2 Kings 11

Khmer 2014 (អាល់គីតាប)

← Chapter 10 Jump to: Chapter 12 →

1កាលនាងអថា‌លា ជាម្តាយរបស់ស្តេចអហា‌ស៊ីយ៉ាជ្រាបថា កូនស្លាប់ហើយ នាងចេញបញ្ជាឲ្យគេសម្លាប់រាជវង្សា‌នុវង្សទាំងអស់។

2ពេលនោះនាងយ៉ូសេ‌បា ជាបុត្រីរបស់ស្តេចយ៉ូរ៉ាម និងជាប្អូនរបស់ស្តេចអហា‌ស៊ីយ៉ា បានយកស្តេចយ៉ូអាស ជាបុត្រារបស់ស្តេចអហា‌ស៊ីយ៉ា ពីក្នុងចំណោមបុត្រារបស់ស្តេច ដែលត្រូវគេសម្លាប់នោះទៅលាក់ទុក។ នាងនាំកូននោះទៅលាក់នៅបន្ទប់ដេកមួយក្នុងម៉ាស្ជិទ ព្រមទាំងឲ្យមេដោះនៅជាមួយផង។ គេបានលាក់កុមារមិនឲ្យនាងអថា‌លាឃើញ ដូច្នេះកុមារក៏រួចពីស្លាប់។

3ក្នុងពេលដែលនាងអថា‌លាគ្រងរាជ្យ កុមារបានលាក់ខ្លួនជាមួយមេដោះក្នុងដំណាក់របស់ អុលឡោះ‌តាអាឡា អស់រយៈពេលប្រាំមួយឆ្នាំ។

4លុះដល់ឆ្នាំទីប្រាំពីរ អ៊ីមុាំយេ‌ហូ‌យ៉ា‌ដាចាត់គេទៅអញ្ជើញពួកនាយទាហានស្តេច ដែលជាជន‌ជាតិការី និងពលទាហានមកជួបនឹងគាត់នៅដំណាក់របស់ អុលឡោះ‌តាអាឡា ។ គាត់បានចុះកិច្ច‌សន្យាជាមួយពួកគេ ព្រមទាំងសុំឲ្យពួកគេស្បថក្នុងដំណាក់របស់ អុលឡោះ‌តាអាឡា រួចគាត់នាំបុត្រារបស់ស្តេចមកបង្ហាញឲ្យពួកគេឃើញ។

5បន្ទាប់មកគាត់បញ្ជាពួកគេថា៖ «អ្នករាល់គ្នាត្រូវធ្វើដូចតទៅ: ក្នុងចំណោមអ្នករាល់គ្នាដែលត្រូវវេនយាមនៅថ្ងៃឈប់សម្រាក មួយភាគបីត្រូវយាមដំណាក់ស្តេច

6មួយភាគបីត្រូវយាមនៅត្រង់មាត់ទ្វារស៊ើរ និងមួយភាគបីទៀត ត្រូវយាមនៅទ្វារខាងក្រោយកន្លែងប្រចាំការ។ ក្រុមទាំងបីនេះត្រូវប្តូរវេនគ្នាយាមដំណាក់។

7រីឯអ្នករាល់គ្នាពីរក្រុមទៀត ដែលមិនត្រូវវេនយាមនៅថ្ងៃឈប់សម្រាកត្រូវយាមដំណាក់របស់ អុលឡោះ‌តាអាឡា ដើម្បីការ‌ពារស្តេច។

8អ្នករាល់គ្នាត្រូវប្រដាប់អាវុធគ្រប់ដៃ នៅការ‌ពារជុំ‌វិញស្តេច។ បើនរណាម្នាក់ហ៊ានចូលមកជិតជួរទ័ពរបស់អ្នករាល់គ្នា ត្រូវសម្លាប់ចោល។ ចូរនៅជាប់ជាមួយស្តេចជា‌និច្ច ទោះបីគាត់ចេញ ឬចូលក៏ដោយ»។

9ពួកមេ‌ទ័ពនាំគ្នាធ្វើតាមបញ្ជាទាំងប៉ុន្មានរបស់អ៊ីមុាំយេហូ‌យ៉ាដា ម្នាក់ៗនាំកូនទាហានរបស់ខ្លួន ទាំងអ្នកត្រូវវេនយាមនៅថ្ងៃឈប់សម្រាក ទាំងអ្នកមិនត្រូវវេនយាម ហើយទៅជួបអ៊ីមុាំយេហូ‌យ៉ាដា។

10អ៊ីមុាំចែកលំពែង ព្រមទាំងខែលរបស់ស្តេចទត ដែលតម្កល់ទុកក្នុងដំណាក់របស់ អុលឡោះ‌តាអាឡា ជូនពួកមេ‌ទ័ពទាំងនោះ។

11ពលទាហានប្រដាប់អាវុធគ្រប់ៗដៃ ឈរយាមនៅមុខដំណាក់ និងនៅជិតអាសនៈចាប់ពីប៉ែកខាងស្តាំរហូតដល់ប៉ែកខាងឆ្វេងដំណាក់ ដើម្បីការ‌ពារស្តេច។

12ពេលនោះ អ៊ីមុាំអញ្ជើញបុត្ររបស់ស្តេចចេញមក ហើយយកមកុដរាជ្យមកបំពាក់ ព្រមទាំងជូនឯក‌សារនៃសម្ពន្ធ‌មេត្រីផង រួចគេតែង‌តាំងកុមារជាស្តេច។ គេនាំគ្នាទះដៃស្រែកជយ‌ឃោសថា៖ «ជយោ! ស្តេច!»។

13កាលនាងអថា‌លាឮសំរែកពលទាហាន និងប្រជា‌ជន នាងក៏ទៅមើលពួកគេនៅក្នុងដំណាក់របស់ អុលឡោះ‌តាអាឡា ។

14នាងឃើញស្តេចថ្មី ឈរនៅលើវេទិកា តាមទំនៀម‌ទម្លាប់ដោយមានមេ‌ទ័ព និងអ្នកផ្លុំត្រែឈរអមផង។ ប្រជា‌ជនទាំងមូលនៅក្នុងស្រុកនាំគ្នាអប‌អរសាទរ ហើយគេក៏ផ្លុំត្រែឡើង។ នាងអថា‌លាហែកអាវស្រែកថា៖ «នេះជាអំពើក្បត់! នេះជាអំពើក្បត់!»។

15អ៊ីមុាំយេហូ‌យ៉ាដាបញ្ជាពួកមេ‌ទ័ពដែលគ្រប់‌គ្រងលើពលទ័ពថា៖ «ចូរនាំនាងចេញទៅក្រៅ! បើនរណាគាំទ្រនាង ចូរសម្លាប់ដោយមុខដាវទៅ!»។ អ៊ីមុាំនិយាយទៀតថា៖ «មិនត្រូវប្រហារជីវិតនាងនៅក្នុងដំណាក់របស់ អុលឡោះ‌តាអាឡា ឡើយ!»។

16គេចាប់នាងនាំទៅវាំងវិញ។ កាលមកដល់ខ្លោងទ្វារសេះ គេប្រហារជីវិតនាងនៅទីនោះ។

17លោកយេហូ‌យ៉ាដាចងសម្ពន្ធ‌មេត្រីរវាង អុលឡោះ‌តាអាឡា ស្តេច និងប្រជា‌រាស្ត្រ ដើម្បីឲ្យពួកគេធ្វើជាប្រជា‌រាស្ត្ររបស់ អុលឡោះ‌តាអាឡា ។ លោកក៏បានចងសម្ពន្ធ‌មេត្រីរវាងស្តេច និងប្រជា‌រាស្ត្រដែរ។

18ប្រជា‌ជនទាំងមូលនៅក្នុងស្រុកនាំគ្នាចូលទៅបំផ្លាញវិហាររបស់ព្រះបាល ហើយវាយកំទេចអាសនៈ និងរូបសំណាក ព្រមទាំងសម្លាប់លោកម៉ាត់‌ថានជាបូជា‌ចារ្យរបស់ព្រះបាលនៅមុខអាសនៈទៀតផង។ លោកយេហូ‌យ៉ាដាបានចាត់ចែងឲ្យមានអ្នកមើលខុសត្រូវលើដំណាក់របស់ អុលឡោះ‌តាអាឡា ។

19បន្ទាប់មក គាត់នាំពួកមេ‌ទ័ព ពួកនាយទាហានស្តេចដែលជាជន‌ជាតិការី និងពលទាហាន ព្រមទាំងប្រជា‌ជនទាំងមូលនៅក្នុងស្រុក ដង្ហែស្តេចពីដំណាក់របស់ អុលឡោះ‌តាអាឡា ចូលវាំងតាមខ្លោងទ្វារនៃពួកអ្នកយាម រួចហើយស្តេចយ៉ូអាសឡើងនៅលើបល្ល័ង្ករាជ្យ។

20ប្រជា‌ជនទាំងមូលនៅក្នុងស្រុកនាំគ្នាអបអរសាទរ ហើយទី‌ក្រុងក៏បានសុខ‌សាន្ត។ គេបានប្រហារជីវិតនាងអថា‌លានៅក្នុងវាំង។

21ស្តេចយ៉ូអាសឡើងសោយរាជ្យក្នុងវ័យប្រាំពីរឆ្នាំ

← Chapter 10 Jump to: Chapter 12 →