Deuteronomy 25

Kamba (Mbivilia) 1956

← Chapter 24 Jump to: Chapter 26 →

1Ethĩwa ve ngananĩo katĩ wa andũ, na maenda silanĩ, na asili mamasilan’ya; nĩvo mamũtw’e mũlũngalu ũla mũlũngalu, na kũmũtw’a mũvĩtan’ya ũla mũthũku.

2Na kũkeethĩwa, ethĩwa mũndũ ũsu mũthũku nĩwaĩlwe nĩ kũkũnwa, mũsili amũkomye nthĩ, na kũmũkũnĩthya mbee wa ũthyũ wake, kwĩanana na ũthũku wake, makũna makĩtalwa.

3Nũtonya kũmũkũna makũna mĩongo ĩna, na ndakavĩtũkye; mwana‐a‐au ndakese kwoneka kwaku e kĩvooi, ethĩwa akavĩtũkya, na kũmũkũna makũna maingĩ kwĩ asu.

4Ndũkamyove ng’ombe kanyw’a, ĩkĩvũa lĩu wa mbaa ngetha.

5Ethĩwa mũndũ na mwana‐a‐inyia mekalaa vamwe, na ũmwe aikw’a, na nde na mwana wa kavĩsĩ, kĩveti kya ũla wakwie kĩikatwawe nĩ mũeni: mwana‐a‐inyia wa mũũme akalike kwake, na kũmũtw’ĩkĩthya mũka wake, na kũmwĩka ũndũ waĩlĩte mwana‐a‐inyia wa mũũme.

6Na kũkeethĩwa, kana mwana wa mbee ũla ũkasyaa akaũngame vandũ va syĩtwa ya mwana‐a‐inyia ũla wakwie, syĩtwa yake yĩtikanangwe nthĩnĩ wa Isilaeli.

7Na ethĩwa ũ mũndũ ndekwenda kwosa mũka wa mwana‐a‐inyia, nĩvo mũka wa mwana‐a‐inyia akaende mbingĩlonĩ kwa atumĩa, na kũmea, Mwana‐a‐inyia wa mũemewa nũnũũlea kũmũũngamĩsya mwana‐a‐inyia syĩtwa nthĩnĩ wa Isilaeli; nũkũlea kũmbĩka ũndũ waĩlĩte mwana‐a‐inyia wa mũũme.

8Nĩvo atumĩa ma ndũa yake makamwĩte, na kũneena nake: na ethĩwa akaũngama, na kwasya, Ndikwenda ũmwosa;

9nĩvo mũka wa mwana‐a‐inyia wĩũka vala ũĩ atumĩa mamwene, na aimũthasya kĩatũ kyake kũkyumya kũũnĩ kwake, na aimũtw’ĩla mata ũthyũ; na akasũngĩa na kwasya, Ũu nĩw’o kwĩkawa mũndũ ũla ũtakaa nyũmba ya mwana‐a‐inyia.

10Na syĩtwa yake yĩkeetawa kwa Isilaeli, Nyũmba ya mumw’a kĩatũ.

11Yĩla aũme meũkita, na kĩveti kya ũmwe kĩkathengeea kũmũtaan’ya mũũme kw’okonĩ kwa ũla ũnũũmũkũna, na kũtambũũkya kw’oko kwakyo, na ũkwata ũũme wake;

12kĩtile kw’oko kwakyo, itho yaku yĩtikew’ĩe tei.

13Ngusunĩ yaku ndũkethĩwe na mavia mavathũkene ma ũthima namo, manene na manini.

14Nyũmbanĩ yaku ndũkethĩwe na ithimi ivathũkene, nene na nini.

15Ĩthĩwa na ĩvia yĩanĩe na ya w’o; ĩthĩwa na kĩthimi kĩanĩe na kya w’o: nĩ kana mĩthenya yaku yĩthĩwe mingĩ wĩ nthĩ ĩla Yeova Ngai waku ũkũnengae.

16Nũndũ onthe ala mekaa maũndũ ta asu, onthe ala mekaa ũla ũte ũlũngalu, nĩ ũthatyo kwa Yeova Ngai waku.

17Lilikana ũndũ Amaleki wakwĩkĩe nzĩanĩ wumĩte Misili;

18ũndũ wakomanie naku nzĩanĩ, na amakũna ala maĩ ĩtina, onthe ala mataĩ na vinya ĩtina waku, yĩla waĩ mũnyalu na waĩ na mĩnoo; na ndaamũkĩa Ngai.

19Kwondũ wa ũu kũkeethĩwa, yĩla Yeova Ngai waku wĩkũthũmũsya kuma amaithanĩ maku onthe ala me ndee, wĩ nthĩ ĩla Yeova Ngai waku ũkũnengae ũmĩmesye yĩthĩwe ũtiĩwa, no mũvaka wanange ũlilikan’yo wa Amaleki ĩtheo wa ĩtu; ndũkolwe.

← Chapter 24 Jump to: Chapter 26 →