Deuteronomy 3

Kamba (Mbivilia) 1956

← Chapter 2 Jump to: Chapter 4 →

1Na ĩndĩ tweethyũũa, na twakwata nzĩa ya Mbasani: na Oku mũsumbĩ wa Mbasani atumĩlĩla, we na andũ make onthe, okitĩe Etilei.

2Na Yeova ambĩa, Ndũkamũkĩe; nũndũ nĩmũnenganĩte we, na andũ make onthe, na nthĩ yake, kw’okonĩ kwaku; na ũkamwĩka o ũndũ wamwĩkie Sioni mũsumbĩ wa Aamoli, ũla watwĩe Esivoni.

3Kwondũ wa ũu Yeova Ngai waitũ atũnenga kw’okonĩ kwitũ o na Oku nake, mũsumbĩ wa Mbasani, na andũ make onthe: na twamũkũna mũvaka ndaatialĩlwa nĩ mũndũ o na ũmwe.

4Na twakwata ndũa syake syonthe ĩvinda yĩu; vatyaĩ ndũa o na ĩmwe ĩla tũtaamavena; ndũa mĩongo thanthatũ, na nthĩ yonthe ya Alikovu, ũsumbĩ wa Oku nthĩ ga Mbasani.

5Ndũa isu syonthe syaĩ mbiie na maũvai matũlu, na mbingĩlo, na ivingi; na vamwe na isu mĩsyĩ mingĩ ĩtaĩ miie.

6Na twasyananga vyũ, o tondũ twamwĩkie Sioni mũsumbĩ wa Esivoni, tũkyananga vyũ kĩla ndũa yaĩ na andũ, vamwe na aka na twana tũnini.

7Ĩndĩ indo syonthe, na mĩio yonthe ya ndũa isu, twoosa syĩthĩwe mũtavo witũ ene.

8Na ĩvinda yĩu twoosa nthĩ kuma mokonĩ ma asumbĩ asu elĩ ma Aamoli ala maĩ mũingo wa Yolotani, kuma mwanda wa ũsĩ wa Alinoni, kũvika kĩĩma kya Elimoni

9(kĩĩma kyu kya Elimoni, Asitoni makĩtaa Silioni, na Aamoli makĩtaa Senili);

10ndũa syonthe sya ũiĩnĩ, na Ngileati yonthe, na Mbasani yonthe, kũvika Saleka na Etilei, ndũa sya ũsumbĩ wa Oku nthĩ ya Mbasani.

11(Nũndũ no Oku weka mũsumbĩ wa Mbasani watialilw’e wa ũtialo wa Alevai; sisya, ũkomo wake waĩ ũkomo wa kĩaa; ndwĩ vo ndũanĩ ya Lava ya ana ma Amimoni? Ũasa waw’o waĩ mĩkono kenda, na ũthanthau waw’o waĩ mĩkono ĩna, o ũndũ mũkono wa mũndũ ũilyĩ.)

12Na nthĩ ĩsu twamĩmesya ĩvinda yĩu: kuma ndũa ya Aloeli, ĩla yĩ vakuvĩ na mwanda wa ũsĩ wa Alinoni, na nyanzu ya nthĩ yĩ iĩma ya Ngileati, na ndũa syayo, nanenga Aleuveni na Angati:

13na nthĩ ya Ngileati ĩla yatialile, na nthĩ yonthe ya Mbasani, ũsumbĩ wa Oku, nanenga nyunzu ya mbaĩ ya Manase; nthĩ yonthe ya Alikovu, nayo nĩ Mbasani yonthe. (Nthĩ ĩsu yĩtawa nthĩ ya Alevai.

14Yaili mwana wa Manase oosa nthĩ yonthe ya Alikovu, kũvika mũvakanĩ wa Angesuli na Amaaka, na asyĩta, o Mbasanĩ, aisyĩtanĩsya na syĩtwa yake mwene, Avothi‐yaili, kũvika ũmũnthĩ.)

15Na namũnenga Makili nthĩ ya Ngileati.

16Na namanenga Aleuveni na Angati nthĩ kuma Ngileati kũvika mwanda wa ũsĩ wa Alinoni, mwandanĩ katĩ, wĩthĩwe mũvaka o kũvika ũsĩ wa Yavoki, naw’o nĩ mũvaka wa ana ma Amimoni;

17o na Alava, na ũsĩ wa Yolotani wĩthĩwe mũvaka, kuma ndũa ya Kinelethi o kũvika ũkanga wĩ Alava, naw’o nĩ Ũkanga wa Mũnyũ, ĩtheo wa kĩvaũũko kya Visika kwelekela wumĩlonĩ wa syũa.

18Na namwĩaĩa ĩvinda yĩu, ngyasya, Yeova Ngai wenyu nũmũnengete nthĩ ĩno mũmĩmesye: mũkainga mwĩkĩĩte mĩio ya kaũ mwĩ mbee wa ana‐a‐ĩthe menyu ana ma Isilaeli andũ onthe me na ũkũmbaũ.

19Ĩndĩ iveti syenyu, na syana syenyu nini, na indo syenyu (nĩnĩsĩ mwĩ na indo nyingĩ), ikekala ndũanĩ syenyu ila nĩmũnengete,

20kũvika yĩla Yeova wĩmathũmũsya ana‐a‐ĩthe menyu, o ũndũ wamũthũmũisye inyw’ĩ, na makamesya nthĩ ĩla Yeova Ngai wenyu ũmanengae mũingo wa Yolotani; nĩvo ĩndĩ mwĩsyoka kĩla mũndũ ng’ũndũnĩ yake, ĩla nĩmũnengete.

21Na namwĩaĩa Yosua ĩvinda yĩu, ngyasya, Metho maku nĩmonete ũndũ w’onthe ũla Yeova Ngai waku ũmekĩte asumbĩ asu elĩ: now’o Yeova wĩmeka mosumbĩ onthe nthĩ ĩla wĩinga.

22Mũtikamakĩe; nũndũ Yeova Ngai waku, nĩwe ũmũkitĩaa.

23Na namwĩsũva Yeova ĩvinda yĩu, ngyasya,

24Ame Mwĩaĩi Yeova, nĩwambĩlĩlye kwon’ya mũthũkũmi waku, ũnene waku na kw’oko kwaku kwĩ vinya: nũndũ nĩ ngai yĩva ĩtunĩ kana kũũ nthĩ, ĩtonya kwĩka kwĩanana na mawĩa maku, na kwĩanana na meko maku me vinya?

25Ndeka nĩinge, nĩngũkwĩsũva, none nthĩ nzeo ĩla yĩ mũingo wa Yolotani, nthĩ ĩsu nzeo yĩ iĩma, na kĩĩma kya Levanoni.

26Ĩndĩ Yeova anthatĩa kwondũ wenyu, na ndaambĩthukĩĩsya; na Yeova ambĩa, Ĩanĩwa nũu; ndũkaneene nakwa ĩngĩ ũvoo ũsu.

27Ambata mũtumbĩnĩ wa kĩĩma Visika, na ũngalalya metho maku ũthũĩlonĩ wa syũa, na ngali ya ĩũlũ, na ngalĩ ya ĩtheo, na wumĩlonĩ wa syũa, ũiketeea na metho maku: nũndũ ndũkainga ũsĩ ũũ wa Yolotani.

28Ĩndĩ mwĩaĩe Yosua, na ũimũkũmbaĩthya, na kũmwĩkĩa vinya; nũndũ nĩwe ũkamatongoesya andũ aa mainge, nake akatuma matiĩwa nthĩ ĩla wĩona.

29Kwondũ wa ũu twekala mwandanĩ ũla welekele Mbethi‐veoli.

← Chapter 2 Jump to: Chapter 4 →