Deuteronomy 26

Kamba (Mbivilia) 1956

← Chapter 25 Jump to: Chapter 27 →

1Na kũkeethĩwa, walika nthĩ ĩla Yeova Ngai waku ũkũnengae yĩthĩwe ũtiĩwa, na wamĩmesya na kũmĩtũa,

2wĩosa ũsyao wa mbee wa nthĩ, ũla wĩketha nthĩ ĩla Yeova Ngai waku ũkũnengae; wĩkĩe kĩkavũnĩ, na ũienda vala Yeova Ngai waku wĩnyuva, ekalye syĩtwa yake vo.

3Na wĩthi kwa mũthembi ũla ũkethĩwa mĩthenya ĩsu, noimwĩa, Nĩngũneena ũmũnthĩ mbee wa Yeova Ngai waku, atĩ nĩnĩvikĩte nthĩ ĩla Yeova wamevĩtĩe aaĩthe maitũ kũtũnenga.

4Na mũthembi nĩose kĩkavũ kw’okonĩ kwaku, na kwia mbee wa kĩthembeo kya Yeova Ngai waku.

5Naku wĩsũngĩa na ũkyasya mbee wa Yeova Ngai waku, Nau aĩ Mũsilia aianganga; na atheea Misili, na ekala ũeni kw’o, andũ anini ũtalonĩ; na e ku atw’ĩka mbaĩ, nene, na yĩ ũtonyi, na yĩ andũ aingĩ.

6Na Amisili matwĩka naĩ, na matũthĩn’ya, na matũthũkũmĩthya na ũkombo wĩ vinya:

7na twamwĩkaĩla Yeova, Ngai wa aaĩthe maitũ, na Yeova eethukĩĩsya wasya witũ, na oona thĩna witũ, na wĩa witũ wĩ vinya, na ũnyamao witũ;

8na Yeova atumya Misili na kw’oko kwĩ vinya, na kw’oko kũtambũũku, na ũtĩsyo mũnene, na syama, na moseng’yo;

9na nũtũetete vaa, na nũtũnengete nthĩ ĩno, nthĩ yusũĩte ĩia na ũkĩ wa nzũkĩ.

10Na yu, sisya, nĩnaete ũsyao wa mbee wa nthĩ, ũla we, Yeova, ũnengete. Naku ia mbee wa Yeova Ngai waku, na mũthaithe Yeova Ngai waku:

11na ũitana kwondũ wa ũseo w’onthe ũla Yeova Ngai waku ũkũnengete we, na nyũmba yaku, we, na Mũlivai, na mwĩkali wa ũeninĩ ũla wĩ kwenyu.

12Wamina kumya kĩlungu kyonthe kya kĩlungu kya ĩkũmi kya wingĩvo wa syĩndũ syaku mwaka wa katatũ, naw’o nĩ mwaka wa kumya kĩlungu kya ĩkũmi, nĩvo ĩndĩ inenge Mũlivai, na mwĩkali wa ũeninĩ, na ũla wakw’ĩĩwe nĩ ĩthe, na mũndũ mũka ndiwa, nĩ kana maye mavũnĩe mbingĩlonĩ syaku.

13Naku neena mbee wa Yeova Ngai waku, Syĩndũ ila ivathĩtwe syĩthĩwe ntheu nĩnĩvetete kuma nyũmbanĩ yakwa, o na nĩnĩmũnengete Mũlivai, na mwĩkali wa ũeninĩ, na ũla wakw’ĩĩwe nĩ ĩthe, na mũndũ mũka ndiwa, o kwĩanana na mwĩao waku w’onthe ũla wambĩaĩe: ndyaavĩtya ũmwe wa mĩao yaku, o na ndyaolwa nĩyo:

14ndyaaya kĩmwe kya isu ntheu kĩmetonĩ kyakwa, o na ndyaaia kĩmwe kyasyo yĩla naĩ mũvuku, o na ndyaanengane kĩmwe kya isu kwondũ wa ala akw’ũ: nĩneethukĩĩsye wasya wa Yeova Ngai wakwa; nĩneekie kwĩanana na w’onthe ũla wambĩaĩe.

15Sisya kuma ũtũonĩ waku mũtheu, kuma ĩtunĩ, na ũiathima andũ maku Isilaeli, na nthĩ ĩla ũtũnengete, o ũndũ wamevĩtĩe aaĩthe maitũ, nthĩ yusũĩte ĩia na ũkĩ wa nzũkĩ.

16Ũmũnthĩ Yeova Ngai waku nũnũũkwĩaĩa ũkwate myamũlo ĩno na motw’ĩo: kwondũ wa ũu makwate na kũmeka na ngoo yaku yonthe, na thayũ waku w’onthe.

17Nũmũtavanĩtye Yeova ũmũnthĩ atĩ nĩwe Ngai waku, na kana ũkaendaa nzĩanĩ syake, na kũkwataa myamũlo yake, na mĩao yake, na motw’ĩo make, na kwĩthukĩĩasya wasya wake:

18nake Yeova nũkũtavanĩtye ũmũnthĩ atĩ wĩ ũko wake mwene wa andũ, o tondũ wakwathie, na kana nĩwaĩle kũkwataa mĩao yake yonthe;

19nake akakũnenevya kwĩ mbaĩ syonthe ila wombie, nĩ kana wĩthĩwe ndaĩa, na syĩtwa, na ngatho; nĩ kana wĩthĩwe ũko mũtheu wa andũ kwa Yeova Ngai waku, o tondũ waisye.

← Chapter 25 Jump to: Chapter 27 →