1 Corinthians 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Nange nno, abooluganda, saayogera nammwe ng'abantu aba Mwoyo, wabula ng'abantu obuntu, abakyali abato mu Kristu.

2Nabagabiriranga mata, sso si mmere eŋŋumu, kubanga mwali temunnagisobola. Na kati temunnagisobola,

3era mukyali ba mubiri. Nga mu mmwe mukyalimu okukwatiragana obuggya n'obugulumbo, muba temukyali ba mubiri, nga mweyisa ng'abantu aba bulijjo?

4Kubanga oli amala okuwoza: “Nze ndi wa Pawulo,” omulala nti: “Nze ndi wa Apollo,” olwo temuli bantu buntu?

5Apollo kye ki? Pawulo kye ki? Baweereza buweereza mwe mwayita okukkiriza buli omu ng'Omukama bwe yamuwa.

6Nze nasimba, Apollo n'afukirira, naye Katonda ye yawa okukula.

7Asimba n'afukirira bo si ba nsonga, wabula Katonda, awa okukula.

8Asimba n'afukirira bonna kye kimu; buli omu alifuna empeera okusinziira ku mulimu gwe yakola.

9Ffe tuli bakozi abayamba ku Katonda, mmwe muli nnimiro ya Mukama, kizimbe kye.

10Olw'eneema Katonda gye yampa nassaawo omusingi, okufaanana ng'omuzimbi omukugu bw'akola, okwo omulala kw'azimbira. Buli omu yeegendereze bw'aguzimbirako.

11Kubanga tewali asobola kuteekawo musingi mulala wabula ogwo ogwassibwawo, ye Yezu Kristu.

12Singa ku musingi ogwo oli azimbirako ne zaabu, ffeeza, amayinja ag'omuwendo, embaawo, essubi, ebisusunku…

13buli mulimu gwa kinnoomu gulyolekebwa, kubanga olunaku lw'Omukama luligulaga; anti gulyolekebwa n'omuliro; omuliro guligeza buli kika kya mulimu gwa kinnoomu.

14Omulimu oli gwe yazimbako bwe gulisigalawo, alifuna empeera;

15singa omulimu gw'oli gulisirikka, alifiirwa, nandibadde nga ye yennyini aliwonyezebwa; naye kyenkana aliba ng'ayise mu muliro.

16Temumanyi nga muli kiggwa kya Katonda, nga ne Mwoyo wa Katonda asula mu mmwe?

17Oli bw'alizikiriza ekiggwa kya Katonda, ne Katonda alimuzikiriza; kubanga ekiggwa kya Katonda kintu kitukuvu, ate ekiggwa ekyo ye mmwe.

18Wabulewo eyeerimba; oba mu mmwe mulimu alowooza nti mugezi mu mulembe guno, afuuke musiru, alyoke afuuke omugezi.

19Kubanga mu maaso ga Katonda, amagezi g'ensi eno buba busiru. Anti kyawandiikibwa nti: “Akwatira abagezi mu bukujjukujju bwabwe,”

20n'awalala nti: “Omukama amanyi ebirowoozo by'abagezi, nti temuli kantu.”

21Awo nno muleme kwetendera mu bantu. Anti byonna byammwe,

22abeere Pawulo, oba Apollo, oba Kefa, oba ensi, oba obulamu, oba okufa, oba kati, oba gye bujja; ebyo byonna byammwe;

23nammwe muli ba Kristu; ne Kristu wa Katonda.

← Chapter 2 Jump to: Chapter 4 →