1 Corinthians 9

Luganda (BIBU1) (BIBULIYA ENTUKUVU)

← Chapter 8 Jump to: Chapter 10 →

1Nze siri wa ddembe? Siri mutume? Saalaba ku Yezu Kristu Mukama waffe? Si mmwe mulimu gwange mu Mukama?

2Oba ku balala siri mutume, waakiri ku mmwe ndi mutume; mmwe kabonero akassiddwa ku butume bwange mu Kristu.

3Eno ye mpoza yange eri abo abanvunaana:

4Tetuli ba ddembe okulya oba okunywa?

5Tetuli ba ddembe okutambulanga n'omukazi omubeezi ng'Abatume abalala ne baganda b'Omukama ne Kefa bwe bakola?

6Oba nze nzekka ne Barunaba ffe tutalina ddembe obutakola?

7Ani akola obuserikale ne yeesasulira? Ani asimba ennimiro y'emizabbibu n'atalya ku bibala byagyo? Ani alunda eggana n'atanywa ku mata ga ggana?

8Bino mbyogeza buyinza bwa muntu buntu? Etteeka nalyo si bwe ligamba?

9Anti kyawandiikibwa mu Tteeka lya Musa nti: “Ente ewuula eŋŋano, togisibanga mumwa.” Katonda agenderera nte zokka?

10Takyogerera ffe ffenna? Kyawandiikibwa ku lwaffe, kubanga oli alima, yandirimye ng'asuubira, n'oli awuula eŋŋano yandiwudde ng'asuubira okugabanako akantu.

11Oba mu mmwe twasimbamu bya mwoyo, bwe tukungula ku byammwe eby'omubiri, kiba kinene?

12Oba abalala bafuna ku byammwe, leero alabisa ffe? Naye eddembe eryo tetulikozesezza. Byonna tubigumiikiriza, tuleme kuteeka miziziko mu kkubo ly'Evangili.

13Temumanyi ng'abakola mu Kiggwa balya ku bitonebwa mu Kiggwa, n'abaweereza ku mwaliiro eby'oku mwaliiro kwe bagabana?

14N'Omukama nno bw'atyo bwe yatereeza, nti abayigiriza Evangili, baneeyimiririzangawo ku Vangili.

15Naye nze seyambisizza n'erimu ku ddembe eryo; siwandiise biryoke binkolerwe. Kiryose nfe ne wataba anzigyako ttendo lyange.

16Bwe njigiriza Evangili, ekyo ku nze si ttendo, manyanga mulimu gwange; zinsanze nze bwe siyigiriza Vangili!

17Singa kino nkikola nga njagala, nfuna empeera; bwe kiba tekivudde mu kwagala, guba mulimu bulimo ogwantumibwa.

18Awo nno empeera eyange y'eruwa? Ye eno, nti bwe njigiriza Evangili, njiyigiririze bwereere, ne seeyamba bye nandifunye olw'okuyigiriza Evangili.

19Newandibadde siriiko n'omu anneekomya, neefuula omuddu wa bonna, ndyoke mpangule bangi okusingawo.

20Eri Abayudaaya neefuula Muyudaaya, ndyoke mpangule Abayudaaya. Eri abatwalibwa Etteeka, neefuula atwalibwa Etteeka, sso nga sitwalibwa Tteeka, ndyoke mpangule n'abo abagoberera Etteeka.

21Eri abali ebweru w'Etteeka, neefuula ali ebweru w'Etteeka – si ng'atalina tteeka mu maaso ga Katonda, wabula ng'atwalibwa Etteeka lya Kristu – ndyoke mpangule abo abali ebweru w'Etteeka.

22Eri abanafu, nange mba munafu, ndyoke mpangule abanafu. Nafuuka byonna olwa bonna, nsobole okubaako be ndokola mu buli ngeri.

23Ebyo byonna mbikola lwa kubeera Vangili, ndyoke ngabane ku birungi byayo.

24Tetumanyi ng'abaddusi mu mpaka z'embiro bonna badduka, naye afuna ekirabo abeera omu? Nammwe mudduke mutyo, muwangule.

25Buli yeetaba mu mpaka, yeefuga mu byonna; sso bakola batyo balyoke bafune engule eggwaawo; naye ffe, tulwanirira engule etaggwaawo.

26Nange nno sidduka muwawa, sikuba bikonde ng'omulwanyi akuba ebbanga;

27wabula omubiri gwange ngubonereza ne ngufuga, sikulwa nga nze mmaze okuyigiriza abalala, mpandulibwa.

← Chapter 8 Jump to: Chapter 10 →