1 Corinthians 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1Ku bikwata ku bitone Mwoyo by'awa, abooluganda, saagala mubeere nga temumanyi.

2Mumanyi nga bwe mwali mukyali bakafiiri, mwawubisibwa ne mumala gatwalibwa mutyo mu maaso g'ebifaananyi bya balubaale bikasiru.

3Kale nno njagala mumanye nti tewali ayogerera mu Mwoyo wa Katonda ayinza ate kugamba nti: “Yezu avumirirwe,” era tewali ayinza kugamba nti: “Mukama Yezu,” wabula ng'ayogerera mu Mwoyo Mutuukirivu.

4Ebitone birimu enjawulo, naye nga Mwoyo ye omu;

5n'empeereza zirimu enjawulo, naye ng'Omukama ye omu;

6emirimo nagyo girimu enjawulo, naye nga Katonda ye omu, y'akola mu byonna mu buli kintu.

7Buli omu aweebwa okwolesebwa kwa Mwoyo olw'ensonga y'okugasa abalala.

8Omu aweebwa mu Mwoyo okwogera eby'amagezi, omulala kumanyisa, Mwoyo era nga ye omu.

9Omulala kukkiriza, mu Mwoyo ye omu; omulala kitone kya kuwonya, mu Mwoyo ye omu.

10Omulala kukola byewuunyo, omulala kulanga, omulala kwawula bika bya myoyo, omulala bika bya nnimi, omulala kuvvuunula nnimi.

11Mu bano bonna Mwoyo ye omu akola, agabira buli muntu nga bw'ayagala.

12Ng'omubiri bwe guba ogumu naye ne guba n'ebitundu bingi, ate n'ebitundu by'omubiri byonna sso newandibadde nga bingi, byonna wamu ne biba omubiri gumu, ne Kristu bw'ali.

13Olwa Mwoyo omu ffenna twabatizibwa mu mubiri gumu. Abayudaaya n'Abagereeki, abaddu n'ab'eddembe, ffenna twanywesebwa ku Mwoyo omu.

14Anti omubiri tegukolebwa kitundu kimu, naye bingi.

15Singa ekigere kigamba nti: “Kubanga siri mukono; awo nno sibalirwa ku mubiri,” ekyo tekikigaana n'akamu kubalirwa mu mubiri.

16Ye singa okutu kugamba nti: “Kubanga siri liiso, awo nno sibalirwa ku mubiri,” ekyo tekikugaana n'akamu kubalirwa ku mubiri.

17Singa omubiri gwonna gwali liiso, ate okuwulira kwandibadde wa? Singa omubiri gwonna gwali kutu, ate okuwunyiriza kwandibadde wa?

18Naye Katonda yatereeza ebitundu mu mubiri, buli kimu nga bwe yayagala.

19Singa byonna byali kitundu kimu, olwo omubiri gwandibadde wa?

20Sso kati ebitundu bingi, naye ng'omubiri gumu.

21Eriiso teriyinza kugamba mukono nti: “Sikwetaaga;” n'omutwe teguyinza kugamba bigere nti: “Sibeetaaga.”

22Ate nno ebitundu by'omubiri ebisinga obunafu, bye bitarekeka.

23N'ebitundu by'omubiri bye tuyita ebitene, tubyetoolooza ekitiibwa ekiyitiridde; era ebitundu byaffe ebitali bikulu tubisukkulumya n'ekitiibwa ekiyitiridde

24n'okusinga ebitundu byaffe ebikulu bwe byandyetaaze okusukkulumizibwa. Katonda bwe yatereeza bw'atyo omubiri, ekitundu ekitalina kitiibwa n'akiwa ekitiibwa ekisinga,

25omubiri guleme kwesalaasalamu, naye ebitundu byonna bikolerere ekimu okugasa kinnaakyo.

26Ekitundu ekimu bwe kirumwa, byonna birumirwa wamu; ekimu bwe kifuna ekitiibwa, n'ebitundu ebirala byonna bisanyukirako.

27Kati mmwe muli mubiri gwa Kristu, buli omu kitundu kyagwo.

28Katonda nno yassaawo mu Ekleziya, okusookera ddala Abatume, abookubiri be balanzi, abookusatu be bayigiriza, n'azzaako abakola ebyewuunyo, n'abawonya endwadde, n'abayambi, n'abakulembeze, n'aboogera ebika by'ennimi, n'abavvuunula ennimi.

29Bonna batume? Bonna balanzi? Bonna bayigiriza? Bonna bakola ebyewuunyo?

30Bonna balina ekitone eky'okuwonya? Bonna boogera ennimi? Bonna bayinza okuzivvuunula?

31Naye muluubirire ebitone ebisingira ddala. Kale nzija kubalaga ekkubo erikyasingira ddala obulungi.

← Chapter 11 Jump to: Chapter 13 →