Numbers 3 — Khmer 2014 (អាល់គីតាប)

4លោកណាដាប និងលោកអប៊ីហ៊ូវ បានបាត់បង់ជីវិតនៅចំពោះ អុលឡោះ‌តាអាឡា ក្នុងពេលដែលអ្នកទាំងពីរយកភ្លើងមិនសក្ការៈ ចូលទៅក្នុងទីសក្ការៈរបស់ អុលឡោះ‌តាអាឡា នៅវាលរហោ‌ស្ថានស៊ីណៃ។ អ្នកទាំងពីរគ្មានកូនប្រុសទេ។ លោកអេឡា‌សារ និងលោកអ៊ីថា‌ម៉ារ បំពេញមុខងារជាអ៊ីមុាំ ក្រោមបន្ទុករបស់ហារូន ជាឪពុក។

5អុលឡោះ‌តាអាឡា មានបន្ទូលមកម៉ូសាថា៖

6«ចូរនាំកុល‌សម្ព័ន្ធលេវីចូលមក ហើយឲ្យពួកគេនៅក្រោមបង្គាប់របស់អ៊ីមុាំហារូន ដើម្បីជួយបំពេញការងារគាត់។

7ពួកគេមានភារកិច្ចបំពេញមុខងារបម្រើហារូន និងបម្រើសហគមន៍អ៊ីស្រ‌អែលទាំងមូល នៅមុខជំរំជួបអុលឡោះ‌តាអាឡា គឺពួកគេបម្រើកិច្ចការនៅក្នុងជំរំ‌សក្ការៈ។

8ពួកគេត្រូវថែទាំគ្រឿងបរិក្ខារទាំងអស់របស់ជំរំជួបអុលឡោះ‌តាអាឡា ហើយបម្រើជន‌ជាតិអ៊ីស្រ‌អែលដោយបំពេញមុខងារនៅក្នុងជំរំ‌សក្ការៈ។

9ចូរប្រគល់កុល‌សម្ព័ន្ធលេវីទៅឲ្យហារូន និងកូនៗរបស់គាត់ ដ្បិតយើងបានញែកពួកគេចេញពីប្រជា‌ជនអ៊ីស្រ‌អែល ប្រគល់ផ្តាច់ឲ្យហារូន។

10ចូរតែងតាំងហារូន និងកូនប្រុសៗរបស់គាត់ ឲ្យបំពេញមុខងារជាអ៊ីមុាំ។ រីឯអ្នកផ្សេងដែលចូលមកជិតទីសក្ការៈនេះនឹងត្រូវទទួលទោសដល់ស្លាប់»។

11អុលឡោះ‌តាអាឡា មានបន្ទូលមកម៉ូសាថា៖

12«យើងបានយកពួកលេវីចេញពីចំណោមជន‌ជាតិអ៊ីស្រ‌អែល។ ពួកលេវីជាចំណែកដែលយើងញែកទុកសម្រាប់យើង ជំនួសកូនច្បងទាំងអស់របស់ជន‌ជាតិអ៊ីស្រ‌អែល

13ដ្បិតកូនច្បងទាំងអស់ជាចំណែករបស់យើង។ នៅថ្ងៃដែលយើងប្រហារកូនច្បងទាំងប៉ុន្មានរបស់ជន‌ជាតិអេស៊ីប យើងបានញែកកូនច្បងទាំងអស់របស់ជន‌ជាតិអ៊ីស្រ‌អែលទុកសម្រាប់យើង គឺកូនច្បងរបស់មនុស្ស និងកូនដំបូងរបស់សត្វជាចំណែករបស់យើង។ យើងជា អុលឡោះ‌តាអាឡា »។

14អុលឡោះ‌តាអាឡា មានបន្ទូលមកកាន់ម៉ូសានៅវាលរហោ‌ស្ថានស៊ីណៃថា៖

15«ចូរជំរឿនកូនចៅលេវី តាមគ្រួសារ តាមអំបូររបស់ពួកគេ ដោយរាប់ចំនួនប្រុសៗទាំងអស់ដែលមានអាយុចាប់ពីមួយខែឡើងទៅ»។

16ម៉ូសាក៏រាប់ចំនួនពួកគេតាមបន្ទូលដែល អុលឡោះ‌តាអាឡា បង្គាប់មកគាត់។

17កូនប្រុសរបស់លោកលេវី មានឈ្មោះដូចតទៅ: គើសូន កេហាត់ និងម៉្រារី។

18កូនរបស់លោកគើសូន មានលីបនី និងស៊ីម៉ៃដែលជាឈ្មោះនៃអំបូររបស់ពួកគេ។

19កូនរបស់លោកកេហាត់ មានអាំរ៉ាម យីតសារ ហេប្រូន និងអ៊ូស៊ាលដែលជាឈ្មោះនៃអំបូររបស់ពួកគេ។

20កូនរបស់លោកម៉្រារី មានម៉ាលី និងមូស៊ី ដែលជាឈ្មោះនៃអំបូររបស់ពួកគេ។ អ្នកទាំងនេះជាត្រកូលរបស់អំបូរទាំងឡាយ នៃកុល‌សម្ព័ន្ធលេវីតាមក្រុមគ្រួសាររបស់គេ។

21លោកគើសូនត្រូវជាបុព្វបុរសរបស់អំបូរគើសូន ដែលចែកចេញជាត្រកូលលីបនី និងត្រកូលស៊ីម៉ៃ។

22នៅពេលជំរឿនប្រជា‌ជនចំនួនរបស់ពួកគេ រាប់ប្រុសៗដែលមានអាយុពីមួយខែឡើងទៅ មានទាំងអស់ ៧ ៥០០ នាក់។

23អំបូរគើសូន បោះជំរំនៅខាងក្រោយជំរំ‌សក្ការៈគឺនៅទិសខាងលិច។

24មេដឹកនាំក្រុមគ្រួសារគើសូន គឺលោកអេលាសាប់ ជាកូនរបស់លោកឡាអែល។

25នៅក្នុងជំរំជួបអុលឡោះ‌តាអាឡា កូនចៅគើសូនទទួលបន្ទុកផ្នែកខាងជំរំ‌សក្ការៈ និងជំរំព្រមទាំងក្រណាត់បាំងពីលើ វាំងននច្រកចូលជំរំជួបអុលឡោះ‌តាអាឡា

26ដំបូលទីលាន វាំងននច្រកចូលទីលានដែលស្ថិតនៅជុំវិញជំរំ‌សក្ការៈ និងអាសនៈព្រមទាំងខ្សែចងជំរំទាំងអស់។ ពួកគេមានភារកិច្ចថែទាំរបស់ទាំងនោះ។

27លោកកេហាត់ត្រូវជាបុព្វបុរសរបស់អំបូរកេហាត់ ដែលចែកចេញជាត្រកូលអាំរ៉ាម ត្រកូលយីតសារ ត្រកូលហេប្រូន និងត្រកូលអ៊ូស៊ាល។

28ចំនួនរបស់ពួកគេ រាប់ប្រុសៗដែលមានអាយុពីមួយខែឡើងទៅ មានទាំងអស់ ៨ ៦០០ នាក់។ ពួកគេមានភារកិច្ចថែរក្សាទីសក្ការៈ។

29អំបូរនានារបស់កូនចៅកេហាត់បោះជំរំនៅខាងត្បូងជំរំ‌សក្ការៈ។

30មេដឹកនាំក្រុមគ្រួសារកេហាត់ គឺលោកអេលី‌សាផាន ជាកូនរបស់លោកអ៊ូស៊ាល។

31កូនចៅកេហាត់ទទួលបន្ទុកផ្នែកខាងហិបនៃសម្ពន្ធ‌មេត្រី តុសក្ការៈ ជើងចង្កៀង អាសនៈ គ្រឿងបរិក្ខារប្រើប្រាស់ក្នុងទីសក្ការៈ វាំងននខាងក្នុង និងរបស់ឯទៀតៗដែលស្ថិតនៅក្នុងទីសក្ការៈ។

32មេដឹកនាំកំពូលរបស់កូនចៅលេវី គឺលោកអេឡា‌សារ ជាកូនរបស់អ៊ីមុាំហារូន។ លោកមើលខុសត្រូវលើអស់អ្នកដែលបំពេញមុខងារក្នុងទីសក្ការៈ។

33លោកម៉្រារីត្រូវជាបុព្វបុរសរបស់អំបូរម៉្រារី ដែលចែកចេញជាត្រកូលម៉ាស់លី និងត្រកូលមូស៊ី។

34ចំនួនរបស់ពួកគេ រាប់ប្រុសៗដែលមានអាយុពីមួយខែឡើងទៅ មានទាំងអស់ ៦ ២០០ នាក់។

35មេដឹកនាំក្រុមគ្រួសារនៃអំបូរម៉្រារី គឺលោកស៊ូរីអែល ជាកូនរបស់លោកអប៊ីហែល។ ពួកគេបោះជំរំនៅខាងជើងជំរំ‌សក្ការៈ។

36កូនចៅម៉្រារី ទទួលបន្ទុកផ្នែកខាងបន្ទះក្តាររបស់ជំរំ‌សក្ការៈ រនុក សសរជើង សសរ ព្រមទាំងបរិក្ខារ និងអ្វីៗទាំងប៉ុន្មានដែលសម្រាប់ប្រើប្រាស់ជាមួយគ្រឿងទាំងនោះ។

37ពួកគេក៏ទទួលបន្ទុកផ្នែកខាងសសររបស់ទីលានដែលនៅជុំវិញ ព្រមទាំងជើងសសរ ចំរឹង និងខ្សែសន្ធឹងដែរ។

38ម៉ូសា ព្រមទាំងហារូន និងកូនចៅរបស់គាត់បោះជំរំនៅទិសខាងកើត គឺខាងមុខជំរំ‌សក្ការៈ និងជំរំជួបអុលឡោះ‌តាអាឡា។ ពួកគាត់ទទួលខុសត្រូវចំពោះការងារក្នុងទីសក្ការៈ តាងឈ្មោះប្រជា‌ជនអ៊ីស្រ‌អែលទាំងមូលអ្នកឯទៀតៗ ចូលមកជិតទីសក្ការៈនឹងត្រូវទទួលទោសដល់ស្លាប់។

39ចំនួនក្រុមលេវី ដែល អុលឡោះ‌តាអាឡា បង្គាប់ឲ្យម៉ូសា និងហារូន រាប់តាមអំបូររបស់ពួកគេដោយគិតប្រុសៗដែលមានអាយុពីមួយខែឡើងទៅ សរុបទាំងអស់មាន ២២ ០០០នាក់។

40អុលឡោះ‌តាអាឡា មានបន្ទូលមកកាន់ម៉ូសាថា៖ «ចូរជំរឿនកូនប្រុសច្បងទាំងអស់របស់ជន‌ជាតិអ៊ីស្រ‌អែល ដោយគិតចាប់តាំងពីអាយុមួយខែឡើងទៅ។ ចូរកត់ត្រាទុកក្នុងបញ្ជី តាមឈ្មោះរបស់គេរៀងៗខ្លួន។

41ចូរញែកពួកលេវីទុកដោយឡែកសម្រាប់យើង ជា អុលឡោះ‌តាអាឡា ជំនួសកូនប្រុសច្បងទាំងអស់របស់ជន‌ជាតិអ៊ីស្រ‌អែល ហើយក៏ញែកហ្វូងសត្វរបស់ពួកលេវី ជំនួសកូនដំបូងទាំងអស់នៃហ្វូងសត្វរបស់ជន‌ជាតិអ៊ីស្រ‌អែលដែរ»។

42ម៉ូសាជំរឿនចំនួនកូនច្បងទាំងអស់ក្នុងចំណោមកូនចៅអ៊ីស្រ‌អែល តាមបន្ទូលដែល អុលឡោះ‌តាអាឡា បង្គាប់មកគាត់។

43កូនប្រុសច្បងទាំងអស់ដែលគេរាប់តាមឈ្មោះ ដោយគិតចាប់តាំងពីអាយុមួយខែឡើងទៅ ឃើញមានចំនួន ២២ ២៧៣ នាក់។

44អុលឡោះ‌តាអាឡា មានបន្ទូលមកម៉ូសាថា៖

45«ចូរញែកពួកលេវីទុកសម្រាប់យើង ដែលជា អុលឡោះ‌តាអាឡា ជំនួសកូនប្រុសច្បងទាំងអស់របស់ជន‌ជាតិអ៊ីស្រ‌អែល ហើយហ្វូងសត្វរបស់ពួកលេវី ក៏ជំនួសកូនដំបូងនៃហ្វូងសត្វរបស់ជន‌ជាតិអ៊ីស្រ‌អែលដែរ ដ្បិតពួកលេវីជាកម្ម‌សិទ្ធិរបស់យើង។ យើងជា អុលឡោះ‌តាអាឡា ។

46ដើម្បីលោះចំនួនពួកលេវីដែលលើស ២៧៣នាក់នោះ

47ត្រូវថ្លឹងប្រាក់ប្រាំណែនសម្រាប់លោះមនុស្សម្នាក់ ដោយប្រើទម្ងន់ប្រាក់ណែនរបស់ទីសក្ការៈពោល គឺម្ភៃកេរ៉ា។

48ចូរប្រគល់ប្រាក់ជាថ្នូរលោះកូនច្បង ដែលលើសពីចំនួនពួកលេវីឲ្យហារូន និងកូនចៅរបស់គាត់»។

49ម៉ូសាក៏យកប្រាក់ជាថ្នូរលោះកូនច្បង ដែលលើសពីចំនួនពួកលេវី

50គឺគាត់យកប្រាក់ពីកូនច្បងរបស់ជន‌ជាតិអ៊ីស្រ‌អែល មានចំនួនទាំងអស់១ ៣៦៥ ណែន គិតតាមទម្ងន់របស់ទីសក្ការៈ។

51គាត់ប្រគល់ប្រាក់ជាថ្នូរលោះទាំងនោះ ជូនហារូន និងកូនចៅរបស់គាត់ស្របតាមបន្ទូលដែល អុលឡោះ‌តាអាឡា បានបង្គាប់មកគាត់។