Deuteronomy 28 — Kamba (Mbivilia) 1956

1Na kũkeethĩwa, ethĩwa, ũkethukĩĩasya ki wasya wa Yeova Ngai waku, kũkwataa na kwĩkaa mĩao yake yonthe ĩla ngũkwĩaĩa ũmũnthĩ, nĩvo ĩndĩ Yeova Ngai waku ũkakũnenevya kwĩ mbaĩ syonthe sya nthĩ:

2na moathimo aa onthe makooka kwaku, na ũkũkwata, ethĩwa ũkethukĩĩasya wasya wa Yeova Ngai waku.

3Ũkeethĩwa wĩ mũathime ndũanĩ, na ũkeethĩwa wĩ mũathime mũũndanĩ.

4Ũsyao wa mwĩĩ waku ũkeethĩwa mũathime, na ũsyao wa nthĩ yaku, na ũsyao wa nyamũ syaku, na wingĩvo wa indo syaku, na tũtena twa ndĩthya yaku ya mbũi na malondu.

5Kĩkeethĩwa kĩ kĩathime kyondo kyaku na kĩndũ kyaku kĩla kĩluĩlawa mũtu.

6Ũkeethĩwa wĩ mũathime yĩla wĩlikaa na ũkeethĩwa wĩ mũathime yĩla wĩumaalaa.

7Yeova akamakũnĩthya mbee waku amaitha maku ala mekũkĩlĩla: makakumaalĩla na nzĩa ĩmwe, na makakĩĩla mbee waku na nzĩa mũonza.

8Yeova akeaĩa ũathimo ĩũlũ waku makũmbĩnĩ maku, na ũndũnĩ w’onthe ũla wĩkaa na kw’oko kwaku; nake akakũathima wĩ nthĩ ĩla Yeova Ngai waku ũkũnengae.

9Yeova akakũlũlũmĩlya withĩwe ũko mũtheu kwake, o tondũ wakwĩavĩe; ethĩwa ũkakwataa mĩao ya Yeova Ngai waku, na kũendaa nzĩanĩ syake.

10Na ngo syonthe sya nthĩ ikoona atĩ nĩwĩtanĩaw’a na syĩtwa ya Yeova; na ikakũkĩa.

11Na Yeova akakwingĩvĩsya ũseo, ũsyaonĩ wa mwĩĩ waku, na ũsyaonĩ wa indo syaku, na ũsyaonĩ wa nthĩ yaku, wĩ nthĩ ĩla Yeova wamevĩtĩe aaĩthe maku ũkũnengae.

12Yeova akakũvingũĩa kyũmbanĩsyo kyake kĩseo, nakyo nĩ matu, akuĩsye mbua ya nthĩ yaku ĩvinda yayo, na kũathima wĩa w’onthe wa moko maku: na ũkakovethya mbaĩ nyingĩ, na ndũkakova.

13Na Yeova akakũtw’ĩkĩthya mũtwe, na ti kĩsithe; na ũkeethĩwa wĩ ĩũlũ ki, na ndũkethĩwa wĩ ĩtheo; ethĩwa ũkethukĩĩasya mĩao ya Yeova Ngai waku, ĩla ngũkwĩaĩa ũmũnthĩ, kũmĩkwataa na kũmĩka,

14na ethĩwa ndũkathũka kuma ndetonĩ syonthe ila ngũkwĩaĩa ũmũnthĩ, kũthi ngalĩ ya kw’oko kwa aũme, kana kwa aka, kũatĩĩa ngai ingĩ na kwithũkũma.

15Ĩndĩ kũkeethĩwa, ethĩwa ndwĩĩthukĩĩsya wasya wa Yeova Ngai waku, ũkwate na kwĩka mĩao yake yonthe na myamũlo yake yonthe ĩla ngũkwĩaĩa ũmũnthĩ, kana iumo ii syonthe ikakũkĩa, na ũkũkwata.

16Ũkeethĩwa wĩ mũumanĩe ndũanĩ, na ũkeethĩwa wĩ mũumanĩe mũũndanĩ.

17Kĩkeethĩwa kĩumanĩwe kĩkavũ kyaku, na kĩndũ kyaku kĩla kĩluĩlawa mũtu.

18Ũkeethĩwa ũumanĩwe ũsyao wa mwĩĩ waku, na ũsyao wa nthĩ yaku, na wingĩvo wa indo syaku, na tũtena twa ndĩthya yaku ya mbũi na malondu.

19Ũkeethĩwa wĩ mũumanĩe yĩla wĩlikaa, na ũkeethĩwa wĩ mũumanĩe yĩle wĩumaalaa.

20Yeova akakũetee kĩumo, na mathĩna, na ũkan’yo, ũndũnĩ w’onthe ũla wĩtethasya na moko maku, kũvika yĩla wĩanangwa, na kwaa mĩtũkĩ; nũndũ wa ũthũku wa meko maku, ala ũndiĩte kwondũ wamo.

21Yeova akakũkwatĩthya mũimũ, kũvika akũmina wume nthĩ, ĩla wĩlika ũmĩmesye.

22Yeova akakũkũna na ũwau wa ũkooa, na ndetema, na ĩtũatũ yai, na ũvyũvu ta wa mwaki, na ũvyũ, na wũmanĩlu, na mbuka; na makakũatĩĩa kũvika yĩla wĩanangwa.

23Na ĩtu yaku yĩla yĩ ĩũlũ wa mũtwe waku yĩkeethĩwa ta ũthuku, na nthĩ ĩla yĩ ĩtheo waku ĩkeethĩwa ta kĩaa.

24Yeova akatw’ĩkĩthya mbua ya nthĩ yaku ta mũtu na kĩtoo: ĩkakũtheeea kuma ĩtunĩ, kũvika yĩla wĩanangwa.

25Yeova akaũkũnĩthya mbee wa amaitha maku; ũkamaumaalĩla na nzĩa ĩmwe, na ũkakĩĩla mbee woo na nzĩa mũonza: na ũkanyaĩĩkw’a kũũ na kũũ mosumbĩnĩ onthe ma nthĩ.

26Na kimba kyaku kĩkeethĩwa lĩu wa nyũnyi syonthe sya yayaya, na wa nyamũ sya nthĩ; na kũikethĩwa mũndũ wa kwilũngya.

27Yeova akaũkũna na ũla mũimũ wa Misili, o na mĩimũ ĩngĩ, na mũvolekango, na ũng’ũũ, ala ũtatonya kũvow’a.

28Yeova akaũkũna na ndũũka, na ũlilinda, na kũsaanĩw’a kwa ngoo;

29na ũkavavata mũthenya katĩ, o tondũ kĩlilinda kĩvavataa kĩvindunĩ, na ndũkaathimĩka nzĩanĩ syaku: na mavinda onthe ũkanyamaaw’a na kũvutwa, na vatikethĩwa mũndũ wa ũkũtangĩĩa.

30Ũkeevasya mwĩĩtu, na mũndũ ũngĩ akakoma nake: ũkaaka nyũmba, na ndũkekala nthĩnĩ wayo: ũkavanda mũũnda wa mĩsavivũ, na ndũkaya ũsyao waw’o.

31Ng’ombe yaku ĩkooawa wene na metho maku, na ndũkaya nyama syayo: ũkavenwa ĩng’oi yaku na vinya, mbee wa ũthyũ waku, na ndũkayĩtũngĩwa: malondu maku makanengwa amaitha maku, na ndũkethĩwa na mũndũ wa ũkũtangĩĩa.

32Ana maku na eĩtu maku makanenganwe mbaĩnĩ ĩngĩ; na metho maku makasyaĩĩsya, na makaya mbindu kwondũ wa mea moo mũthenya w’onthe: na kw’oko kwaku kũikethĩwa kũtonya ũndũ na vinya wakw’o.

33Ũsyao wa nthĩ yaku, na mawĩa maku onthe, makaĩwa nĩ mbaĩ ĩla ũtesi; na ũkathĩnw’a ki na kũkanyangwa ĩndĩ yonthe;

34ũndũ ũkaũũka nũndũ wa maũndũ ala metho maku makona.

35Yeova akaũkũna mau na maũũ, na mũimũ mũthũku, ũtavoeka, kuma ũnyaĩĩ waku kũvika lolotya.

36Yeova akaũtwaa we, na mũsumbĩ waku ũla wĩsumbĩkĩsye, kwa mbaĩ ĩla ũtaamanya, we kana aaĩthe maku; na kũu ũkaithũkũma ngai ingĩ, o mĩtĩ na mavia.

37Na ũkatw’ĩka ũseng’yo, na nthimo, na kũvũthĩĩw’a, ngonĩ syonthe sya andũ vala Yeova ũkakũtwaa.

38Ũkaumya mbeũ nyingĩ kũvanda mũũndanĩ, na ũkaketha nini, nũndũ ikalĩka nĩ ngie.

39Ũkavanda mĩũnda ya mĩsavivũ, na kũmĩsea, ĩndĩ ndũkanyw’a mbinyu yayo, kana kũketha nzavivũ, nũndũ ikalĩka nĩ iinyũ.

40Ũkeethĩwa na mĩthata mĩvakanĩ yaku yonthe, ĩndĩ ndũkevaka mauta mayo; nũndũ mũthata waku ũketĩkya ũsyao waw’o.

41Ũkasyaa ana na eĩtu, ĩndĩ matikethĩwa maku; nũndũ makaenda me atave.

42Mĩtĩ yaku yonthe na ũsyao wa nthĩ yaku ũkeethĩwa wa ngie.

43Mwĩkali wa ũeninĩ ũla wĩ kwaku akanenevw’a kwĩ we mbee na mbee; naku ũkatheea kũtheea.

44Akakũkovethya, naku ndũkamũkovethya: nake akeethĩwa mũtwe, naku ũkeethĩwa kĩsithe.

45Na iumo ii syonthe ikakũkĩa, na ikakũatĩĩa, na ũkũkwata, kũvika yĩla wĩanangwa; nũndũ ndwaaĩthukĩĩsya wasya wa Yeova Ngai waku, kũkwata mĩao yake na myamũlo yake ĩla wakwĩaĩe:

46na ikeethĩwa wonan’yo na ũseng’yo kwaku, na kwa ũsyao waku tene na tene.

47Nĩkwĩthĩwa ndwaathũkũma Yeova Ngai waku na mũyo, na ũtanu wa ngoo, kwondũ wa wingĩ wa syĩndũ syonthe;

48kwondũ wa ũu ũkathũkũma amaitha maku ala Yeova ũkakũetee, wĩ na nzaa, na waũni, na wĩ mũthei, na wĩ na vata wa syĩndũ syonthe: na akeekĩa ĩsoki ya kĩaa ngingonĩ yaku, kũvika akwananga.

49Yeova akakũetee mbaĩ kuma kũasa, kuma ngalĩ ĩmwe ya nthĩ, ĩũlũkaa ta ndiũ; mbaĩ ĩla ũtakamanya kĩthyomo kyayo;

50mbaĩ yĩ na ũthyũ mwaĩ, ĩla ĩtona mũndũ mũkũũ ta kĩndũ, kana kwon’ya ala anini ũseo,

51na ĩkaya ũsyao wa indo syaku, na ũsyao wa nthĩ yaku, kũvika yĩla wĩanangwa; o na ĩtikakũtialĩlya lĩu wa mbaa ngetha, kana mbinyu mbĩthĩ, kana mauta, kana wingĩvo wa ng’ombe syaku, kana tũtena twa ndĩthya yaku ya mbũi na malondu, kũvika yĩla yĩkwananga vyũ.

52Na makakũtw’ĩkanĩsya mbingĩlonĩ syaku syonthe, kũvika maũvai maku matũlu na maiie mavalũka, ala wĩkwatĩtye, nthĩ yaku yonthe; na makakũtw’ĩkanĩsya mbingĩlonĩ syaku syonthe nthĩ yaku yonthe, ĩla Yeova Ngai waku ũkũnengete.

53Kũtw’ĩkanĩw’anĩ na ũnyamaonĩ ũla amaitha maku makakũnyamasya naw’o, ũkaya ũsyao wa mwĩĩ waku mwene, nyama sya ana maku na eĩtu maku, ala Yeova Ngai waku ũkũnengete.

54Mũndũ mũũme katĩ wenyu ũla mwololo na mwanake mũno, itho yake yĩkeethĩwa yĩ ĩthũku kwa mwana‐a‐ĩthe, na kwa kĩveti kya kĩthũinĩ kyake, na kwa ũtialo wa syana syake ila watialĩlw’e;

55ũndũ ũtakamaaĩa o na ũmwe woo nyama sya syana syake ila ũkaya, nũndũ ndaatialĩlwa nĩ kĩndũ, kũtw’ĩkanĩw’anĩ na ũnyamaonĩ ũla mũmaitha waku ũkakũnyamasya naw’o mbingĩlonĩ syaku syonthe.

56Mũndũ mũka mwololo na mwanake mũno katĩ wenyu, ũla ũtaatata kũkinya nthĩ na ũnyaĩĩ wake nũndũ wa wanake na wololou, itho yake yĩkeethĩwa yĩ ĩthũku kwa mũũme wa kĩthũinĩ kyake, na kwa mwana wake, na kwa mwĩĩtu wake,

57na kwa kaũkenge kake kala keuma katĩ wa maũũ make, na kwa syana syake ila ũkasyaa; nũndũ akaiya na kĩmbithĩ kwondũ wa vata wa syĩndũ syonthe, kũtw’ĩkanĩw’anĩ na ũnyamaonĩ ũla mũmaitha waku ũkakũnyamasya naw’o mbingĩlonĩ syaku.

58Ethĩwa ndũkakwata na kwĩka ndeto syonthe sya mĩao ĩno ila iandĩkĩtwe ĩvukunĩ yĩĩ, nĩ kana ũyĩkĩe syĩtwa yĩĩ ĩnene na ya ũtĩsya, YEOVA NGAI WAKU;

59nĩvo ĩndĩ Yeova wĩtw’ĩkĩthya mothĩn’yo maku na mothĩn’yo ma ũsyao waku methĩwe ma ũseng’yo, o mothĩn’yo manene, na ala mekalaa, na mowau mathũku, na ala mekalaa.

60Nake akakũtũngĩa mowau onthe ma Misili, ala wamakĩaa; na makalũman’ya naku.

61O na kĩla ũwau, na kĩla ũthĩn’yo, ũla ũtaandĩkĩtwe ĩvukunĩ ya mĩao ĩno, nĩmo Yeova ũkakũetee, kũvika yĩla ũkanangwa.

62Na mũkatiala mwĩ andũ anini ũtalonĩ, o na kau mweanaa ta ndata sya ĩtunĩ ũndũ wa kwingĩva; nĩkwĩthĩwa ndwaaĩthukĩĩsya wasya wa Yeova Ngai waku.

63Na kũkeethĩwa, kana, o tondũ Yeova wamũtanĩaa aimwĩka nesa, na kũmwingĩvya, o ta ũu Yeova akamũtanĩa akĩmwasya, na akĩmwananga; na mũkaumw’a nthĩ ĩla mwĩlika mũmĩmesye.

64Na Yeova akakũnyaĩĩkya ngonĩ syonthe sya andũ, kuma ngalĩ ĩmwe ya nthĩ kũvika ngalĩ ĩla ĩngĩ ya nthĩ; na kũu ũkathũkũma ngai ingĩ, ila ũtaamanya, we kana aaĩthe maku, o ila sya mĩtĩ na mavia.

65Na mbaĩnĩ isu ndũkona ũthũmũo, na kũikethĩwa vandũ va kũthũmũsya ũnyaĩĩ waku: ĩndĩ kũu Yeova akakũnenga ngoo ya kũtetema, na metho me mbindu, na kũsonzoma kwa thayũ;

66na thayũ waku ũkekala ta ũniinĩtwe nĩ nzika mbee waku; na ũkakĩaa ũtukũ na mũthenya, na ndũkethĩwa na wĩkwatyo kwondũ wa thayũ waku.

67Kĩoko ũkaasya, Kethĩwa yu nĩ wĩoo! Na wĩoo ũkaasya, Kethĩwa yu nĩ kĩoko! Nũndũ wa kũkĩa kwa ngoo yaku kũla ũkakĩa, na nũndũ wa maũndũ ala metho maku makona.

68Na Yeova akakũtũnga Misili na ngalawa, na nzĩa ĩla nakwĩie, Ndũkaamyona ĩngĩ nongi: na kũu mũkeethoosya kwa amaitha menyu mwĩthĩwe ngombo aũme na aka, na mũikona mũndũ wa ũmũthooa.