Deuteronomy 11

Kamba (Mbivilia) 1956

← Chapter 10 Jump to: Chapter 12 →

1Kwondũ wa ũu mwende Yeova Ngai waku, na kwata wĩaĩo wake, na myamũlo yake, na motw’ĩo make, na mĩao yake, mavinda onthe.

2Na manyai ũmũnthĩ: nũndũ ndiũneena na syana syenyu ila itesĩ, na itaona ũsilĩlo wa Yeova Ngai wenyu, na ũnene wake, na kw’oko kwake kwĩ vinya, na kw’oko kwake kũtambũũku,

3na syama syake, na mawĩa make, ala wamwĩkie Valao mũsumbĩ wa Misili, na nthĩ yake yonthe, kũu Misili;

4na ũndũ wasyĩkie ita sya Misili, mbalasi syoo, na makasya moo ma kaũ; ũndũ wamavw’ĩkie na manzĩ ma Ũkanga Mũtune makĩmũatĩĩa, na ũndũ Yeova wamanangie kũvika ũmũnthĩ;

5na ũndũ wamwĩkie inyw’ĩ mwĩ weũnĩ, kũvika mwavika vaa;

6na ũndũ wamekie Ndathani na Avilamu, ana ma Eliavu, mwana wa Leuveni; ũndũ nthĩ yathamisye kanyw’a wayo, na yamamelya, na andũ ma nyũmba syoo, na maeema moo, na kĩla kĩndũ kyaĩ thayũ maĩ nakyo, nthĩnĩ wa Isilaeli onthe:

7ĩndĩ metho menyu nĩmonete wĩa w’onthe mũnene wa Yeova ũla wekie.

8Kwondũ wa ũu kwatai mwĩao w’onthe ũla ngũmwĩaĩa ũmũnthĩ, nĩ kana mwĩthĩwe na vinya, na kũlika na kũmesya nthĩ, ĩla mwĩinga mũkamĩmesye;

9na nĩ kana mwingĩvye mĩthenya yenyu nthĩ ĩsu, ĩla Yeova wamevĩtĩe aaĩthe menyu kũmanenga na ũsyao woo, nthĩ yusũĩte ĩia na ũkĩ wa nzũkĩ.

10Nũndũ nthĩ, ĩla wĩlika ũmĩmesye, ndĩilyĩ nthĩ ya Misili vala mwaumie, vala wavandie mbeũ yaku, na kũmĩnyithya na kũũ kwaku, o ta mũũnda wa mboka;

11ĩndĩ nthĩ, ĩla mwĩinga mũkamĩmesye, nĩ nthĩ yĩ iĩma na myanda, na ĩnyusaa manzĩ ma mbua ya ĩtunĩ,

12nthĩ ĩla Yeova Ngai waku ũsũvĩaa: metho ma Yeova Ngai waku mamĩsyaĩĩsyaa mavinda onthe, kuma mwambĩlĩlyo wa mwaka kũvika mũminũkĩlyo wa mwaka.

13Na kũkeethĩwa, ethĩwa mũkethukĩĩasya mũno mĩao yakwa ĩla ngũmwĩaĩa ũmũnthĩ, mũmwende Yeova Ngai wenyu, na kũmũthũkũma na ngoo yaku yonthe na thayũ waku w’onthe,

14nĩvo ĩndĩ uganengane mbua ya nthĩ yenyu kyathĩ kyayo, mbua ya nthwa na mbua ya uũa, nĩ kana ũtonye kũketha lĩu waku wa mbaa ngetha, na mbinyu yaku mbĩthĩ, na mauta maku.

15Ngamesya nyeki isesinĩ syaku kwondũ wa indo syaku, naku ũkaya na kũvũna.

16Ĩsũvĩei, ngoo syenyu itikakengwe, na inyw’ĩ mũkyathũka, na kũthũkũma ngai ingĩ, na kwithaitha;

17na ũthatu wa Yeova ũkĩmwakanĩa, nake aivinga matu, kũikethĩwe mbua, na nthĩ ĩilea kũsyaa ũsyao wayo; nenyu mũkyanangĩka mĩtũkĩ mume nthĩ nzeo ĩla Yeova ũmũnengae.

18Kwondũ wa ũu iai ndeto ii syakwa ngoonĩ yenyu na mathayũnĩ menyu; na syoveei kw’okonĩ kwenyu syĩthĩwe wonan’yo, na syĩthĩwe ũlilikan’yo katĩ wa metho menyu.

19Na imanyĩasye syana syenyu, mũkĩneena ũvoo wasyo, yĩla ũilyĩ nyũmbanĩ yaku, na yĩla ũendaa nzĩanĩ, na yĩla ũkomaa, na yĩla wũkĩlaa.

20Na iandĩke mĩtĩnĩ ĩla yĩ ndee sya mĩomo ya nyũmba yaku, na mbingĩlonĩ syaku;

21nĩ kana mĩthenya yaku yingĩvw’e, na mĩthenya ya syana syaku, wĩ nthĩ ĩla Yeova wamevĩtĩe aaĩthe maku kũmanenga, o ta mĩthenya ya matu me ĩũlũ wa nthĩ.

22Nũndũ ethĩwa mũkakwata na kĩthing’ĩĩsyo mwĩao ũũ w’onthe ũla ngũkwĩaĩa, na kũwĩka, na kũmwendaa Yeova Ngai wenyu, na kũendaa nzĩanĩ syake syonthe, na kũlũman’ya nake;

23nĩvo ĩndĩ Yeova wĩlũngya mbaĩ isu syonthe syume mbee wenyu, na mũkosa nthĩ ya mbaĩ nene na syĩ vinya kwĩ inyw’ĩ.

24Kĩla vandũ vala ũnyaĩĩ wenyu ũkakinya vakeethĩwa venyu: kuma weũnĩ, na Levanoni, kuma ũsĩnĩ, naw’o nĩ ũsĩ wa Euvalati, o na kũvika ũkanga wa ũthũĩlonĩ wa syũa kũkeethĩwa mũvaka wenyu.

25Vai mũndũ ũkatonya kũũngama mbee wenyu: Yeova Ngai wenyu akeekĩa w’ĩa kwondũ wenyu na ũtĩsyo kwondũ wenyu nthĩ yonthe ĩla mũkakinyĩla, o tondũ wamũtavisye.

26Sisya, ũmũnthĩ nĩngwia mbee wenyu ũathimo na kĩumo:

27ũathimo, ethĩwa mũkeethukĩĩasya mĩao ya Yeova Ngai wenyu, ĩla ngũmwĩaĩa ũmũnthĩ;

28na kĩumo, ethĩwa mũtikethukĩĩasya mĩao ya Yeova Ngai wenyu, ĩndĩ mũkyathũka kuma nzĩanĩ ĩla ngũmwĩaĩa ũmũnthĩ, mũatĩĩe ngai ingĩ, ila mũtaaimanya.

29Na kũkeethĩwa, yĩla Yeova Ngai waku wĩkũlikya nthĩ ĩla mwĩthĩ kũmĩmesya, nĩvo ũkaia ũathimo kĩĩmanĩ kya Ngelisimu, na kĩumo kĩĩmanĩ kya Evali.

30Isu iti mũingo wa Yolotani, ĩtina wa nzĩa ya ũthũĩlonĩ wa syũa, nthĩ ya Akanaani ala matwĩe Alava, kwelekela Ngilikali, vakuvĩ na myaloni ya Mole?

31Nĩkwĩthĩwa nĩmũinga Yolotani mũlike mũmesye nthĩ ĩla Yeova Ngai wenyu ũmũnengae, na mũkamĩmesya, na kũmĩtĩnĩka.

32Na inyw’ĩ sũvĩai na mũyĩka myamũlo yonthe na motw’ĩo ala ngwia mbee wenyu ũmũnthĩ.

← Chapter 10 Jump to: Chapter 12 →