1 Corinthians 1

Luganda (BIBU1) (BIBULIYA ENTUKUVU)

Jump to: Chapter 2 →

1Pawulo, eyayitibwa okuba omutume wa Kristu Yezu olw'okwagala kwa Katonda, ko n'owooluganda Sositene;

2ya Ekleziya wa Katonda ali mu Korinti, eri abo abaatukuzibwa mu Kristu Yezu, abaayitibwa okubeera abatuukirivu awamu n'abo bonna abakoowoola erinnya lya Mukama waffe Yezu Kristu buli wantu, Mukama waabwe era owaffe.

3Eneema ebeere nammwe n'emirembe gya Katonda Kitaffe n'Omukama Yezu Kristu.

4Bulijjo neebaza Katonda ku lwammwe olw'eneema ya Katonda eyabaweebwa mu Kristu Yezu,

5kubanga mu ye mugaggawaziddwa mu buli kintu: mu buli njogera ne mu buli magezi;

6anti ng'ebijulirwa ku Kristu byanywezebwa mu mmwe;

7bwe kityo mubeere nga temuliiko kirabo kya mwoyo ekibabulako nga muli mu kulindirira okwolekebwa kw'Omukama Yezu Kristu.

8Ajja kubanyweza okutuusa ku nkomerero, nga temuliiko musango ku lunaku lwa Mukama waffe Yezu Kristu.

9Katonda oyo mwesigwa eyabayita n'abagatta mu kubeera ekimu n'Omwana we Yezu Kristu, Mukama waffe.

10Mbeegayiridde, abooluganda, mu linnya lya Mukama waffe Yezu Kristu, mussenga kimu; mu mmwe muleke kubaamu kwesalaasalamu, wabula mubeerere ddala ba mmeeme emu, ba ndowooza emu.

11Baganda bange, anti ab'ewa Kulowe bantegeezezza nti mu mmwe mulimu obugulumbo.

12Kye ntegeeza kye kino, nti buli omu mu mmwe agamba nti: “Nze ndi wa Pawulo,” oba nti: “Nze ndi wa Apollo,” oba nti: “Nze ndi wa Kefa,” oba nti: “Nze ndi wa Kristu.”

13Kristu yeetemyemu? Pawulo ye yakomererwa ku musaalaba okubeera mmwe? Mwabatizibwa mu linnya lya Pawulo?

14Neebaza Katonda nti mu mmwe saabatizaamu n'omu, okuggyako Krisipo ne Gayiyo,

15nti munaagamba nti mwabatizibwa mu linnya lyange.

16Nabatiza n'ab'omu nnyumba ya Stefana. Okuggyako abo, tewali mulala gwe nabatiza.

17Kristu tantumanga kubatiza, wabula okulangirira Evangili; si mu lulimi olw'ekigezi, sikulwa ng'omusaalaba gwa Kristu guggwaamu ensa.

18Ku bazikirira ekigambo ky'omusaalaba kiba busiru; naye ku ffe abalokoka, ge maanyi ga Katonda,

19anti kyawandiikibwa nti: “Nzija kuzikiriza amagezi g'abagezi; ndiggyawo okutegeera kw'abalabalaba.”

20Omugezi ali ludda wa? Omuwandiisi ali ludda wa? Abawakanyi b'omu mulembe guno baluwa? Amagezi g'ensi eno Katonda tagafudde busiru?

21Obanga okusinziira ku magezi ga Katonda ensi teyamanya Katonda ng'eyita mu magezi gaayo, Katonda yayagala ng'ayita mu busiru bw'ekyo kye tuyigiriza alokole abo abakkiriza.

22Bo Abayudaaya basaba bubonero, ate Abagereeki banoonya magezi;

23naye ffe tulangirira Kristu omukomerere, ku Abayudaaya kyesittazo, ate ku b'amawanga busiru;

24naye ku abo abaayitibwa, Abayudaaya oba Abagereeki, ye Kristu obuyinza bwa Katonda, era amagezi ga Katonda.

25Anti obusiru bwa Katonda bwa magezi okusinga abantu; obunafu bwa Katonda bwa maanyi okusinga abantu.

26Abooluganda, mulabe nga bwe mwayitibwa, mu mmwe abagezi, ku bw'omuntu, temwali bangi, n'ab'obuyinza tebaali bangi, n'abakungu tebaali bangi.

27Naye Katonda yalonda ababuyabuya mu nsi aswaze abagezi; abanafu mu nsi Katonda be yalonda aswaze ab'amaanyi.

28Abo mu nsi abataliiko bwe bali, abagayibwa, omutali nsa, Katonda be yalonda okuggyawo abalimu ensa,

29walyoke wabulewo n'omu eyeetendera mu maaso ga Katonda.

30Mu ye mwe mwava mulyoke mubeerewo mu Kristu Yezu, Katonda gwe yafuula amagezi gaffe, obutuukirivu bwaffe, okutukuzibwa kwaffe n'okununulibwa kwaffe.

31Awo nno nga bwe kyawandiikibwa, “Eyeetenda, yeetendere mu Mukama.”

Jump to: Chapter 2 →