1 Chronicles 13

Kamba (Mbivilia) 1956

← Chapter 12 Jump to: Chapter 14 →

1Na Ndaviti asũanĩa na makavuteni ma ngili ngili na ma maana, o kĩla mũtongoi.

2Na Ndaviti atavya ũmbano w’onthe wa Isilaeli, Ethĩwa inyw’ĩ nĩmũkwona nĩ ũseo, na ethĩwa ũũ nĩ wa Yeova Ngai waitũ, nĩtũtũmane kĩla vandũ kwa ana‐a‐ĩthe maitũ ala matiĩtwe nthĩ yonthe ya Isilaeli, ala athembi na Alivai me vamwe nao ndũanĩ syoo ila syĩ na syengo, nĩ kana matonye kũmbana vaa tũĩ;

3na nĩtũete ĩngĩ ĩsandũkũ ya Ngai waitũ vaa tũĩ: nũndũ tũtyaayĩkũlya mĩthenyanĩ ya Saulo.

4Na ũmbano w’onthe wasya ũkeeka ũu; nũndũ ũndũ ũsu andũ onthe moonie nĩ ũseo.

5Kwondũ wa ũu Ndaviti oomban’ya Isilaeli onthe, kuma Sioli kalũsĩ ka Misili o kũvika ũlikĩlo wa Amathi, maete ĩsandũkũ ya Ngai kũyumya Kiliathi‐yealimu.

6Na Ndaviti ambata, e na Isilaeli onthe, mathi Mbaala, nayo nĩ Kiliathi‐yealimu, ĩla yaĩ ya Yuta, maete kũyumya kw’o ĩsandũkũ ya Ngai Yeova ũla wĩkalaa ĩũlũ wa akeluvi, yĩla yĩtanĩaw’a na yĩla Syitwa.

7Na makua ĩsandũkũ ya Ngai na ĩkasya yeũ, na mayumya nyũmbanĩ ya Avinatavu; na Usa na Aio mainga yĩla ĩkasya.

8Na Ndaviti na Isilaeli onthe matanĩa mũno mbee wa Ngai na vinya woo w’onthe, vamwe na mbathi, na mbeve, na inanda, na tũthembe, na tũmasaya, na masoo.

9Na yĩla mavikie kĩvũĩonĩ kya Kitoni, Usa atambũũkya kw’oko kwake atw’ĩĩke ĩsandũkũ; nũmdũ ng’ombe nĩsyatiũũkie.

10Na ũthatu wa Yeova wakanĩa Usa, na amũkũna, nũndũ nĩwatambũũkĩsye yĩla ĩsandũkũ kw’oko kwake; na akw’ĩa vo mbee wa Ngai.

11Na Ndaviti eew’a woo, nũndũ Yeova nĩwamũkũna Usa: na eeta vandũ vau Velesi‐usa, kũvika ũmũnthĩ.

12Na Ndaviti akĩa Ngai mũthenya ũsu, akyasya, Ngenũkya ĩsandũkũ ya Ngai kwakwa ata?

13Kwondũ wa ũu Ndaviti ndaathamĩsya ĩsandũkũ kwake ndũanĩ ya Ndaviti, ĩndĩ ayelelũkĩĩlya nyũmbanĩ ya Oveti‐etomu Mũngiti.

14Na ĩsandũkũ ya Ngai yekala na mũvĩa wa Oveti‐etomu nyũmbanĩ yake myei ĩtatũ: na Yeova aathima nyũmba ya Oveti‐etomu, na kyonthe kĩla waĩ nakyo.

← Chapter 12 Jump to: Chapter 14 →