Deuteronomy 22

Kamba (Mbivilia) 1956

← Chapter 21 Jump to: Chapter 23 →

1Woona ng’ombe ya mwana‐a‐au kana ĩlondu yake yaĩte, ndũkeke ta ũtanasyona: no mũvaka witũnge kwa mwana‐a‐au.

2Na ethĩwa mwana‐a‐au nde vakuvĩ naku, kana ethĩwa ndũmwĩsĩ, nĩvo ĩndĩ mĩtwae kwaku nyũmbanĩ yaku, na ĩkekala kwaku kũvika yĩla mwana‐a‐au wĩmĩmantha, na ĩndĩ ũimũtũngĩa.

3Na ĩka ta ũu na ĩng’oi yake; na ĩka ta ũu na ngũa yake; na ĩka ta ũu na kĩla kĩndũ kyaĩte kya mwana‐a‐au, kĩla waĩtye, naku wakyona: ndũkeke ta ũtanakyona.

4Woona ĩng’oi ya mwana‐a‐au kana ng’ombe yake ĩvalũkĩte ũtee wa nzĩa, naku ndũkeke ta ũtanasyona: no mũvaka ũmũtethye kũsyũkĩlya.

5Mũndũ mũka ndakekĩe ngũa ila syĩkĩawa nĩ mũndũ mũũme, o na mũndũ mũũme ndakekĩe ngũa ila syĩkĩawa nĩ mũndũ mũka; nũndũ o ũla wĩkaa maũndũ asu nũthatasya Yeova Ngai waku.

6Ethĩwa ndala ya nyũnyi ĩkeethĩwa mbee waku nzĩanĩ, mũtĩnĩ o na wĩva kana nthĩ, yĩ na tũswii kana matumbĩ, ndũkakwate inyia vamwe na tũswii:

7na mũvaka ũlekye inyia, ĩndĩ tũswii nũtonya kwĩyosea; nĩ kana wĩthĩwe ũseo kwaku, na nĩ kana wingĩvye mĩthenya yaku.

8Waaka nyũmba nzaũ, nĩvo ĩndĩ akĩĩa wiio ũengonĩ wa kĩala kyayo, nĩ kana ndũkaete nthakame ĩũlũ wa nyũmba yaku, ethĩwa mũndũ akavalũka kuma vo.

9Ndũkaavande mũũnda waku wa mĩsavivũ mbeũ sya mĩthemba ĩlĩ, ũsyao w’onthe ndũkese kwanangana, mbeũ ila wavandie, na ũsyao wa mũũnda wa mĩsavivũ.

10Ndũkaaĩme na ng’ombe na ĩng’oi vamwe.

11Ndũkaekĩe ngũa ĩvulanĩtye ndii sya mĩthemba ĩlĩ, ya w’ĩa wa ĩlondu na ya katane vamwe.

12Ĩsyũlĩlye manyenze motiivonĩ ana ma ngũa yaku ya kwĩvw’ĩka.

13Ethĩwa mũndũ o na wĩva etwaa mũka, na kũlika kwake, na kũmũmena,

14na kũmwilĩĩla maũndũ me nthoni, na kũmũetee syĩtwa ĩthũku, na kwasya, Natwaie mũndũ mũka ũũ, na yĩla namũthengeeie, ndyaona kwake mawonan’yo ma wĩĩtu;

15nĩvo ĩndĩ ĩthe wa mwĩĩtu, na inyia wake, makose mawonan’yo ma wĩĩtu wake na maetee atumĩa ma ndũa mbingĩlonĩ;

16na ĩthe wa mwĩĩtu akamatavye atumĩa, Namũnengie mũndũ ũũ mwĩĩtu wakwa ethĩwe mũka wake, nake nũnũũmũmena;

17na, sisya, nũmwilĩĩle maũndũ me nthoni; akyasya, Ndyaona mwĩĩtunĩ waku mawonan’yo ma wĩĩtu; ĩndĩ aa nĩmo mawonan’yo ma wĩĩtu wa mwĩĩtu wakwa. Na makalan’ye ngũa mbee wa atumĩa ma ndũa.

18Na atumĩa ma ndũa ĩsu makakwate mũndũ mũũme ũsu na kũmũkũna;

19na makamumye nthĩnzwa ya sekeli ĩana sya vetha, na kũmũnenga ĩthe wa mwĩĩtu, nĩkwĩthĩwa aeteeete mwĩĩtu wa Isilaeli syĩtwa ĩthũku: nake akeethĩwa mũka wake; ndakaamũeke mĩthenya yake yonthe.

20Ĩndĩ ethĩwa ũndũ ũsu nĩ wa w’o, atĩ mawonan’yo ma wĩĩtu matyaoneka mwĩĩtunĩ;

21nĩvo ĩndĩ makaete mwĩĩtu mũomonĩ wa nyũmba ya ĩthe wake, na aũme ma ndũa yake makamũkimange na mavia akw’e, nĩkwĩthĩwa nĩwĩkĩte ũtumanu nthĩnĩ wa Isilaeli, kwĩka ũmalwaya e nyũmbanĩ ya ĩthe wake; ũu nĩw’o wĩvetaa ũthũku kwaku.

22Ethĩwa mũndũ mũũme akooneka akomete na mũndũ mũka mũtwae, nĩvo ĩndĩ me elĩ moaawe, mũndũ mũũme ũla wakomie na mũka ũsu, na ũ mũndũ mũka: ũu nĩw’o wĩvetaa ũthũku wume nthĩnĩ wa Isilaeli.

23Ethĩwa ve mwĩĩtu ũla mũtheu na nĩwĩvaĩtwe, na mũndũ mũũme aimwĩthĩa ndũanĩ, na kũkoma nake;

24nĩvo ĩndĩ maumaalyei me elĩ mbingĩlonĩ ya ndũa ĩsu, na makimangei na mavia makw’e; mwĩĩtu, nũndũ ndaakaya, e ndũanĩ; na ũla mũndũ mũũme, nũndũ nĩwamũthũkisye mũka wa mũtũi wake: ũu nĩw’o wĩveta ũthũku wume kwaku.

25Ĩndĩ ethĩwa mũndũ mũũme akamwĩthĩa mwĩĩtu wĩvaĩtwe e mũũndanĩ, na mũndũ ũsu aimũkinda; mũndũ ũsu wakindana nakw’e e weka:

26ĩndĩ ndũkamwĩke mwĩĩtu ũndũ; mwĩĩtu ũsu nde na naĩ ya ũtuma oawa: nũndũ nĩ ta mũndũ ũmũkĩlĩle mũtũi na kũmũaa, nĩw’o ũilyĩ ũndũ ũsu;

27nĩkwĩthĩwa amwĩthĩie mũũndanĩ, na mwĩĩtu ũsu ũla wĩvaĩtwe akaya, na vatyĩĩ mũndũ wa ũmũtaan’ya.

28Ethĩwa mũndũ mũũme amwona mwĩĩtu mũtheu, ũte mwĩvasye, na aimũkwata, na kũkoma nake, na makyoneka;

29nĩvo mũndũ ũla wakomie nake amũnenge ĩthe wa mwĩĩtu sekeli mĩongo ĩtano sya vetha, nake natw’ĩke mũka wake, nĩkwĩthĩwa nĩwamũthũkisye; ndakaamũeke mĩthenya yake yonthe.

30Mũndũ ndakose mũka wa ĩthe, o na ndakamũvue ĩthe ngũa syake.

← Chapter 21 Jump to: Chapter 23 →