Deuteronomy 12

Kamba (Mbivilia) 1956

← Chapter 11 Jump to: Chapter 13 →

1Ĩno nĩyo myamũlo na aa nĩmo motw’ĩo ala mũkasũvĩaa na kũmekaa mwĩ nthĩ ĩla Yeova, Ngai wa aaĩthe maku, ũkũnengete ũmĩmesye, mĩthenya yonthe ĩla ũkethĩwa thayũ kũũ nthĩ.

2Anangai vyũ kũndũ kw’onthe kũla mbaĩ ila mũkalũngya syathaithĩaa ngai syoo, na iĩmanĩ ndũlu, na tũlĩmanĩ, na ĩtina wa kĩla mũtĩ mwĩũ:

3na anangai ithembeo syoo, na tũlangai ituĩ syoo ilungu, na vĩvyai na mwaki Aselimu yoo; na temangai mĩvw’anano myasũvye ya ngai syoo; na anangai syĩtwa yoo vandũ vau.

4Mũtikamwĩke Yeova Ngai wenyu ũu.

5Ĩndĩ vandũ vala Yeova Ngai wenyu wĩnyuva nthĩnĩ wa mbaĩ syenyu syonthe avaie syĩtwa yake, nĩvo ũtũo wake vala mwĩelekela, na vau nĩvo wĩendaa;

6na vau mũkatwaaa nthembo syenyu sya kũvĩvw’a, na nthembo syenyu sya kũtonywa, na ilungu syenyu sya ĩkũmi, na nthembo ya kũkĩlw’a ya moko menyu, na mawĩvĩto menyu, na nthembo syenyu sya kumya na ngoo ya kwenda, na kĩla kĩsyawa mbee kya ndĩthya yenyu ya ng’ombe na ya mbũi na malondu:

7na vau mũkaya mbee wa Yeova Ngai wenyu, na mũkatanĩa kĩla ũndũ ũla mwĩkaa na moko menyu, inyw’ĩ na andũ ma nyũmba syenyu, ũla Yeova Ngai waku ũkũathimĩe.

8Mũtikeke mũkĩatĩĩa maũndũ onthe ala tũkwĩka vaa ũmũnthĩ, kĩla mũndũ o ũndũ wonaa wĩ ũseo methonĩ make;

9nũndũ mũtyaamba kũlika ũthũmũonĩ na ũtiĩwanĩ, ũla Yeova Ngai waku ũkũnengae.

10Ĩndĩ yĩla mwĩinga Yolotani, na kũtũa nthĩ ĩla Yeova Ngai wenyu wĩtuma ũmĩtiĩwa, nake aimũnenga kũthũmũa kuma amaithanĩ menyu ala mamũthyũlũlũkĩte, na ĩndĩ mũkikala mũte na mũisyo;

11nĩvo ĩndĩ kũkeethĩwa kana vala Yeova Ngai wenyu wĩnyuva, ayĩkalye syĩtwa yake vo, o vau mũkatwaa syonthe ila ngũmwĩaĩa: nthembo syenyu sya kũvĩvw’a, na nthembo syenyu sya kũtonywa, na ilungu syenyu sya ĩkũmi, na nthembo ya kũkĩlw’a ya moko menyu, na mawĩvĩto menyu onthe maseo ala mũmwĩvĩtĩaa Yeova.

12Tanai mbee wa Yeova Ngai wenyu, inyw’ĩ, na ana menyu, na eĩtu menyu, na athũkũmi menyu aũme, na athũkũmi menyu eĩtu, na Mũlivai ũla wĩ kwenyu, nũndũ nde na kĩanda kana ũtiĩwa vamwe nenyu.

13Ĩsũvĩe ndũkathembe nthembo syaku sya kũvĩvw’a kĩla vandũ wonaa;

14ĩndĩ vala Yeova wĩnyuva mbaĩnĩ ĩmwe yaku, vau nĩvo ũkathembea nthembo syaku sya kũvĩvw’a, na vau ũkeeka w’onthe ũla nĩkwĩaĩaa.

15Ĩndĩ, weew’a mũmeo ngoonĩ yaku, nũtonya kũaa nyamũ na kũya wĩ kwaku, kwĩanana na ũathimo wa Yeova Ngai waku ũla wakũnengie: ala avuku na ala atheu matonya kũmĩya, ta nyama ya kĩlong’a, na ya ndaatai nzamba.

16Ĩndĩ mũtikaye nthakame yasyo; mĩte nthĩ ta manzĩ.

17Ndũkaĩe kwaku kĩlungu kya ĩkũmi kya lĩu waku wa mbaa ngetha, kana kya mbinyu waku mbĩthĩ, kana kya mauta maku, kana kya kĩla kĩsyawa mbee kya ndĩthya yaku ya ng’ombe kana ya mbũi na malondu, kana mawĩvĩto maku o na meva ala ũmevĩtaa, kana nthembo syaku sya kumya na ngoo ya kwenda, kana nthembo ya kũkĩlw’a ya kw’oko kwaku;

18ĩndĩ ũkaiĩa mbee wa Yeova Ngai waku vala Yeova Ngai waku wĩnyuva, we, na mwana waku, na mwĩĩtu waku, na mũthũkũmi waku mũndũ mũũme, na mũthũkũmi waku mwĩĩtu, na Mũlivai ũla wĩ kwaku: na ũkatana mbee wa Yeova Ngai waku maũndũnĩ onthe ala mwĩkaa na moko maku.

19Ĩsũvĩe ndũkaaũlwe nĩ Mũlivai mĩthenya yonthe ĩla wĩ thayũ wĩ nthĩ yaku.

20Yĩla Yeova Ngai waku ũkongela mũvaka waku, o tondũ wakwathie, naku ũkasya, Ngaya nyama, nĩkwĩthĩwa ngoo yaku yĩ na mũmeo wa kũya nyama; nũtonya kũya nyama, o tondũ ngoo yaku ĩnĩkwenda.

21Ethĩwa vandũ vala Yeova Ngai waku wĩnyuva, ekĩe syĩtwa yake vo, vethĩwa kũasa naku, nĩvo ĩndĩ wĩũaa kuma ndĩthyanĩ yaku ya ng’ombe na ya mbũi na malondu, ila Yeova ũkũnengete, o tondũ nakwĩaĩe; na nũtonya kũya wĩ kwaku, o tondũ ngoo yaku ĩnĩkwenda.

22O tondũ kĩlong’a na ndaatai nzamba iĩsawa, o ta ũu ũkaiya: ala avuku na ala atheu matonya kwiya ũndũ ũmwe.

23Kwata ũndũ ũũ vyũ ndũkaaye nthakame: nũndũ nthakame nĩyo thayũ; na ndũkaaĩsanĩsye thayũ na nyama.

24Ndũkaamĩye; mĩte nthĩ ta manzĩ.

25Ndũkaamĩye; nĩ kana kwĩthĩwe ũseo kwaku, na kwa syana syaku ĩtina waku, yĩla ũkeka ũla Yeova wonaa wĩ ũseo.

26Ĩndĩ syĩndũ syaku ntheu ila wĩ nasyo, na mawĩvĩto maku, syose, na ũithi vala Yeova wĩnyuva;

27na ũkathembe nthembo syaku sya kũvĩvw’a, nyama na nthakame, kĩthembeonĩ kya Yeova Ngai waku; na nthakame ya nthembo syaku sya kũtonywa ĩta kĩthembeonĩ kya Yeova Ngai waku; naku ũkaya i nyama.

28Sũvĩa noyĩw’a ndeto ii syonthe ila nĩkwĩaĩaa, nĩ kana kwĩthĩwe ũseo kwaku, na kwa syana syaku ĩtina waku tene na tene, yĩla wĩĩkaa ũla Yeova Ngai waku wonaa wĩ ũseo na wa w’o.

29Yĩla Yeova Ngai waku ũkaivetanga i mbaĩ syume mbee waku, vala wĩlika kwilũngya, naku ũkailũngya, na kwĩkalaa nthĩ yasyo;

30ĩsũvĩe ndũkese kũkwatw’a wiatĩĩe, ĩtina wa kwanangwa kwasyo kumw’a mbee waku; na ndũkaakũlye ũvoo wa ngai syasyo, ũkyasya, Mbaĩ ii ithũkũmaa ngai syasyo ata? Nakwa nĩke o ta syo.

31Ndũkamwĩke ũu Yeova Ngai waku: nĩkwĩthĩwa kĩla ũndũ wa ũmũthatya Yeova, ũla ũmenaa, nĩsyeekĩte ngai syasyo; nũndũ o na ana masyo na eĩtu masyo nivĩvĩasya na mwaki ngai syasyo.

32Kĩla ndeto nĩmwĩaĩaa, mĩsũvĩe na kũmĩka: ndũkamyongele, kana kũmĩola.

← Chapter 11 Jump to: Chapter 13 →