1 Chronicles 22

Kamba (Mbivilia) 1956

← Chapter 21 Jump to: Chapter 23 →

1Nĩvo ĩndĩ Ndaviti waisye, Ĩno nĩyo nyũmba ya Yeova Ngai, na kĩĩ nĩkyo kĩthembeo kya nthembo ya kũvĩvw’a kwondũ wa Isilaeli.

2Na Ndaviti eeaa kana ekali ma ũeninĩ ala me nthĩ ya Isilaeli mombanw’e; na aia aki ma mavia masũvye mavia ma kwaka nyũmba ya Ngai.

3Na Ndaviti oomban’ya iaa mbingĩ mũno kwondũ wa mĩsumaa ya mĩomo ya i mbingĩlo, na kwondũ wa ikolethyo; na ũthuku mwingĩ mũno ũtathimĩka;

4na mĩtĩ ya mĩkũũ ĩtatalĩka: nũndũ Asitoni na ala ma Tile nĩmamũetee Ndaviti mĩtĩ mingĩ mũno ya mĩkũũ.

5Na Ndaviti asya, Solomoni mwana wakwa nĩ mũnini na mwololo, na nyũmba ĩla ĩkakĩwa Yeova mũvaka yĩthĩwe nzeo mũno, mũno, yĩ nguma na ya kũtaĩwa nthĩ syonthe: kwondũ wa ũu ngoomban’ya syĩndũ kwondũ wayo. Na ĩndĩ Ndaviti oomban’ya syĩndũ mbingĩ mũno atanakw’a.

6Na ĩndĩ amwĩta Solomoni mwana wake, na amwĩaĩa akĩe Yeova, Ngai wa Isilaeli, nyũmba.

7Na Ndaviti amwĩa Solomoni mwana wake, Ngalĩ ĩ yakwa, nasũanĩaa ngoonĩ yakwa kwaka nyũmba kwondũ wa syĩtwa ya Yeova Ngai wakwa.

8Ĩndĩ ndeto ya Yeova yambũkĩa, ĩkĩmbĩa, Nĩwĩtĩkĩtye nthakame nyingĩ mũno, na nĩwokitĩte makaũ manene: ndwĩaka nyũmba kwondũ wa syĩtwa yakwa, nũndũ nĩwĩtĩkĩtye nthakame nyingĩ ĩũlũ wa nthĩ metho makwa mene.

9Sisya, ũkasyaa mwana, ũla ũkethĩwa mũndũ wa ũthũmũo; na ngamũnenga kũthũmũa kuma amaithanĩ make onthe ala mamũthyũlũlũkĩte; nũndũ syĩtwa yake yĩkeethĩwa Solomoni, na nganenga Isilaeli mũuo na ũthũmũo mĩthenyanĩ yake.

10Akaaka nyũmba kwondũ wa syĩtwa yakwa; na akeethĩwa mwana wakwa, nakwa ngeethĩwa ĩthe wake; na ngalũlũmĩlya kĩvĩla kya ũsumbĩ kya ũsumbĩ wake kwa Isilaeli tene na tene.

11Na yu, mwana wakwa, Yeova ethĩwe naku; naku athimĩka, nokyaka nyũmba ya Yeova Ngai waku, o tondũ ũneenete ũndũ waku.

12Ĩndĩ Yeova nakũnenge kĩlĩko na ũmanyi, na akũnenge wĩai ũndu wa Isilaeli; nĩ kana ũkwate mĩao ya Yeova Ngai waku.

13Nĩvo ĩndĩ wĩathimĩka, ethĩwa ũkasũvĩaa kwĩka myamũlo na motw’ĩo ala Yeova wamwĩaĩe Mose ũndũ wa Isilaeli: ĩthĩwa na vinya na ũkũmbaũ mũnene; ndũkakĩe o na ndũkateve.

14Na ĩndĩ, sisya, thĩnanĩ wakwa nĩnũmbanĩtye kwondũ wa nyũmba ya Yeova talendi ngili ĩana sya thaavu, na talendi ngili kũndũ ngili sya vetha, na sya ũthuku na iaa itathimĩka; nũndũ nĩ mbingĩ mũno: o na nĩnũmbanĩtye mĩtĩ na mavia; na nũtonya kwongeleela.

15Na ĩngĩ kwĩ athũkũmi aingĩ mũno vamwe naku, ma kwasũvya na ma kũtethya wĩa wa mavia na mĩtĩ, na andũ onthe ndũĩka kĩla mũthembanĩ wa wĩa:

16thaavu, na vetha, na ũthuku, na kĩaa, ititalĩka. Ukĩla noitethya, na Yeova nĩethĩwe vamwe naku.

17O na Ndaviti eeaĩa anene onthe me mbee ũsumbĩnĩ ma Isilaeli mamũtetheesye Solomoni mwana wake, akĩmakũlya,

18Yeova Ngai wenyu nde vamwe nenyu? Na ndamũnengete ũthũmũo kĩla ngalĩko? Nũndũ nũnenganĩte ala matwĩe ĩ nthĩ kw’okonĩ kwakwa; nayo nthĩ nĩkĩlĩtw’e vinya nĩ Yeova, na andũ make.

19Yu ĩndĩ lũlũmĩlyai ngoo yenyu na thayũ wenyu mũmanthe Yeova Ngai wenyu; ũkĩlai ĩndĩ, na mũkyaka vala vandũ vatheu va Yeova Ngai, nĩ kana mũete ĩsandũkũ ya ũtianĩo ya Yeova, na mĩio mĩtheu ya Ngai, nyũmbanĩ ĩla yĩakĩwa syĩtwa ya Yeova.

← Chapter 21 Jump to: Chapter 23 →