Deuteronomy 29

Kamba (Mbivilia) 1956

← Chapter 28 Jump to: Chapter 30 →

1Ii nĩsyo ndeto sya ũtianĩo ũla Yeova wamwĩaĩe Mose atianĩe na ana ma Isilaeli nthĩ ya Moavi, vamwe na ũtianĩo ũla watianĩe nao Olevu.

2Na Mose ameta Isilaeli onthe, na amea, Nĩmwonete na metho menyu w’onthe ũla Yeova wamwĩkĩe Valao ku Misili, na athũkũmi make onthe, na nthĩ yake yonthe;

3mathĩna manene ala metho maku moonie, na syama, na moseng’yo asu manene:

4ĩndĩ Yeova ndaamũnenga inyw’ĩ ngoo ya kũmanya, na metho ma kwona, na matũ ma kwĩw’a, kũvika ũmũnthĩ.

5Nakwa nĩnamũtongoesye myaka mĩongo ĩna weũnĩ: ngũa syenyu ila mweekĩe ityaakũa, na iatũ syenyu ila mweekĩe maũũ ityaakũa.

6Mũtyaĩsaa kĩmũtũ, o na mũtyanyusaa mbinyu kana kĩla kĩtoonasya; nĩ kana mũmanye atĩ ninyie Yeova Ngaĩ wenyu.

7Na mwavika vaa, Sioni mũsumbĩ wa Esivoni, na Oku mũsumbĩ wa Mbasani, matumĩlĩla mokite naitũ, na twamakũna:

8na twoosa nthĩ yoo, na twamanenga Aleuveni, na Angati, na nyunzu ya mbaĩ ya Amanase yĩthĩwe ũtiĩwa.

9Kwatai ĩndĩ ndeto sya ũtianĩo ũũ, na mũisyĩka, nĩ kana ũndũnĩ w’onthe ũla mwĩkaa, mũathimĩke.

10Ũmũnthĩ inyw’onthe nĩmũũngeme mbee wa Yeova Ngai wenyu; atongoi menyu, mbaĩ syenyu, atumĩa menyu, na anene menyu, o andũ onthe ma Isilaeli,

11twana twenyu tũnini, iveti syenyu, na mwĩkali waku wa ũeninĩ ũla wĩ myakonĩ yaku ya maeema, kuma ũla unaa ngũ syaku kũvika ũla ũtavaa manzĩ maku;

12nĩ kana ũlike ũtianĩonĩ wa Yeova Ngai waku, na wĩvĩtonĩ wake, ũla Yeova Ngai waku ũnũũtianĩa naku ũmũnthĩ;

13nĩ kana akũlũmye ũmũnthĩ wĩthĩwe ũko wa andũ make, na nĩ kana ethĩwe Ngai waku, o tondũ waneenie naku, na tondũ wamevĩtĩe aaĩthe maku Avalaamu, na Isaka, na Yakovo.

14Na ti inyw’ĩ mwĩ inyw’oka ala ngũtianĩa ũtianĩo ũũ nenyu na wĩvĩto ũũ,

15ĩndĩ o nake ũla ũũngeme vaa vamwe naitũ ũmũnthĩ mbee wa Yeova Ngai waitũ, o na ũla ũte vaa vamwe naitũ ũmũnthĩ

16(nũndũ nĩmwĩsĩ ũndũ twatwĩe nthĩ ya Misili, na ũndũ twavĩtĩla katĩ wa mbaĩ ila mwavĩtĩle katĩ wasyo;

17na inyw’ĩ nĩmwonete mothatyo moo, na mĩvw’anano yoo, ya mĩtĩ na mavia, vetha na thaavu, ĩla yaĩ kwoo);

18kũikese kwĩthĩwa katĩ wenyu mũndũ mũũme, kana mũndũ mũka, kana mũvĩa, kana mbaĩ, ĩla ũmũnthĩ ĩnĩkwĩthyũũa ngoonĩ na kũtia Yeova Ngai waitũ, ĩthũkũme ngai sya mbaĩ isu; kũikese kwĩthĩwa kwenyu kĩtina kĩla kĩsyaa nyongo na kĩndũ kĩ ũũ;

19na kũkethĩwa, yĩla ũkew’a ndeto sya kĩumo kĩĩ, akeathima ngoonĩ yake, akyasya, Ngeethĩwa na mũuo, o na naendeea kũatĩĩa ũng’endu wa ngoo yakwa, kwongeleela ũthengi waũni.

20Yeova ndakamũekea, ĩndĩ ũthatu wa Yeova na kĩwĩu kyake ikamũtoesya mũndũ ũsu syũki, na kĩumo kyonthe kĩla kĩandĩkĩtwe ĩvukunĩ yĩĩ kĩkeethĩwa ĩũlũ wake, na Yeova akaananga syĩtwa yaku ĩtheo wa ĩtu.

21Na Yeova akamũvatha aume mbaĩnĩ syonthe sya Isilaeli akwatwe nĩ ũthũku, kwĩanana na iumo syonthe sya ũtianĩo ũla ũandĩkĩtwe ĩvukunĩ yĩĩ ya mĩao.

22Na nzyawa ĩla yũkĩte, nayo nĩ syana syenyu ila ikokĩla ĩtina wenyu, na mũeni ũla ũkoka kuma nthĩ yĩ kũasa, makasya, moona mothĩn’yo ma nthĩ ĩsu, na mowau ala Yeova wamĩwaisye;

23na kana nthĩ yayo yonthe nĩ mũvĩlĩtĩ na mũnyũ, na maũvĩvye, ũndũ ĩtavandĩka, o na kũsyaa, o na ndĩmesya nyeki, o tondũ kwailyĩ kũng’uthũlangwa kwa Sotomo na Ngomola, Atima na Nzevoiimu, ila Yeova wang’uthũlangile ũthatunĩ wake, na kũthilĩkanĩ kwake:

24o mbaĩ syonthe ikasya, Nĩkĩ Yeova wĩkĩte nthĩ ĩno ũu? Kĩtumi nĩ kyaũ kya ũthatu ũvyũvĩte ũu?

25Nĩvo andũ measya, Nĩkwĩ thĩwa matiie ũtianĩo wa Yeova, Ngai wa aaĩthe moo, ũla watianĩe namo yĩla wamaumisye nthĩ ya Misili,

26na maenda na kũthũkũma ngai ingĩ, na maithaitha, ngai ila mataamanya, na ila ũtaamanenga:

27kwondũ wa ũu ũthatu wa Yeova wakanĩe nthĩ ĩno, amĩetee kĩumo kyonthe kĩla kĩandĩkĩtwe ĩvukunĩ yĩĩ;

28na Yeova amakũa nthĩ yoo e na ũthatu, na ũthilĩku, na woo mwingĩ, na amekya nthĩ ĩngĩ, o ũndũ kũilyĩ ũmũnthĩ.

29Maũndũ mavithe nĩ ma Yeova Ngai waitũ; ĩndĩ maũndũ mavuan’ye nĩ maitũ na ma syana sitũ tene na tene, nĩ kana twĩkae ndeto syonthe sya mĩao ĩno.

← Chapter 28 Jump to: Chapter 30 →