1 Corinthians 11

Luganda (BIBU1) (BIBULIYA ENTUKUVU)

← Chapter 10 Jump to: Chapter 12 →

1Mulabire ku nze nga nze bwe ndabira ku Kristu.

2Mbatenda kubanga munzijukira mu byonna, n'empisa ez'okugoberera muzituusa nga bwe nazibayigiriza.

3Naye njagala kino mukitegeere, nti omutwe gwa buli musajja ye Kristu; omutwe gw'omukazi ye bba; omutwe gwa Kristu ye Katonda.

4Omusajja bw'abikka omutwe ng'asoma, obanga alanga, aswaza omutwe gwe.

5Sso omukazi bw'atabikka mutwe nga yeegayirira obanga alanga, aswaza omutwe gwe, guba nga ogumwereddwa.

6Oba omukazi omutwe tagubikka, n'enviiri azisalireko ddala. Oba omukazi okumusala enviiri, yadde okumumwa omutwe, kya nsonyi, omutwe nno agubikke.

7Omusajja ye tasaanye kwebikka mutwe, kubanga ye kye kifaananyi kya Katonda n'ekitiibwa kye; naye omukazi kitiibwa kya musajja.

8Kubanga omusajja si ye yakolebwa ng'ava mu mukazi, wabula omukazi ye yakolebwa ng'ava mu musajja.

9N'omusajja si ye yatonderwa omukazi, wabula omukazi ye yatonderwa omusajja.

10Awo nno omukazi, olw'abamalayika abali awo, kyava ateekwa okwoleka ku mutwe gwe obuyinza bba bw'amulinako.

11Sso ate mu Mukama omukazi teyeemalirira awatali musajja, era n'omusajja teyeemalirira awatali mukazi.

12Ng'omukazi bwe yakolebwa ng'ava mu musajja, era n'omusajja bw'abaawo ng'ava mu mukazi, anti byonna biva wa Katonda.

13Mmwe mmwennyini musalewo: kisaana omukazi okwegayirira Katonda nga tabisse mutwe?

14Ne mu buwangwa tolaba nti omusajja okukuza enviiri kiba kwefeebya,

15sso ng'omukazi eyaweebwa enviiri empanvu ku ye kiba kya kitiibwa? Enviiri empanvu zaamuweebwa okumubikka.

16Oba oli ayagala kino okukiwakanya, amanye nti ffe tetulinaayo mpisa ndala, era n'Ekleziya za Katonda nazo tezigirina.

17Mu bino bye nkuutira mmwe sibatenda, kubanga bwe mukuŋŋaana, temweyongera mu bulungi wabula mu bubi.

18Ekisooka, bwe mukuŋŋaana awamu ng'Ekleziya, mpulira mbu mubeeramu okwetemamu. Ngira ate kino ne nkikkiriza,

19anti okwetemamu kuteekwa okubaawo mu mmwe, abatuufu ddala balyoke balabike.

20Bwe mukuŋŋaana, tekukyali kulya mbaga ya Mukama.

21Bwe muba mulya, buli omu asooka kweriira mmere ye, omu aba enjala emuluma, omulala aba atamidde.

22Abaffe, temulina ka wammwe gye muliira na kunywera? Nandiki Ekleziya wa Katonda gwe mugaya nga muswaza abatalina? Mbagambe ki? Mbatende? Mu kino sibatenda.

23Ekyo kye nafuna okuva ew'Omukama nange kye nababuulira, nti: Mukama Yezu mu kiro kye baamuweerayo, yakwata omugaati,

24ne yeebaza, n'agumenyamu, n'agamba nti: “ Kino mubiri gwange ku lwammwe; kino mukikolanga okunzijukira.”

25Mu ngeri ye emu, ekyeggulo nga kiwedde, yakwata ekikompe n'agamba nti: “Ekikompe kino ye Ndagaano empya mu musaayi gwange; buli lwe munaanywanga, kino mukikolanga okunzijukira.”

26Awo nno buli lwe mulya omugaati guno ne munywa ne ku kikompe, mulangirira okufa kw'Omukama okutuusa lw'alijja.

27Bwe kityo nno, buli anaalyanga omugaati guno oba n'anywa ku kikompe ky'Omukama nga tasaanidde, anazzanga omusango ku mubiri ne ku musaayi gw'Omukama.

28Awo nno buli muntu amalenga kwekebera, alyoke alye ku mugaati ogwo anywe ne ku kikompe.

29Anti alya n'anywa nga tamaze kwetegereza nti mubiri, alya era anywa musango.

30Kwe kulaba nga bangi mu mmwe balwadde era bayongobevu, n'abamu nga bafudde.

31Tuba kumala kwekebera, ggwe wamma tetwandiramuddwa.

32Bwe tulamulibwa, tubonerezebwa Omukama tuleme kusalirwa musango kutusinga wamu n'ensi eno.

33Awo nno, baganda bange, bwe mukuŋŋaana okulya, mulindenga bannammwe.

34Enjala gw'eruma aliire eka; muleme kwereetereza musango nga mubadde mukuŋŋaanye. Ensonga endala ndizitereeza nga nzize.

← Chapter 10 Jump to: Chapter 12 →