1 Corinthians 13

Luganda (BIBU1) (BIBULIYA ENTUKUVU)

← Chapter 12 Jump to: Chapter 14 →

1Singa njogera mu nnimi abantu ne bamalayika ze boogera, sso nga sirina kwagala, mba ng'ekide ekimala gavuga, obanga ensaazo ezimala gasaala.

2Ne bwe mba n'obuyinza obw'obulanzi, oba bwe mba nga nsobola okutegeera buli byama byonna na buli magezi, ne bwe mba n'okukkiriza kwonna nga nsobola n'okusigula ensozi, sso nga sirina kwagala, siba kantu.

3Ebyange byonna ne bwe mbiwaayo, ne bwe ndiwaayo omubiri gwange gwokebwe, sso nga sirina kwagala, sirina kye ŋŋanyulwamu.

4Okwagala kugumiikiriza, kwa kisa; okwagala tekukwatirwa buggya, tekwepanka wadde okwetenda,

5tekukolera bubi, tekwenoonyeza byakwo, tekukalaza, tekulowooleza bubi;

6tekusanyukira bubi, naye kusanyukira mazima.

7Kugumira byonna, kukkiriza byonna, kusuubira byonna, kugumiikiriza byonna.

8Okwagala tekuliiko makoma; okulanga kuliggwaawo; zo ennimi zirisirikka, n'ago amagezi galiggwaawo.

9Amagezi gaffe tegatuukiridde, n'okulanga kwaffe tekutuukiridde;

10ekituukiridde bwe kirijja, ekitatuukiridde kiriggwaawo.

11Bwe nali omuto, nayogeranga ng'omuto, nalowoozanga ng'omuto, nalamulanga ng'omuto. Naye bwe nasajjakula, ne nva ku by'obuto.

12Kati tulabira mu ndabirwamu, mu kwefaanaanyiriza; naye luli tulirabaganira ddala maaso ku maaso; kati mmanyi kitundu, naye luli ndimanyira ddala nga nze bwe mmanyiddwa.

13Kale nno okukkiriza n'okusuubira n'okwagala bisigalawo, ebisatu ebyo; naye ekisingira ddala bino kwe kwagala.

← Chapter 12 Jump to: Chapter 14 →