1 Corinthians 8

Luganda (BIBU1) (BIBULIYA ENTUKUVU)

← Chapter 7 Jump to: Chapter 9 →

1Kati ate ku bifa ku mmere empongere balubaale: tumanyi nti ffenna tumanyi; naye nno okumanya kuleeta lwetumbu; wabula okwagala kwo kuzimba omuntu.

2Oli alowooza nti aliko ky'amanyi, aba tannamanya ng'omuntu bw'asaanye okumanya.

3Naye oli bw'ayagala Katonda, amanyibwa Katonda.

4Kati nno ku kulya emmere ewongeddwa balubaale: ffenna tumanyi nga lubaale mu butuufu taliiwo, era tewali Katonda mulala wabula omu ono.

5Newandibadde nga waggulu eyo ne mu nsi osanga be bayita balubaale, anti balubaale nkuyanja, n'abakama nkumu,

6naye ffe tumanyi Katonda omu, Taata, byonna mwe bisibuka, naffe mwe tuva, n'Omukama omu Yezu Kristu, byonna mwe byayita okubaawo, naffe mwe twayita okubaawo.

7Naye ebyo si bonna nti babimanyi. Naye abamu olw'okubeera nga n'okutuusa kati beemanyiizizza balubaale, balya emmere emponge nga ddala eyawongeddwa lubaale; kubanga omutima gwabwe munafu, ne gujjako ekibi.

8Emmere si y'etufuula abalungi ewa Katonda; bwe tutalya, tetuliiko kye tufiirwa, ne bwe tulya tetuliiko kye tweyongerako.

9Wabula mwekkaanye, sikulwa ng'eddembe lyammwe lifuuka ekyesittazo eri omunafu.

10Oli singa akulaba ggwe amanyi ng'olya ebiwonge mu kiggwa kya lubaale, bw'aba ow'omutima omunafu, taguma bugumi naye n'alya ebiwongere lubaale?

11Bw'otyo ggwe amanyi oleetedde omunafu ono okuzikirira, owooluganda Kristu gwe yafiirira.

12Bwe musobya mutyo eri bannammwe, ne muttattana mutyo emitima gyabwe eminafu, mubeera Kristu gwe musobezza.

13Oba bwe guli, emmere ng'ereetera munnange okwesittala, sirirya nnyama omulundi n'ogumu, nneme kwesittaza munnange.

← Chapter 7 Jump to: Chapter 9 →