana‐a‐ĩthe make kũatĩĩa mĩvĩa yoo, yĩla mosyaanĩo ma nzyawa syoo matalilwe: mũnene aĩ Yeieli Nzekalia,

8na Mbela mwana wa Asasi, mwana wa Sema, mwana wa Yoeli, ũla watwĩe Aloeli, o kũvika Nevo na Mbaali‐meoni:

9na atũaa ngalĩ ya wumĩlonĩ wa syũa o kũvika vandũ va ũlikĩla weũnĩ kuma ũsĩnĩ wa Euvalati, nĩkwĩthĩwa indo syoo nĩsyaingĩvie nthĩ ya Ngileati.

10Na mĩthenya ya Saulo, makwatya kaũ na Aakali, nao nĩmooaiwe na moko moo; na nimatũaa maeemanĩ moo nthĩ yonthe ngalĩ ya wumĩlonĩ wa syũa ya Ngileati.

11Na ana ma Ngati nĩmatũaa mamelekele, nthĩ ya Mbasani kũvika Saleka:

12mũnene Yoeli, na wa kelĩ Savamu, na Yanai, na Savati ku Mbasani.

13Na ana‐a‐ĩthe moo ma nyũmba sya aaĩthe moo: nĩ Mikaeli, na Mesulamu, na Sieva, na Yolai, na Yakani, na Nzia, na Eeveli, asu mũonza.

14Asu nĩ ana ma Aviaili, mwana wa Uuli, mwana wa Yaloa, mwana wa Ngileati, mwana wa Mikaeli, mwana wa Yeisai, mwana wa Yato, mwana wa Mbusi;

15Aai mwana wa Avitieli, mwana wa Nguni, mũnene wa nyũmba sya aaĩthe moo.

16Na nĩmatũaa Ngileati ku Mbasani, na tũtũla twayo, na syengonĩ syonthe sya Saloni, kũvika mĩvaka yoo.

17Asu onthe matalawa kũatĩĩa mosyaanĩo mĩthenya ya Yothamu mũsumbĩ wa Yuta, na mĩthenya ya Yelovoamu mũsumbĩ wa Isilaeli.

18Ana ma Leuveni, na Angati, na nyunzu ya mbaĩ ya Manase, andũ ngũmbaũ, andũ ala maĩ matonya kũkua kakalo na ũvyũ, na kũatha na ũta, na meemanyĩĩtye kũkita, maĩ ngili mĩongo ĩna na inya na maana mũonza na mĩongo thanthatũ, ala maĩ matonya kũthi kaũnĩ.

19Na makwatya kaũ na Aakali, na Yetuli, na Navisi, na Notavu.

20Na nĩmatethiw’e makyũkita nao, na Aakali manenganwa mokonĩ moo, na onthe ala maĩ nao; nũndũ nĩmamwĩkaĩlile Ngai kaũnĩ, nake amethukĩĩsya kũkaya kwoo, nikwithĩwa nĩmamũĩkĩĩie.

21Na matava indo syoo; ngamĩle syoo ngili mĩongo ĩtano, na malondu ngili maana elĩ na mĩongo ĩtano, na mang’oi ngili ilĩ, na andũ ngili ĩana.

22Nũndũ nĩkwavalũkile aingĩ moaĩtwe, nũndũ ũ kaũ waĩ wa Ngai. Na matũa kũndũ kwa asu kũvika yĩla mesie kũtwawa me atave.

23Na ana ma nyunzu ya mbaĩ ya Manase matwĩe ĩ nthĩ: mongeleka kuma Mbasani kũvika Mbaali‐elimoni na Senili na kĩĩma kya Elimoni.

24Na aa maĩ atongoi ma nyũmba sya aaĩthe moo: o Evieli, na Isi, na Elieli, na Anzilieli, na Yelemia, na Otavia, na Yatieli, ngũmbaũ nene, andũ me nguma, atongoi ma nyũmba sya aaĩthe moo.

25Na mamũvĩtanĩsya Ngaĩ wa aaĩthe moo, na meeka ũmalwaya makĩatĩĩa ngai sya ngo sya andũ ma ĩ nthĩ, ila Ngai waanangie mbee woo.

26Na Ngai wa Isilaeli aamũkya veva wa Vulu mũsumbĩ wa Asuli, na veva wa Tilikathivilineseli mũsumbĩ wa Asuli, na amatwaa me atave, o Aleuveni, na Angati, na nyunzu ya mbaĩ ya Manase, na amavikya Aalaa, na Avoli, na Aala, na ũsĩ wa Ngosani, kũvika ũmũnthĩ.

← Chapter 4 Jump to: Chapter 6 →