1 Chronicles 29

Kamba (Mbivilia) 1956

← Chapter 28 Jump to:

1Na mũsumbĩ Ndaviti eea ũmbano w’onthe atĩĩ, Solomoni mwana wakwa, ũla e weka Ngai ũmũnyuvĩte, nĩ mũnini na mwololo, na wĩa nĩ mũnene; nũndũ ĩ nyũmba nene mbanakavye ti kwondũ wa mũndũ, ĩndĩ kwondũ wa Yeova Ngai.

2Na ĩndĩ nĩnzeũvĩtye na vinya wakwa w’onthe kwondũ wa nyũmba ya Ngai wakwa thaavu kwondũ wa syĩndũ sya thaavu, na vetha kwondũ wa syĩndũ sya vetha, na ũthuku kwondũ wa syĩndũ sya ũthuku, na kĩaa kwondũ wa syĩndũ sya iaa, na mĩtĩ kwondũ wa syĩndũ sya mĩtĩ; tũvila twa nzumalati, na tũvila twa kũlũmanĩthw’a iĩndĩnĩ syatw’o, tũvila twa kũthũĩĩwa, na twa langi wa mĩthemba mingĩ, na mĩthemba yonthe ya tũvila twĩ thooa mũnene, na mavia maseo maingĩ mũno.

3O na ĩngĩ, nũndũ nĩniĩte wendo wakwa mũnene nyũmbanĩ ya Ngai wakwa, na nũndũ nĩ na ũthwii mwie wakwa mwene wa thaavu na vetha, nĩngũnengane kwondũ wa nyũmba ya Ngai wakwa, kũthonoka kyonthe kĩla nũmbanĩtye kwondũ wa nyũmba ntheu,

4o talendi ngili itatũ sya thaavu, sya thaavu wa Ovilu, na talendi ngili mũonza sya vetha ũla ũtheetw’e, wa kũvw’ĩka mawako ma nyũmba;

5wa thaavu kwondũ wa syĩndũ sya thaavu, na vetha kwondũ wa syĩndũ sya vetha, na kwondũ wa mĩthemba yonthe ya wĩa ũla ũkaseũvw’a nĩ moko ma ndũĩka. Nũũ ĩndĩ ũla ũnũkwĩnengane na ngoo ya kwenda evathan’ye ũmũnthĩ ethĩwe mũtheu kwa Yeova?

6Nĩvo ĩndĩ anene ma nyũmba sya aaĩthe, na anene me mbee ũsumbĩnĩ ma mbaĩ sya Isilaeli, na makavuteni ma ngili ngili na ma maana, vamwe na asyaĩĩsya ma wĩa wa mũsumbĩ, manengane na ngoo ya kwenda;

7na manengane kwondũ wa ũthũkũmi wa nyũmba ya Ngai talendi ngili itano na ilungu ngili ĩkũmi sya thaavu, na sya vetha talendi ngili ĩkũmi, na sya ũthuku talendi ngili ĩkũmi na nyanya, na sya kĩaa talendi ngili ĩana.

8Na ala moonekie me na tũvila twĩ thooa mũnene matũnengane na maia vala ve ũthwii mwie wa nyũmba ya Yeova, twĩ ũsũvĩonĩ wa Yeiieli Mũngelisoni.

9Nĩvo ĩndĩ andũ matanie, nũndũ nĩmanenganie na kwenda kwa ngoo, nũndũ nĩmamumĩsye Yeova makyenda na ngoo mbĩanĩu; o na mũsumbĩ Ndaviti atana ũtanu mũnene.

10Kwondũ wa ũu Ndaviti amũtaĩĩa Yeova mbee wa ũmbano w’onthe; na Ndaviti asya, Ũtaĩwe, ame Yeova, Ngai wa Isilaeli ĩthe waitũ, tene na tene.

11Ame Yeova, ũnene, na vinya, na ndaĩa, na ũkĩlyo, na ũsumbĩ, nĩ waku: nũndũ kyonthe kĩla kĩ matunĩ na kũũ nthĩ nĩ kyaku; ũsumbĩ nĩ waku, ame Yeova, naku nũnenevetw’e wĩthĩwe mũnene wa kyonthe.

12Ũthwii o na ndaĩa syumaa kwaku, naku nũsumbĩkaa ĩũlũ wa syonthe; na kw’okonĩ kwaku kwĩ vinya na ũtonyi; na kw’okonĩ kwaku kwĩ kũnenevya na kũmanenga onthe vinya.

13Yu kwondũ wa ũu, Ngai waitũ, nĩtũũkũtũngĩa mũvea, na nĩtũũtaĩa syĩtwa yaku ĩtheu.

14Ĩndĩ nyie nĩ ũũ, na andũ makwa nĩ kĩndũ kyaũ, ũndũ tũtonya kũnengane na ngoo ya kwenda o tondũ twĩkaa? Nũndũ syĩndũ syonthe syumaa kwaku, na kuma syĩndũnĩ syaku mwene nĩtũkũnengete.

15Nũndũ twĩ aeni na ekali ma ũeninĩ ũtwene, o tondũ aaĩthe maĩtũ onthe meethĩawa: mĩthenya yaitũ kũũ nthĩ nĩ ta kyuu, na vati va kwĩkalaa.

16Ame Yeova Ngai waitũ, syĩndũ ii syonthe mbie tũmbanĩtye tũkwakĩe nyũmba kwondũ wa syĩtwa yaku ĩtheu syumĩte kw’okonĩ kwaku, nasyo nĩ syaku mwene.

17O na nĩnĩsĩ, Ngai wakwa, nũtataa ngoo, na nũtanĩaa ũlũngalu. Ngalĩ ĩ yakwa, ũlũngalunĩ wa ngoo yakwa nĩnumĩtye syĩndũ ii syonthe na kwenda kwa ngoo: na yu nĩnonete na ũtanu andũ maku, ala me vaa, makĩnengane na ngoo ya kwenda.

18Ame Yeova, Ngai wa Avalaamu, na wa Isaka, na wa Isilaeli, aaĩthe maitũ, lũlũmĩlya ũndũ ũũ tene na tene kĩsũanĩonĩ kya malilikano ma ngoo sya andũ maku, na seũvya ngoo syoo kwaku;

19na nenga Solomoni mwana wakwa ngoo mbĩanĩu, asũvĩe mĩao yaku, na mokũsĩ maku, na myamũlo yaku, na eke maũndũ aa onthe, na kwaka nyũmba nene mbanakavye, ĩla niĩte syĩndũ kwondũ wayo.

20Na Ndaviti awĩa ũmbano w’onthe, Yu taĩai Yeova Ngai wenyu. Na ũmbano w’onthe wamũtaĩa Yeova, Ngai wa aaĩthe moo, na makunamya mĩtwe yoo, na mamũthaitha Yeova, na mũsumbĩ.

21Na mamũthembea Yeova nthembo sya kũtonywa, na mamũthembea Yeova nthembo sya kũvĩvw’a, ũnĩ ũsu, o tũsalũ twa mũew’a ngili, na ndũũme ngili, na tũtena twa malondu ngili, vamwe na nthembo sya kũnyuwa sya kũthembanĩsya nasyo, na nthembo nyingĩ mũno kwondũ wa Isilaeli onthe,

22na maya na manyw’a Yeova ene mũthenya ũsu na ũtanu mwingĩ. Na mamũtw’ĩkĩthya Solomoni mwana wa Ndaviti mũsumbĩ ĩvinda ya kelĩ, na mamwĩtĩkĩsya mauta ethĩwe wa Yeova ethĩwe mũnene wĩ mbee ũsumbĩnĩ, na Nzatoki ethĩwe mũthembi.

23Na ĩndĩ Solomoni ekala kĩvĩlanĩ kya ũsumbĩ kya Yeova e mũsumbĩ vandũ va Ndaviti ĩthe wake, na aathimĩka; na Isilaeli onthe mamwĩw’a.

24Na anene onthe me mbee ũsumbĩnĩ, na ngũmbaũ, o na ana onthe ma mũsumbĩ Ndaviti, meenyivĩsya mũsumbĩ Solomoni.

25Na Yeova anenevya Solomoni mũno mũnene Isilaeli onthe mene, na amũnenga ndaĩa nene ya kĩũsumbĩ ĩtaanengwa mũsumbĩ o na wĩva mbee wake nthĩnĩ wa Isilaeli.

26Na ĩndĩ Ndaviti mwana wa Yese asumbĩka Isilaeli onthe.

27Na ĩvinda yĩla wasumbĩkie Isilaeli yaĩ myaka mĩongo ĩna; asumbĩka myaka mũonza Eviloni, na myaka mĩongo ĩtatũ na ĩtatũ Yelusaleme.

28Na akw’a ũkũunĩ mũseo, na wa matukũ maingĩ, e na ũthwii, na ndaĩa: na Solomoni mwana wake asumbĩka vandũ vake.

29Na ĩndĩ meko ma mũsumbĩ Ndaviti, ma mbee na ma mũminũkĩlyo, sisya, nĩmaandĩkĩtwe maandĩkonĩ ma Samueli ũla mwoni, na maandĩkonĩ ma mwathani Nathani, na maandĩkonĩ ma Ngati ũla mwoni,

30vamwe na ũsumbĩki wake w’onthe na vinya wake mũnene, na mavinda ala mavĩtĩle ĩũlũ wake, na ĩũlũ wa Isilaeli, na ĩũlũ wa mosumbĩ onthe ma i nthĩ.

← Chapter 28 Jump to: