1 Chronicles 27

Kamba (Mbivilia) 1956

← Chapter 26 Jump to: Chapter 28 →

1Na ĩndĩ ana ma Isilaeli kũatĩĩa ũtalo woo, naw’o nĩ atongoi ma nyũmba sya aaĩthe na makavuteni ma ngili ngili na ma maana, na anene ma kwoo ala mathũkũmaa mũsumbĩ, ũndũnĩ o na wĩva wa nguthu ila syalikaa na ikyumaala mwei na mwei, myeinĩ yonthe ya mwaka‐ma kĩla nguthu maĩ ngili mĩongo ĩlĩ na inya.

2Kavuteni wa nguthu ya mbee mwei wa mbee aĩ Yasoveamu mwana wa Nzavitieli: na nguthunĩ yake kwaĩ andũ ngili mĩongo ĩlĩ na inya.

3Nake aĩ wa ana ma Velesi, mũnene wa makavuteni onthe ma nguthu sya mwei wa mbee.

4Na kavuteni wa nguthu ya mwei wa kelĩ aĩ Ndotai Mũaoi, na nguthu yake; na Mikilothi mũsumbĩki; na nguthunĩ yake kwaĩ ngili mĩongo ĩlĩ na inya.

5Kavuteni wa katatũ wa nguthu ya mwei wa katatũ aĩ Mbenaia, mwana wa mũthembi Yeoiata, mũnene: na nguthunĩ yake kwaĩ ngili mĩongo ĩlĩ na inya.

6Usu nĩ Mbenaia ũsu, ũla waĩ ngũmbaũ katĩ wa ala mĩongo ĩtatũ, na ĩũlũ wa ala mĩongo ĩtatũ: na Amisavati mwana wake aĩ wa nguthu yake.

7Kavuteni wa kana wa mwei wa kana aĩ Asaeli mwana‐a‐inyia wa Yoavu, na Nzevatia mwana wake ĩtina wake: na nguthunĩ yake kwaĩ ngili mĩongo ĩlĩ na inya.

8Kavuteni wa katano wa mwei wa katano aĩ Samuthi Mũisilai: na nguthunĩ yake kwaĩ ngili mĩongo ĩlĩ na inya.

9Kavuteni wa thanthatũ wa mwei wa thanthatũ aĩ Ila mwana wa Ikesi Mũtekoa: na nguthunĩ yake kwaĩ ngili mĩongo ĩlĩ na inya.

10Kavuteni wa mũonza wa mwei wa mũonza aĩ Elesu Mũveloni, wa ana ma Evalaimu: na nguthunĩ yake kwaĩ ngili mĩongo ĩlĩ na inya.

11Kavuteni wa nyanya wa mwei wa nyanya aĩ Sivekai Mũusathi, wa Anzela: na nguthunĩ yake kwaĩ ngili mĩongo ĩlĩ na inya.

12Kavuteni wa kenda wa mwei wa kenda aĩ Avieseli Mũanathothi, wa Ambenyamini: na nguthunĩ yake kwaĩ ngili mĩongo ĩlĩ na inya.

13Kavuteni wa ĩkũmi wa mwei wa ĩkũmi aĩ Maalai Mũnetovathi, wa Anzela: na nguthunĩ yake kwaĩ ngili mĩongo ĩlĩ na inya.

14Kavuteni wa ĩkũmi na ũmwe wa mwei wa ĩkũmi na ũmwe aĩ Mbenaia Mũvilathoni, wa ana ma Evalaimu: na nguthunĩ yake kwaĩ ngili mĩongo ĩlĩ na inya.

15Kavuteni wa ĩkũmi na elĩ wa mwei wa ĩkũmi na ĩlĩ aĩ Elitai Mũnetovathi, wa Othinieli: na nguthunĩ yake kwaĩ ngili mĩongo ĩlĩ na inya.

16Na ĩngĩ ĩũlũ wa mbaĩ sya Isilaeli: wa Aleuveni kwaĩ Elieseli mwana wa mũsumbĩki Nzikili: wa Asimeoni, Sevatia mwana wa Maaka:

17wa Livai, Asavia mwana wa Kemueli: wa Aluni, Nzatoki:

18wa Yuta, Eliu, ũmwe wa ana‐a‐inyia ma Ndaviti: wa Isakali, Omili mwana wa Mikaeli:

19wa Nzevuluni, Isimaia mwana wa Ovatia: wa Navitali, Yelemothi mwana wa Anzilieli:

20wa ana ma Evalaimu, Osea mwana wa Asasia: wa nyunzu ya mbaĩ ya Manase, Yoeli mwana wa Vetaia:

21wa nyunzu ya mbaĩ ya Manase ku Ngileati, Ito mwana wa Nzekalia: wa Mbenyamini, Yasieli mwana wa Avineli:

22wa Ndani, Asaleeli mwana wa Yeloamu. Asu maĩ makavuteni ma mbaĩ sya Isilaeli.

23Ĩndĩ Ndaviti ndaamatala ala mavikĩtye myaka mĩongo ĩlĩ na ĩtina wa vau, nũndũ Yeova aĩ ananeena akaingĩvya Isilaeli ta ndata sya ĩtunĩ.

24Yoavu mwana wa Nzeluia ambĩlĩlya kũtala, ĩndĩ ndaamina; na kwondũ wa ũndũ ũsu ũthilĩku wamokĩe Isilaeli; o na ũtalo ndwaaĩkĩwa ũvoonĩ ũla waandĩkiwe maũndũnĩ ma mavinda ma mũsumbĩ Ndaviti.

25Na Asemavethi mwana wa Atieli aĩ mũsũvĩi wa mothwii maie ma mũsumbĩ: na Yonathani mwana wa Usia aĩ mũsũvĩi wa mothwii maie mĩũndanĩ, na ndũanĩ, na mĩsyĩ, na nyũmbanĩ nene syĩ iemo:

26na Esili mwana wa Keluvu aĩ mũsyaĩĩsya wa ala matethasya wĩa wa kũĩma mũũndanĩ:

27na Simei Mũlamathi aĩ mũsyaĩĩsya wa mĩũnda ya mĩsavivũ: na Nzaveti Mũsivimi aĩ mũsyaĩĩsya wa wingĩ wa ũsyao wa mĩũnda ya mĩsavivũ akĩkĩaa matungulunĩ ma kwia mbinyu:

28na Mbaali‐aanani Mũngeteli aĩ mũsyaĩĩsya wa mĩthata na mĩkũyũ ĩla yaĩ nthĩ ndindimalu: na Yoasi aĩ mũsyaĩĩsya wa matungulu ma kwia mauta:

29na Sitilai Mũsaloni aĩ mũsyaĩĩsya wa ndĩthya sya ng’ombe ila syaĩthaw’a ku Saloni: na Savati mwana wa Atilai aĩ mũsyaĩĩsya wa ndĩthya sya ng’ombe ila syaĩ myandanĩ:

30na Ovili Mũisumaeli aĩ mũsyaĩĩsya wa ngamĩle: na Yeteia Mũmelonothi aĩ mũsyaĩĩsya wa mang’oi: na Yasisi Mũakali aĩ mũsyaĩĩsya wa ndĩthya sya mbũi na malondu.

31Asu onthe maĩ asyaĩĩsya ma syĩndũ sya mũsumbĩ Ndaviti.

32O na Yonathani, mwendw’a‐ĩthe wa Ndaviti, aĩ mũtai, mũndũ wĩ ũmanyi, na mũandĩki: Yeiieli mwana wa Akimoni aĩ vamwe na ana ma mũsumbĩ:

33na Aithoveli aĩ mũtai wa mũsumbĩ: na Usiai Mũaliiki aĩ mũnyanyae wa mũsumbĩ:

34na ĩtina wa Aithoveli kwaĩ Yeoiata mwana wa Mbenaia, na Aviathali: na Yoavu aĩ kavuteni wa nguthu ya mũsumbĩ.

← Chapter 26 Jump to: Chapter 28 →