Numbers 36

Khmer 2014 (អាល់គីតាប)

← Chapter 35 Jump to:

1មេដឹកនាំរបស់ក្រុមគ្រួសារផ្សេងៗនៃអំបូរកាឡាដ ជាកូនរបស់លោកម៉ាកៀរ ក្នុងកុល‌សម្ព័ន្ធម៉ាណាសេដែលត្រូវជាកូនចៅរបស់យូសុះ នាំគ្នាចូលមកជិតម៉ូសា ជម្រាបគាត់នៅចំពោះមុខពួក មេដឹកនាំកុល‌សម្ព័ន្ធ និងមេដឹកនាំអំបូរនានានៃជន‌ជាតិអ៊ីស្រ‌អែល ដូចតទៅ៖

2« អុលឡោះ‌តាអាឡា បានបញ្ជាលោកម្ចាស់ឲ្យប្រគល់ស្រុកនេះដល់ជន‌ជាតិអ៊ីស្រ‌អែល ទុកជាចំណែកមត៌ក ដោយចាប់ឆ្នោត។ លោកម្ចាស់ក៏បានទទួលបញ្ជាពី អុលឡោះ‌តាអាឡា ដើម្បីប្រគល់ទឹកដី ជាចំណែករបស់លោកស្លូផិត‌ហាតជាបងប្អូនរបស់យើងខ្ញុំ ទៅឲ្យកូនស្រីរបស់គាត់ដែរ។

3បើពួកនាងរៀបការជាមួយកូនប្រុសរបស់កុល‌សម្ព័ន្ធណាមួយទៀតនៃជន‌ជាតិអ៊ីស្រ‌អែល ទឹកដីរបស់ពួកនាងមុខជាត្រូវកាត់ចេញពីទឹកដី ដែលជាចំណែកមត៌កនៃដូនតារបស់យើងខ្ញុំ ហើយបានទៅលើកុល‌សម្ព័ន្ធប្ដីរបស់នាង។ ដូច្នេះ ទំហំទឹកដីដែលជាចំណែកមត៌ករបស់យើងខ្ញុំដោយការចាប់ឆ្នោតនោះនឹងថយចុះ។

4លុះដល់ឆ្នាំមេត្តា‌ករុណា សម្រាប់ជន‌ជាតិអ៊ីស្រ‌អែល ទឹកដីរបស់ពួកនាងនឹងត្រូវកាត់ចេញពីចំណែកមត៌កកុល‌សម្ព័ន្ធដូនតារបស់យើងខ្ញុំ យកទៅបញ្ចូលក្នុងទឹកដីកុល‌សម្ព័ន្ធប្ដីរបស់នាង»។

5ម៉ូសានាំយកពាក្យដែល អុលឡោះ‌តាអាឡា បានបង្គាប់មកទៅប្រាប់ជន‌ជាតិអ៊ីស្រ‌អែលដូចតទៅ៖

6«កុល‌សម្ព័ន្ធដែលជាកូនចៅយូសុះនិយាយត្រូវមែន។ អុលឡោះ‌តាអាឡា បង្គាប់មកកូនស្រីរបស់លោកស្លូផិហាតថា: ពួកនាងអាចរៀបការជាមួយនរណាក៏បាន ឲ្យតែរៀបការនឹងបុរសដែលមកពីអំបូរមួយ ក្នុងកុល‌សម្ព័ន្ធរបស់ឪពុកនាង។

7ធ្វើដូច្នេះ ទឹកដីជាចំណែកមត៌ករបស់ជន‌ជាតិអ៊ីស្រ‌អែល មិនត្រូវផ្ទេរពីកុល‌សម្ព័ន្ធមួយទៅកុល‌សម្ព័ន្ធមួយទៀតឡើយ តែជន‌ជាតិអ៊ីស្រ‌អែលម្នាក់ៗ ត្រូវរក្សាទឹកដីទុក នៅក្នុងកុល‌សម្ព័ន្ធរបស់ឪពុកខ្លួន។

8កូនស្រីទាំងអស់ដែលទទួលចំណែកមត៌ក ក្នុងកុល‌សម្ព័ន្ធនានានៃជន‌ជាតិអ៊ីស្រ‌អែល ត្រូវរៀបការជាមួយបុរសដែលមកពីអំបូរមួយក្នុងកុល‌សម្ព័ន្ធរបស់ឪពុកនាង ដើម្បីឲ្យជន‌ជាតិអ៊ីស្រ‌អែលនីមួយៗ គ្រងមត៌កឪពុករបស់ខ្លួន។

9ទឹកដីជាចំណែកមត៌ករបស់ជន‌ជាតិអ៊ីស្រ‌អែល មិនត្រូវផ្ទេរពីកុល‌សម្ព័ន្ធមួយទៅកុល‌សម្ព័ន្ធមួយទៀតឡើយ តែកុល‌សម្ព័ន្ធនីមួយៗនៃជន‌ជាតិអ៊ីស្រ‌អែល ត្រូវរក្សាទឹកដីដែលជាមត៌ករបស់ខ្លួន»។

10កូនស្រីរបស់លោកស្លូផិហាតក៏នាំគ្នាធ្វើតាមបន្ទូលដែល អុលឡោះ‌តាអាឡា បានបង្គាប់មកម៉ូសា។

11នាងម័សឡា ធើសា ហុកឡា‌មីលកា និងណូហា បានរៀបការជាមួយបងប្អូនជីដូនមួយរបស់ខ្លួន។

12ពួកគេបានរៀបការនឹងបុរសមកពីអំបូរ កូនចៅលោកម៉ាណាសេ ជាកូនរបស់យូសុះ។ ដូច្នេះ ទឹកដីដែលជាចំណែកមត៌ករបស់ពួកគេ ស្ថិតនៅក្នុងអំបូរនៃកុល‌សម្ព័ន្ធរបស់ឪពុកនាង។

13នេះជាបទបញ្ជា និងហ៊ូកុំផ្សេងៗដែល អុលឡោះ‌តាអាឡា បានបង្គាប់មកជន‌ជាតិអ៊ីស្រ‌អែលតាមរយៈម៉ូសានៅវាលទំនាបស្រុកម៉ូអាប់ ក្បែរទន្លេយ័រដាន់ ទល់មុខនឹងក្រុងយេរីខូ។

← Chapter 35 Jump to: