Deuteronomy 33

Kamba (Mbivilia) 1956

← Chapter 32 Jump to: Chapter 34 →

1Na ũũ nĩw’o ũathimo, ũla Mose mũndũ wa Ngai wamaathimie ana ma Isilaeli naw’o atanakw’a.

2Nake asya, Yeova auma Sinai, Na amaumĩlĩla kuma Seili; Akena kuma kĩĩmanĩ kya Valani, Na ooka kuma vala ve ngili makũmi sya ala atheu: Ngalĩ ya kw’oko kwake kwa aũme kwaĩ mĩao yĩ mwaki kwondũ woo.

3Ĩĩ, nũmendete andũ; Atheu make onthe me kw’okonĩ kwaku: Na mekala nthĩ maũũnĩ maku; Kĩla ũmwe akoosa sya ndeto syaku.

4Mose atwĩaĩa mĩao, Ũtiĩwa wa ũmbano wa Yakovo.

5Nake aĩ mũsumbĩ nthĩnĩ wa Yesuluni, Yĩla atongoi ma andũ moombanaa, Mbaĩ syonthe sya Isilaeli vamwe.

6Leuveni nĩekale thayũ, na ndakakw’e; Ĩndĩ andũ make methĩwe anini ũtalonĩ.

7Na ũathimo wa Yuta nĩ ũũ; na asya, Ĩw’a, Yeova, wasya wa Yuta, Na kũmũete kwa andũ make. Nĩweyũkitĩe mwene na moko make; Naku ũkamũtethya ũndũ wa nthũ syake.

8Na ũndũ wa Livai asya, Syĩndũ syaku syĩtawa Thumimu na Ulimu syĩ na ũla waku ũla ũmũkĩaa Ngai, Ũla wamũtatĩe kũu Masa, Ũla watetanĩsye nake kũu manzĩnĩ ma Meliva;

9Ũla waneenie ũndũ wa ĩthe wake, na ũndũ wa nyinyia, Ndyaamwona; O na ndaametĩkĩla ana‐a‐ĩthe, O na ndeesĩ syana syake: Nũndũ nĩmasũvĩe ndeto yaku, Na malũmya ũtianĩo waku.

10Makamanyĩsya Yakovo motw’ĩo maku, Na Isilaeli mĩao yaku, Makeekĩa ũvani mbee waku, Na nthembo nima ya kũvĩvw’a kĩthembeonĩ kyaku.

11Yeova, aathima syĩndũ syake, Na ĩtĩkĩla wĩa wa moko make: Makũne ala mamũkĩlĩĩlaa inyunyu itũlĩke, Na ala mamũmenaa, matikaokĩle ĩngĩ.

12Na ũndũ wa Mbenyamini asya, Mwendwa wa Yeova akekala vate mũisyo vakuvĩ nake; Nũmũvw’ĩkaa mũthenya w’onthe, Nake ekalaa katĩ wa ituo syake.

13Na ũndũ wa Yosevu asya, Nthĩ yake nĩathimwe nĩ Yeova, Ũndũ wa syĩndũ syĩ vata mũno sya ĩtunĩ, ũndũ wa ĩmwe, Na ũndũ wa syũngũ syĩkalaa ĩtheo,

14Na ũndũ wa syĩndũ syĩ vata mũno sya mosyao ma syũa, Na ũndũ wa syĩndũ syĩ vata mũno sya mosyao ma myei,

15Na ũndũ wa syĩndũ syĩ vata mũno sya iĩma sya tene, Na ũndũ wa syĩndũ syĩ vata mũno sya tũlĩma tũla twĩkalaa tene na tene,

16Na ũndũ wa syĩndũ syĩ vata mũno sya nthĩ na wusũu wayo, Na kwenda kũseo kwa ũla wekalile kakuthunĩ, Ũathimo nĩwũke mũtwenĩ wa Yosevu, Na mũtwe lolotyanĩ kwa ũla wataanĩtw’e na ana‐a‐ĩthe.

17Kĩla kĩsyaĩtwe mbee kya ndĩthya yake ya ng’ombe ũnene nĩ wakyo; Na mbya syakyo nĩ mbya sya mboo: Nasyo akailuta ngo syonthe sya andũ, o itulu sya nthĩ: Namo nĩ ngili makũmi sya Evalaimu, Namo nĩ ngili sya Manase.

18Na ũndũ wa Nzevuluni asya, Tana, Nzevuluni, kumaalanĩ kwaku; Na, Isakali, maeemanĩ maku.

19Makasyĩta ngo sya andũ syũke kĩĩmanĩ; Vau makathembaa nthembo sya ũlũngalu: Nũndũ makoonga wingĩ wa maũkanga, Na ũthwii mũvithe kĩthangathĩnĩ.

20Na ũndũ wa Ngati asya, Naathimwe ũla ũmũnenevasya Ngati: Oveeasya ta mũnyambũ mũka, Na kũtembũanga kw’oko, ĩĩ, o na mũtwe lolotyanĩ.

21Nake enyuvĩaa kĩlungũ kya mbee, Nũndũ nĩkyo kĩlungu kĩla kiĩawa mũnengani wa mĩao; Na ookan’ya na atongoi ma andũ; Na eeka ũlũngalu wa Yeova, Na motw’ĩo make kwa Isilaeli.

22Na ũndũ wa Ndani asya, Ndani nĩ ĩswii ya mũnyambũ, Yĩla yĩtũlĩlaa kuma Mbasani.

23Na ũndũ wa Navitali asya, We Navitali, ũvũnĩtw’e na ũseo, Na kusũw’a na ũathimo wa Yeova, Mesya ng’ũndũ ngalĩ ya ũthũĩlonĩ wa syũa na ngalĩ ya ĩtheo.

24Na ũndũ wa Aseli asya, Naathimwe Aseli ethĩwe na syana; Etĩkĩlwe nĩ ana‐a‐ĩthe, Na navotye kũũ kwake mautanĩ.

25Ivingi syaku ikeethĩwa sya iaa na ũthuku; O tondũ mĩthenya yaku yĩana, now’o vinya waku ũkethĩwa wĩana.

26Vai ũilyĩ ta Ngai, we Yesuluni, Ũla ũkuawa nĩ matu ũndũ wa ũkũtethya, Na ĩũlũ wa mathweo ũnenenĩ wake.

27Ngai wa tene na tene nĩ wĩkalo waku, Na ĩtheo ve moko ma tene na tene. Na alũngya mũmaitha mbee waku Na asya, Ananga.

28Na Isilaeli nĩwĩkalaa vate mũisyo, Nthongo ya Yakovo yĩ yoka, Nthĩ yĩ lĩu wa mbaa ngetha na mbinyu mbĩthĩ; Ĩĩ, matu make mavolotangasya ĩmwe.

29Wĩ mũtanu, Isilaeli: Ũla ũilyĩ taku nũũ, andũ matangĩĩĩtwe nĩ Yeova, Ngao ya ũkũtethya, Na ũvyũ wa ũnene waku! Na amaitha maku makakwĩnyivĩsya; Naku ũkakinyanga kũndũ kwoo kũtũlu.

← Chapter 32 Jump to: Chapter 34 →