Deuteronomy 4 — Kamba (Mbivilia) 1956

1Na yu, Isilaeli, ĩthukĩĩsyei myamũlo na motw’ĩo, ala nĩmũmanyĩasya, mũmeke; nĩ kana mwĩkale thayũ, na kũlika na kũmesya ĩ nthĩ ĩla Yeova, Ngai wa aaĩthe menyu, ũmũnengae.

2Mũikamyongeleele ndeto ĩla nĩmwĩaĩaa, o na mũikamĩole, nĩ kana mũkwate mĩao ya Yeova Ngai wenyu ĩla nĩmwĩaĩaa.

3Metho menyu nĩmonete ũndũ Yeova wekie nũndũ wa Mbethi‐veoli; nũndũ andũ onthe ala maatĩĩe Mbethi‐veoli, Yeova Ngai waku nũmanangĩte kũmaumya nthĩnĩ wenyu.

4Ĩndĩ inyw’ĩ ala mwalũmanilye na Yeova Ngai wenyu mwĩ thayũ kĩla mũndũ ũmũnthĩ.

5Sisyai, nĩmũmanyĩĩtye myamũlo na motw’ĩo, o tondũ Yeova Ngai wakwa wambĩaĩe, nĩ kana inyw’ĩ mwĩkĩae ũu nthĩ ĩla mwĩlika mũmĩmesye.

6Kwondũ wa ũu mĩkwatei na mũimĩka; nĩkwĩthĩwa ũu nĩw’o ũĩ wenyu na ũmanyi wenyu methonĩ ma ngo sya andũ, ala makew’a mĩao ĩno yonthe, na kwasya, Nĩ w’o mbaĩ ĩno nene nĩ andũ oĩ na me na ũmanyi.

7Nũndũ kwĩ mbaĩ yĩva nene, ĩla yĩ na ngai yĩ vakuvĩ namo, tondũ Yeova Ngai waitũ ũilyĩ o yĩla tũmwĩkaĩlaa?

8Na kwĩ mbaĩ yĩva nene, yĩ na myamũlo na motw’ĩo malũngalu ta mĩao ĩno yonthe, ĩla niĩte mbee wenyu ũmũnthĩ?

9Ĩsũvĩe mwene, na kũsyaĩĩsya na kĩthing’ĩĩsyo ngoo yaku, ndũkese kũlwa nĩ maũndũ ala metho maku moonie, maikese kuma ngoonĩ yaku mĩthenya yonthe ya thayũ waku; ĩndĩ manyĩthya mo syana syaku na esũkũũu;

10na mũno mũthenya ũla waũngamie mbee wa Yeova Ngai waku Olevu, yĩla Yeova wambĩie, Mbũmbanĩsya andũ, nakwa ngatuma mew’a ndeto syakwa, nĩ kana memanyĩsye kũngĩa mĩthenya yonthe ĩla me thayũ kũũ nthĩ, na nĩ kana mamanyĩsye syana syoo.

11Nenyu mwathengeea na kũũngama ĩtina wa kĩĩma; na kĩĩma kyakana mwaki kũvika ĩtunĩ nthĩnĩ, kweethĩwa kĩvindu, na mũumbĩ, na kĩvindu kya ngokomi.

12Na Yeova aneena nenyu e nthĩnĩ, wa mwaki: mweew’a wasya wa ndeto, ĩndĩ mũtyaona mũvw’ano; no kwĩw’a wasya.

13Nake amũtavya ũtianĩo wake, ũla wamwĩaĩe mwĩke, naw’o nĩ ĩla mĩao ĩkũmi; na amĩandĩka masengeanĩ elĩ ma mavia.

14Na Yeova ambĩaĩa ĩvinda yĩu nĩmũmanyĩsye myamũlo na motw’ĩo, mũtonye kũmekĩaa nthĩ ĩla mwĩinga mũmĩmesye.

15Kwondũ wa ũu ĩsũvĩei ene; nũndũ mũtyaona mũvw’ano o na wĩva mũthenya ũla Yeova waneenie nenyu e nthĩnĩ wa mwaki Olevu;

16mũikese kwĩthũkya, na kwĩseũvĩsya mũvw’anano mwasũvye wa mũvw’ano wa kĩndũ o na kĩva, mũvw’ano wa mũndũ mũũme kana mũndũ mũka,

17mũvw’ano wa nyamũ o na yĩva yĩ kũũ nthĩ, mũvw’ano wa nyũnyi o na yĩva yĩ nthwau yĩũlũkaa yayayanĩ,

18mũvw’ano wa kĩndũ o na kĩva kĩla kĩtambũkaa mũthanganĩ, mũvw’ano wa ĩkũyũ o na yĩva yĩla yĩ manzĩnĩ ĩtheo wa nthĩ;

19na ndũkese kũũngalalya metho maku kũsisya ĩtunĩ, na woona syũa na mwei na ndata, o nguthu yonthe yĩ ĩtunĩ, ũkakusw’a na kwithaitha, na kwithũkũma, ila Yeova Ngai waku wiaanĩĩtye ngonĩ syonthe sya andũ ila syĩ ĩtheo wa ĩtu yonthe.

20Ĩndĩ Yeova nũmwosete, na kũmumya ikonĩ ĩnene ya kĩaa, kũmumya Misili, mwĩthĩwe kwake andũ ma ũtiĩwa, o ũndũ mũilyĩ ũmũnthĩ.

21Na ũndũ ũngĩ Yeova anthatĩa kwondũ wenyu, na eevĩta ndikainga ũsĩ wa Yolotani, na ndikalika nthĩ ĩsu nzeo, ĩla Yeova Ngai waku ũkũnengae yĩthĩwe ũtiĩwa waku:

22ĩndĩ mũvaka nĩkw’ĩe nthĩ ĩno, nditonya kũinga ũsĩ wa Yolotani; ĩndĩ inyw’ĩ mũkainga, na mũithi kũmĩmesya nthĩ ĩsu nzeo.

23Ĩsũvĩei, mũtikese kũlwa nĩ ũtianĩo wa Yeova Ngai wenyu, ũla watianĩe nenyu, na kwĩseũvĩsya mũvw’anano mwasũvye wa mũvw’ano wa kĩndũ o na kĩva kĩla Yeova Ngai waku wakũvatie.

24Nũndũ Yeova Ngai waku nĩ mwaki ũla ũĩsaa, Ngai wĩ kĩwĩu.

25Wasyaa syana, na esũkũũu, na kwĩthĩwa mwĩkalĩte nthĩ ĩvinda ĩasa, na mũkevukya, na kũseũvya mũvw’anano mwasũvye wa mũvw’ano wa kĩndũ o na kĩva, na mũkeka ũndũ ũla Yeova Ngai wenyu wonaa wĩ ũthũku, na kũmũthatya;

26ũmũnthĩ nĩngwĩta ĩtu na nthĩ imũkũsĩĩe, atĩ mĩtũkĩ mũkaanangĩka vyũ kumw’a nthĩ ĩsu ĩla mwĩinga Yolotani mũkamĩmesye; mũtikaingĩvya mĩthenya yenyu nthĩnĩ wayo, ĩndĩ mũkanangwa vyũ.

27Na Yeova akamũnyaĩĩkya katĩ wa ngo sya andũ, na mũkatiala andũ anini ũtalonĩ katĩ wa i mbaĩ, kũla Yeova ũkamũtwaa.

28Na kũu mũkaithũkũma ngai, mawĩa ma moko ma andũ, mĩtĩ na mavia, ila itonaa, kana kwĩw’a, kana kũya, kana kũnyungĩa.

29Ĩndĩ mwĩ kũu mũkamantha Yeova Ngai waku, na ũkamwona, yĩla wĩmũmantha na ngoo yaku yonthe na thayũ waku w’onthe.

30Yĩla wĩ ũnyamaonĩ, na maũndũ asu onthe makũkĩa, mĩthenya ya mũminũkĩlyo ũkamũsyokea Yeova Ngai waku, na kwĩthukĩĩsya wasya wake:

31nũndũ Yeova Ngai waku nĩ Ngai wa tei; ndakakũeka, kana ũkwananga, kana kũlwa nĩ ũtianĩo wa aaĩthe maku ũla wamevĩtĩe.

32Ĩndĩ kũlya yu ũvoo wa mĩthenya mĩvĩtu, ĩla yavĩtie mbee waku, kuma mũthenya ũla Ngai wombie mũndũ kũũ nthĩ, na kuma ngalĩ ĩmwe ya ĩtu kũvika ngalĩ ĩngĩ, ethĩwa kwaethĩwa ũndũ o na wĩva wailyĩ ũndũ ũũ ũnene, kana kwaew’ĩka ũndũ ũilyĩ taw’o?

33Ve andũ maew’a wasya wa Ngai ũineena wĩ mwakinĩ tondũ weewie, na kwĩkala thayu?

34Kana Ngai aatata kũthi na kwĩyosea mwene mbaĩ kuma nthĩnĩ wa mbaĩ ĩngĩ, kwondũ wa matatwa, na syama, na moseng’yo, na kaũ, na kw’oko kwĩ vinya, na kw’oko kũtambũũku, na motĩsyo manene, o ũndũ Yeova Ngai wenyu wamwĩkĩe nthĩ ya Misili mwene na metho menyu?

35We nĩwooniw’e ũu, nĩ kana ũmanye atĩ Yeova nĩwe Ngai; vai ũngĩ ate o we.

36E ĩtunĩ akwĩw’ĩthya wasya wake, nĩ kana akũmanyĩsye; na kũũ nthĩ akwonethya mwaki wake mũnene; naku weew’a ndeto syake e mwakinĩ.

37Na nĩkwĩthĩwa nĩwamendie aaĩthe maku, kwondũ wa ũu anyuva ũsyao woo ĩtina woo, na akumya Misili e vamwe naku, kwondũ wa vinya wake mũnene;

38kana alũngye mbee waku mbaĩ ila nene na syĩ vinya kwĩ we, akũlikye nthĩnĩ, na ũkũnenga nthĩ yoo yĩthĩwe ũtiĩwa o ũndũ kũilyĩ ũmũnthĩ.

39Manya ĩndĩ ũmũnthĩ, na wĩkĩe ngoonĩ yaku, kana Yeova nĩwe Ngai ĩũlũ ĩtunĩ na ĩtheo kũũ nthĩ; vai ũngĩ.

40Naku kwata myamũlo yake, na mĩao yake, ĩla ngũkwĩaĩa ũmũnthĩ, nĩ kana kwĩthĩwe ũseo kwaku, na kwa syana syaku ĩtina waku, na nĩ kana wingĩvye mĩthenya yaku wĩ nthĩ ĩla Yeova Ngai waku ũkũnengae, tene na tene.

41Nĩvo Mose wavathie ndũa itatũ mũingo wa Yolotani kwelekela vala syũa yumĩlaa;

42nĩ kana mũaani akĩĩae vo, ũla ũmũaa mũtũi wake na mbanga, na ndatwĩe e ũthũ nake; na ĩndĩ akeethĩwa thayũ akĩĩa ndũa ĩmwe ya isu:

43nasyo nĩ, Mbeseli ĩla yĩ weũnĩ, nthĩ yĩ ũiĩ, ũndũ wa Aleuveni; na Lamothi nthĩ ya Ngileati, ũndũ wa Angati; na Ngolani nthĩ ya Mbasani, ũndũ wa Amanase.

44Na ĩno nĩyo mĩao ĩla Mose wamaiĩe ana ma Isilaeli:

45aa nĩmo mokũsĩ, na myamũlo, na motw’ĩo, ala Mose wamatavisye ana ma Isilaeli, yĩla maumie nthĩ ya Misili,

46mũingo wa Yolotani, mwandanĩ ũla welekele Mbethi‐veoli, nthĩ ya Sioni mũsumbĩ wa Aamoli, ũla watwĩe Esivoni, ũla Mose na ana ma Isilaeli mamũkũnie, yĩla maumie Misili.

47Na mamĩmesya nthĩ yake, na nthĩ ya Oku mũsumbĩ wa Mbasani, nĩmo asumbĩ elĩ ma Aamoli, ala maĩ mũingo wa Yolotani kwelekela vala syũa yumĩlaa;

48kuma Aloeli, ĩla yĩ ũtee wa mwanda wa ũsĩ wa Alinoni, o kũvika kĩĩma kya Saioni (nĩkyo kĩĩma kya Elimoni),

49na Alava w’onthe mũingo wa Yolotani kwelekela wumĩlonĩ wa syũa, o kũvika ũkanga wa Alava, ĩtheo wa ivaũũko sya Visika.