Deuteronomy 1

Kamba (Mbivilia) 1956

Jump to: Chapter 2 →

1Ii nĩsyo ndeto ila Mose waneenie na Isilaeli onthe mũingo wa Yolotani weũnĩ, mwandanĩ wa Alava ũla welekele Suvu, katĩ wa Valani, na Toveli, na Lavani, na Aaselothi, na Ndi‐saavu.

2Nĩ mũendo wa mĩthenya ĩkũmi na ũmwe kuma Olevu kũthi na nzĩa ya kĩĩma kya Seili kũvika Katesi‐mbalinea.

3Na kweethĩwa mwaka wa mĩongo ĩna, mwei wa ĩkũmi na ũmwe, mũthenya wa mbee wa mwei, Mose aneena na ana ma Isilaeli, kwĩanana na w’onthe ũla wataviw’e nĩ Yeova ameaĩe;

4ĩtina wa kũmũkũna Sioni mũsumbĩ wa Aamoli, ũla watwĩe Esivoni, na Oku mũsumbĩ wa Mbasani, ũla watwĩe Asetalothi, vu Etilei.

5Mũingo wa Yolotani, nthĩ ya Moavi, Mose ambĩlĩlya kũtavan’ya mĩao ĩno, akyasya,

6Yeova Ngai waitũ nĩwaneenee naitũ Olevu, akyasya, Kũtũa kwenyu kwa kĩĩmanĩ kĩĩ nĩkweanĩa:

7ĩthyũũei, mũkwate kyalo kyenyu, mũthi nthĩ ya Aamoli ĩla yĩ iĩma, na kũndũ kw’onthe kũla kwĩ vakuvĩ nayo, mwandanĩ wa Alava, nthĩ yĩ iĩma, na nthĩ ndindimalu, na ngalĩ ya Ĩtheo, na ũtee wa ũkanga, nthĩ ya Akanaani, na Levanoni, kũvika ũsĩ ũla mũnene, ũsĩ wa Euvalati.

8Sisyai, nĩniĩte nthĩ mbee wenyu: likai na mũimĩmesya nthĩ ĩla Yeova wamevĩtĩe aaĩthe menyu, Avalaamu, na Isaka, na Yakovo, kũmanenga na ũsyao woo ĩtina woo.

9Nakwa naneenie nenyu ĩvinda yĩu, ngyasya, Nditonya kũmũkua inyw’ĩ nĩ nyioka:

10Yeova Ngai wenyu nũmwingĩvĩtye, na, sisyai, ũmũnthĩ mũilyĩ ta ndata sya ĩtunĩ ũndũ wa kwingĩva.

11Yeova, Ngai wa aaĩthe menyu, namũtw’ĩkĩthye kũndũ ngili o ũndũ mwĩana yu, na kũmũathima, o ũndũ wamwathie!

12Nyie nĩ nyioka ndonya ata kũkua kĩthokoo kwenyu, na mũio wenyu, na ĩteta yenyu?

13Osai andũ oĩ, me na ũmanyi, na ala mesĩkĩwe, kwĩanana na mbaĩ syenyu, na ngamatw’ĩkĩthya atongoi menyu.

14Na inyw’ĩ mwanzũngĩa na mwasya, Ũndũ ũla ũneenete nĩ ũseo twĩke.

15Kwondũ wa ũu noosa atongoi ma mbaĩ syenyu, andũ oĩ, na ala mesĩkĩwe, na namaia methĩwe atongoi menyu, makavuteni ma ngili ngili, o makavuteni ma maana, na makavuteni ma mĩongo ĩtano mĩongo ĩtano, na makavuteni ma makũmi, na anene, kwĩanana na mbaĩ syenyu.

16Na nameaĩa asili menyu ĩvinda yĩu, ngyasya, Ĩthukĩĩsyei maũndũ ma ana‐a‐ĩthe menyu, na silan’yai katĩ mũndũ na mwana‐a‐ĩthe, na mwĩkali wa ũeninĩ ũla wĩ kwake.

17Mũikendeesye andũ mũkĩsila; methukĩĩsye ala anini na ala anene ũndũ ũmwe; mũtikakĩe ũthyũ wa mũndũ; nũndũ kũsilĩla nĩ kwa Ngai: na ũndũ ũla wĩmũema mwĩndetee, nakwa ngawĩthukĩĩsya.

18Na ĩvinda yĩu namwĩaĩa maũndũ onthe ala mwaĩle kwĩka.

19Na twakwata kyalo kuma Olevu, na twavĩtĩla weũnĩ ũsu w’onthe mũnene na wa ũtĩsya ũla mwoonie, tũkwete nzĩa ya nthĩ yĩ iĩma ya Aamoli, o tondũ Yeova Ngai waitũ watwĩaĩe; na twavika Katesi‐mbalinea.

20Nakwa namwĩa, Nĩmũvikĩte nthĩ yĩ iĩma ya Aamoli, ĩla Yeova Ngai waitũ ũtũnengae.

21Sisya, Yeova Ngai waku nĩwiĩte ĩ nthĩ mbee waku: ambata, noĩmĩmesya o tondũ Yeova, Ngai wa aaĩthe maku, ũneenete naku; ndũkakĩe, o na ndũkateve.

22Ma mwanthengeea o kĩla mũndũ wenyu, na mwambĩa, Tũtũme andũ maende mbee waitũ, makatũthianĩe nthĩ, na maitũetee ũvoo wa nzĩa ĩla twĩambata nayo, na ndũa ila twĩvikĩa.

23Na ũndũ ũsu wambendeesya mũno; na noosa andũ ĩkũmi na elĩ menyu, kĩla mbaĩ mũndũ ũmwe:

24na methyũũa na mambata nthĩ yĩ iĩma, na mavika mwanda wa Esikoli, na moothiana.

25Na moosa ũsyao wa nthĩ mokonĩ moo, na matũtheeesya, na matũetee ũvoo, na masya, Nĩ nthĩ nzeo ĩla Yeova Ngai waitũ ũtũnengae.

26Ĩndĩ inyw’ĩ mwalea kwambata, na mwatũla mwĩao wa Yeova Ngai wenyu:

27na mwanyungunyĩĩsya maeemanĩ menyu, na mwasya, Nũndũ Yeova nĩwatũmenie, nĩwatumisye nthĩ ya Misili, atũnengane mokonĩ ma Aamoli, matwanange.

28Twĩambata va? Ana‐a‐ĩthe maitũ nĩmatũtũlĩte ngoo, maitwĩa, Andũ nĩ anene na aasa kwĩ ithyĩ; ndũa nĩ nene na mbiie kũvika ĩtunĩ; na ũndũ ũngĩ nĩtũnamonie ana ma Aanaki kw’o.

29Nĩvo ĩndĩ namwĩa inyw’ĩ, Mũikethĩwe na kĩũũyũ, o na mũikamakĩe.

30Yeova Ngai wenyu ũla ũendaa mbee wenyu, akamũkitĩa, kwĩanana na ũndũ w’onthe wamwĩkie Misili mwene na metho menyu,

31na weũnĩ, vala wonete ũndũ Yeova Ngai waku wakũkuie, o tondũ mũndũ ũkuaa mwana wake, nzĩanĩ yonthe ĩla mwaendie nayo, kũvika yĩla mwavikie vaa.

32Ĩndĩ ũndũnĩ ũũ mũtyaamwĩtĩkĩla Yeova Ngai wenyu,

33ũla wamũtongoeasya nzĩanĩ, ũtukũ na mwaki wa kũmwon’ya nzĩa ĩla mũũendela, na mũthenya na mũumbĩ, nĩ kana amũmanthĩe vandũ va kwamba maeema menyu.

34Na Yeova eew’a wasya wa ndeto syenyu, na athilĩka, na eevĩta, akyasya,

35Vate ndĩi vati ũmwe wa andũ aa ma nzyawa ĩno nthũku ũkona nthĩ ĩla nzeo, ĩla neevĩtie kũnenga aaĩthe menyu,

36ate o Kalevu mwana wa Yevune; nake akamyona; na ngamũnenga we na syana syake nthĩ ĩla wakinyĩle, nĩkwĩthĩwa nĩwamũatĩĩe Yeova ki.

37Na Yeova anthatĩa kwondũ wenyu, akĩmbĩa, O naku ndũkalika kw’o:

38Yosua mwana wa Nuni, ũla ũũngamaa mbee waku, akalika kw’o: mũkũmbaĩthye; nũndũ nĩwe ũkatuma Isilaeli mamĩtiĩwa.

39Na ũndũ ũngĩ twana twenyu tũnini, tũla mwaisye tũkethĩwa twĩ tũtave, na syana syenyu, ila ũmũnthĩ ite na ũmanyi wa ũseo kana ũthũku, ikalika kw’o, nĩsyo nĩinenga, na ikamĩmesya.

40Ĩndĩ inyw’ĩ, ĩthyũũei, na mũikwata kyalo kyenyu mũthi weũnĩ na nzĩa ĩla ĩelete Ũkanga Mũtune.

41Nĩvo ĩndĩ mwanzũngĩie na mwambĩa, Nĩtũmũvĩtanĩsye Yeova, tũkambata na kũkita, kwĩanana na ũndũ w’onthe ũla Yeova Ngai waitũ watwĩaĩe. Na mweekĩa kĩla mũndũ mĩio yake ya kaũ, na mwoona ta ũndũ ũnini kwambata nthĩ yĩ iĩma.

42Na Yeova ambĩa, Matavye, Mũtikambate, kana kũkita; nũndũ ndi vamwe nenyu: mũtikakũnwe nĩ amaitha menyu.

43Kwondũ wa ũu naneena nenyu, na mũtyaambĩthukĩĩsya; ĩndĩ mwang’endea mwĩao wa Yeova, na mwaĩ na mĩtavyo, na mwambata nthĩ yĩ iĩma.

44Na Aamoli, ala matwĩe nthĩ ĩsu yĩ iĩma, mamumĩlĩla inyw’ĩ, na mamũlũngya, o tondũ nzũkĩ ilũngasya, na mamũkũnĩa Seili, o na kũvika Olima.

45Na mwasyoka na mwamũĩĩa Yeova; ĩndĩ Yeova ndaaĩthukĩĩsya wasya wenyu, o na ndaathyũũa kũtũ kwake amwĩw’e.

46Kwondũ wa ũu mwekala Katesi mĩthenya mingĩ, kwĩanana na mĩthenya ĩla mwekalile vo.

Jump to: Chapter 2 →