1 Corinthians 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Omuntu bw'ati bwe yanditulowoozezzaako: ng'abaweereza ba Kristu, abawanika b'ebyama bya Katonda.

2Kati nno ekirindiriddwa mu bawanika, omuwanika yandisangiddwa nga mwesigwa.

3Nze mmwe okunnamula, oba okulamulibwa embuga ez'abantu obuntu, sikitwala ng'ekikulu; nange nzennyini seeramula.

4Kwo okubeera seemanyiiko musango; naye si kwe kugamba nti ndi mutuukirivu; Omukama y'annamula.

5Awo nno muleke kulamula ng'obudde tebunnatuuka; ng'Omukama tannatuuka oyo alyerula byonna ebikisiddwa mu nzikiza, n'amanyisa enteesa eziri mu mutima; olwo buli omu lw'alifuna ettendo eriva mu Katonda.

6Abooluganda, njogedde ebyo byonna ku nze ne ku Apollo, lwa kubeera mmwe, mulyoke mutuyigireko okugoberera ebyawandiikibwa, wabulewo mu mmwe eyeetenda olw'omu ne kireetera omulala okugayibwa.

7Ani akulabyemu eky'enjawulo? Kiki ky'olina ky'otaafuna bufunyi? Oba wakifuna bufunyi, lwaki wetenda ng'ataafuna kifune?

8Kati mukkuse! Mwagaggawala dda! Mwafuna obwakabaka nga ffe tetuli nammwe! Singa nno muba bakabaka naffe ne tuba bakabaka awamu nammwe!

9Naye ndowooza Katonda ffe Abatume atwolese ng'abasemberayo ddala mu bonna; ng'abantu abasaliddwa ogw'okufa; kubanga tufuuse ekyokwerolera eri ensi, bamalayika n'abantu.

10Tuli basiru olw'okubeera Kristu, naye mmwe muli bagezi mu Kristu; tuli banafu, naye mmwe muli ba maanyi; mmwe mussibwamu ekitiibwa, naye ffe tunyoomebwa.

11Ne ku ssaawa ya leero tuli bayala, tulumwa ennyonta, tuyita bwereere, tukubibwa, tetulina we tusula;

12tufaabiina nga tukola n'emikono gyaffe, bwe tuvumibwa, ffe tusabira mikisa; bwe tuyigganyizibwa, ffe tugumiikiriza;

13bwe tuweebuulwa, ffe tukanya kuddaabiriza; tufuuse bikudumu bya nsi, ebisejja n'okutuusa kati.

14Bino sibiwandiise kubaswaza, wabula kubabuulirira ng'abaana bange abaagalwa.

15Mwandiba nga mulina ababasomesa mu Kristu nga kakumi, naye bakitammwe temulina bangi. Nze nabazaala nga kitammwe mwenna mu Kristu Yezu olw'Evangili.

16Kale nno mbeegayiridde, mundabireko.

17Kyenvudde mbatumira Timotewo, omwana wange omwagalwa era omwesigwa mu Mukama, okubajjukiza nga bwe mpisa mu Yezu Kristu, nga bwe njigiriza mu buli Ekleziya.

18Bwe nafaanana ng'atakyayise eyo gye muli, abamu ne beewanika.

19Nzija nno kujja mangu ewammwe, Omukama ng'ayagadde, olwo ndimanya si bigambo by'abo abeewanika, wabula amaanyi gaabwe.

20Kubanga obwakabaka bwa Katonda tebubeera mu bigambo bugambo, wabula mu maanyi.

21Kiki kye mwagala? Nzije ewammwe na muggo, oba na kwagala, mu mutima omukkakkamu?

← Chapter 3 Jump to: Chapter 5 →