2 Kings 12

Khmer 2014 (អាល់គីតាប)

← Chapter 11 Jump to: Chapter 13 →

1គឺនៅឆ្នាំទីប្រាំពីរក្នុងរជ្ជកាលស្តេចយេហ៊ូវ ជាស្តេចស្រុកអ៊ីស្រ‌អែល គាត់សោយ‌រាជ្យបានសែ‌សិប‌ឆ្នាំ នៅក្រុងយេរូ‌សាឡឹម។ រីឯម្តាយរបស់ស្តេចមាននាមថា ស៊ីប‌យ៉ាជាអ្នកស្រុកបៀរ‌សេ‌បា។

2ស្តេចយ៉ូអាសប្រព្រឹត្តអំពើសុចរិត ជាទីគាប់បំណងអុលឡោះ‌តាអាឡា អស់មួយជីវិត ដូចអ៊ីមុាំយេហូ‌យ៉ាដាបានបង្ហាត់បង្រៀន។

3ប៉ុន្តែ ស្តេចមិនបានលុបបំបាត់កន្លែងសក្ការៈតាមទួលខ្ពស់ៗទេ។ ប្រជា‌ជននៅតែធ្វើគូរបាន និងដុតគ្រឿងក្រអូប តាមទួលខ្ពស់ៗដដែល។

4ស្តេចយ៉ូអាសបញ្ជាទៅកាន់ពួកអ៊ីមុាំថា៖ «ចំពោះប្រាក់ទាំងប៉ុន្មាន ដែលគេយកមកជូនជាជំនូន ក្នុងដំណាក់របស់ អុលឡោះ‌តាអាឡា គឺប្រាក់ដែលប្រជា‌ជនយកមកបង់ពន្ធសម្រាប់ដំណាក់ ប្រាក់បានមកពីជំនូនលោះមនុស្ស ស្របតាមការវាយតម្លៃ និងជំនូនស្ម័គ្រចិត្ត ដែលគេយកមកជូនដំណាក់របស់ អុលឡោះ‌តាអាឡា

5នោះឲ្យក្រុមអ៊ីមុាំទទួលយក គឺម្នាក់ៗត្រូវទទួលយកចំណែករបស់ខ្លួនពីអ្នកដែលខ្លួនស្គាល់ ដើម្បីជួស‌ជុលកន្លែងបាក់បែកទាំងប៉ុន្មាននៅក្នុងដំណាក់ ដែលគេយល់ថាចាំ‌បាច់គួរតែជួស‌ជុល»។

6ប៉ុន្តែ រហូតមកដល់ឆ្នាំទីម្ភៃបីនៃរជ្ជកាលស្តេចយ៉ូអាស ក្រុមអ៊ីមុាំពុំទាន់បានជួស‌ជុលកន្លែងបាក់‌បែកក្នុងដំណាក់នៅឡើយទេ។

7ស្តេចយ៉ូអាសកោះហៅអ៊ីមុាំយេហូ‌យ៉ាដា ព្រមទាំងអ៊ីមុាំឯទៀតៗមក រួចសួរថា៖ «ហេតុអ្វីបានជាអស់លោកមិនជួស‌ជុលកន្លែងបាក់‌បែកក្នុងដំណាក់? ចាប់ពីពេលនេះតទៅ អស់លោកមិនត្រូវទទួលប្រាក់ពីអ្នកស្គាល់ទៀតឡើយ តែត្រូវបង្វិលប្រាក់នេះ សម្រាប់ការជួស‌ជុលដំណាក់វិញ»។

8ដូច្នេះ ពួកអ៊ីមុាំក៏ឈប់ទទួលប្រាក់ពីប្រជា‌ជន និងលែងទទួលបន្ទុកលើការជួស‌ជុលដំណាក់ទៀត។

9អ៊ីមុាំយេហូ‌យ៉ាដា យកហិបមួយចោះរន្ធលើគំរប រួចដាក់នៅខាងស្តាំអាសនៈ ត្រង់មាត់ទ្វារចូលដំណាក់។ ពួកអ៊ីមុាំជាអ្នកយាមនៅមាត់ទ្វារ ដាក់ប្រាក់ទាំងអស់ដែលគេយកមកជូនដំណាក់ ក្នុងហិបនោះ។

10កាលណាគេឃើញមានប្រាក់ច្រើននៅក្នុងហិបហើយ លោកស្មៀនស្តេច និងមូស្ទីក៏មកទទួលប្រាក់ នៅក្នុងដំណាក់ យកទៅរាប់ រួចទុកក្នុងថង់មួយ។

11បន្ទាប់មក លោកប្រគល់ប្រាក់នោះឲ្យពួកមេជាងដែលទទួលបន្ទុកលើការងារជួស‌ជុលដំណាក់របស់ អុលឡោះ‌តាអាឡា ។ គេប្រើប្រាក់នោះសម្រាប់ជួលជាងឈើ និងជាងសំណង់ដែលត្រូវជួស‌ជុលដំណាក់របស់ អុលឡោះ‌តាអាឡា

12ព្រមទាំងជួលជាងកំបោរ ជាងដាប់ថ្ម ហើយទិញឈើ និងថ្មដាប់សម្រាប់ជួស‌ជុលកន្លែងបាក់បែកក្នុងដំណាក់របស់ អុលឡោះ‌តាអាឡា ។ ប្រាក់នេះក៏ប្រើសម្រាប់ការចំណាយគ្រប់ប្រភេទ ក្នុងការជួស‌ជុលដំណាក់ឡើងវិញ។

13ប៉ុន្តែ គេពុំបានប្រើប្រាក់ដែលប្រជា‌ជនយកមកជូនក្នុងដំណាក់របស់ អុលឡោះ‌តាអាឡា ទៅធ្វើពាន ប្រាក់ កាំបិត ថូ ត្រែ ឬប្រដាប់‌ប្រដាអ្វីផ្សេងទៀតអំពីមាសប្រាក់ សម្រាប់ដំណាក់របស់ អុលឡោះ‌តាអាឡា ឡើយ។

14គេប្រគល់ប្រាក់នេះ ឲ្យអស់អ្នកដែលទទួលបន្ទុកលើការងារ សម្រាប់ប្រើប្រាស់ជួស‌ជុលដំណាក់របស់ អុលឡោះ‌តាអាឡា ។

15គេពុំបានត្រួតពិនិត្យអស់អ្នកដែលយកប្រាក់នោះ ទៅបើកឲ្យពួកជាងទេ ដ្បិតពួកគេធ្វើការនេះដោយចិត្តស្មោះ‌ស្ម័គ្របំផុត។

16រីឯប្រាក់ជំនូនដែលប្រជា‌ជនយកមកធ្វើជាគូរបានសុំលើក‌លែងទោស និងគូរបានរំដោះបាប គេពុំបានទុកសម្រាប់ដំណាក់របស់ អុលឡោះ‌តាអាឡា ទេ គឺប្រាក់នោះត្រូវបានជាចំណែករបស់ពួកអ៊ីមុាំវិញ។

17នៅគ្រានោះ ស្តេចហាសែល ជាស្តេចស្រុកស៊ីរី ឡើងមកវាយ និងដណ្តើមយកបានក្រុងកាថ។ បន្ទាប់មកស្តេចហាសែលលើកទ័ពតម្រង់ឆ្ពោះទៅក្រុងយេរូ‌សាឡឹមទៀត។

18ស្តេចយ៉ូអាសស្តេចស្រុកយូដា ប្រមូលវត្ថុមានតម្លៃទាំងប៉ុន្មាន នៅក្នុងដំណាក់របស់ អុលឡោះ‌តាអាឡា និងនៅក្នុងវាំង ជាវត្ថុដែលស្តេចស្រុកយូដា ជាអយ្យ‌កោ គឺស្តេចយ៉ូសា‌ផាត ស្តេចយ៉ូរ៉ាម និងស្តេចអហា‌ស៊ីយ៉ា បានជូនជាជំនូនព្រមទាំងវត្ថុដែលស្តេចផ្ទាល់បានជូនជាជំនូន ហើយចាត់គេឲ្យនាំយកទៅជូនស្តេចហាសែល ជាស្តេចស្រុកស៊ីរី។ ហេតុនេះ ស្តេចក្រុងស៊ីរីក៏ដកទ័ពថយ ឈប់វាយក្រុងយេរូ‌សាឡឹម។

19រីឯកិច្ច‌ការផ្សេងៗទៀតរបស់ស្តេចយ៉ូអាស និងអ្វីៗទាំងអស់ដែលស្តេចបានធ្វើ សុទ្ធតែមានកត់‌ត្រាទុក ក្នុងសៀវភៅប្រវត្តិ‌សាស្ត្ររបស់ស្តេចស្រុកយូដា។

20មេ‌ទ័ពរបស់ស្តេចបានក្រោកឡើង រួមគំនិតគ្នាក្បត់នឹងស្តេចយ៉ូអាស។ ពួកគេសម្លាប់ស្តេច នៅប៉មមីឡូតាមផ្លូវចុះទៅស៊ីឡា។

21មេ‌ទ័ពដែលបានសម្លាប់ស្តេច គឺលោកយ៉ូសាការ ជាកូនរបស់លោកស៊ីមាត និងលោកយ៉ូសា‌បាឌ ជាកូនរបស់លោកសូមើរ។ គេបានបញ្ចុះសពស្តេចក្នុងផ្នូររបស់រាជ‌វង្ស នៅបុរីស្តេចទត ហើយស្តេចអម៉ា‌ស៊ីយ៉ា ជាកូន បានឡើងស្នងរាជ្យ។

← Chapter 11 Jump to: Chapter 13 →