Mark 8

Luganda (BIBU1) (BIBULIYA ENTUKUVU)

← Chapter 7 Jump to: Chapter 9 →

1Mu nnaku ezo, era ekibiina ekinene kyali kikuŋŋaanye ng'abantu tebalina kye balya; n'ayita abayigirizwa be w'ali n'abagamba nti:

2“Ekibiina kino kinkwasa ekisa, kubanga babadde nange kati ennaku ssatu, ate nga tebalina kye balya.

3Bwe mbasiibula bamala badda eka nga bayala, bajja kugwa ku kkubo; kubanga abamu mu bo bavudde wala.”

4Abayigirizwa be ne bamuddamu nti: “Ani anaasobola okubaliisa n'emigaati mu ddungu muno?”

5N'ababuuza nti: “Mulinawo emigaati emeka?” Ne baddamu nti: “Musanvu.”

6N'alagira abantu okukkalira wansi; n'akwata emigaati omusanvu, ne yeebaza, n'agimenyamu, n'akwasa abayigirizwa be; ne bagabira ekibiina.

7Baali balina n'obwennyanja butono, n'abuwa omukisa, nabwo n'alagira okubugaba.

8Ne balya, ne bakkuta; ne bakuŋŋaanya obutundutundu obwalema, ne buwera ebisero musanvu ebijjuvu.

9Abaali balidde baali bawera abasajja enkumi nnya.

10N'abasiibula; amangu ago n'asaabala mu lyato wamu n'abayigirizwa be, n'agenda mu kitundu ky'e Dalumanuta.

11Abafarisaayo ne bajja, ne basooka okumuwakanya; ne bamwagaza akabonero okuva mu ggulu nga bamukema.

12N'assa ekikkowe ekiva ddala ku mutima, n'abagamba nti: “Ezzadde lino ekiryagaza akabonero kiki? Mazima mbagamba nti tewali kabonero kajja kuweebwa zzadde lino.”

13N'abavaako, n'asaabala ate mu lyato, n'alaga emitala.

14Kati nno baali beerabidde okuleeta emigaati; mu lyato baalinamu omugaati gumu gwokka.

15N'abakuutira nti: “Mwegendereze, mwekuume ekizimbulukusa ky'Abafarisaayo n'ekizimbulukusa kya Erode.”

16Ne beebuuzaganya kubanga tebaalina migaati.

17Yezu n'ategeera, n'abagamba nti: “Lwaki mwebuuzaganya nti temulina migaati? Temunnaba kumanya na kutegeera? Omutima gwammwe gukyagugubye?

18Mulina amaaso ne mutalaba? Mulina amatu ne mutawulira? Temujjukira?

19Kale emigaati etaano bwe nagimenyera abantu enkumi ettaano mwaggyawo ebisero bimeka ebijjudde obutundutundu?” Ne bamugamba nti: “Kkumi na bibiri”

20Era n'abagamba nti: “Ate emigaati omusanvu, bwe nagimenyera abantu enkumi ennya, mwaggyawo ebibbo bimeka eby'obutundutundu?” Ne bamugamba nti: “Musanvu.”

21Kwe kubagamba nti: “Era temunnaba kutegeera?”

22Awo ne bajja e Betisayida; ne bamuleetera muzibe, ne bamwegayirira amukwateko.

23N'akwata muzibe ku mukono, n'amuggya mu kyalo, n'amufujjira amalusu ku maaso, n'amussaako emikono, n'amubuuza nti: “Oliko ky'osobola okulaba?”

24Ye n'atunula waggulu n'agamba nti: “Ndaba abantu batambulatambula, naye bali ng'emiti.”

25Ate n'ayongera okumussaako emikono ku maaso, n'atunuulira ddala, n'addawo ng'edda, n'alabira ddala bulungi byonna.

26N'amusindika ewaabwe n'amugamba nti: “Ne mu kyalo toyingiramu.”

27Yezu n'avaayo n'abayigirizwa be, n'alaga mu byalo eby'e Kayisariya-Filippo; mu kkubo n'abuuza abayigirizwa be nti: “Abantu bagamba nze ani?”

28Ne bamuddamu nti: “Bagamba nti Yowanna Batista, abalala nti Eliya, ate abandi nti omu ku balanzi.”

29Awo n'ababuuza nti: “Naye nga mmwe mugamba nze ani?”

30Petero n'ayanukula nti: “Ggwe Kristu.” N'abakuutira obutabuulirako muntu ku ye.

31N'asooka okubayigiriza ng'Omwana w'Omuntu bw'alina okubonyaabonyezebwa ebingi, n'okugaanibwa abakadde, bakabona abakulu n'abawandiisi, n'okuttibwa, n'okuzuukira nga wayiseewo ennaku ssatu.

32Ekigambo ekyo n'akyogerera ddala kyere. Petero n'amuddira, n'atandika okumukomako.

33Naye ye n'akyuka, bwe yalaba abayigirizwa be, n'akabukira Petero, n'agamba nti: “Nva mu maaso, Sitaani! Kubanga by'olowooza si bya Katonda, wabula bya bantu.”

34Awo n'ayita gy'ali ekibiina wamu n'abayigirizwa be n'abagamba nti: “Obanga oli ayagala okungoberera, yeerese, yeetikke omusaalaba gwe, angoberere.

35Kubanga buli alyagala okuwonya obulamu bwe, alibubuza; naye buli alibuza obulamu bwe okubeera nze n'okubeera Evangili, alibuwonya.

36Kale omuntu kimugasa ki okulya ensi yonna, sso n'afiirwa obulamu bwe?

37Ye omuntu ayinza kuwa ki okununula obulamu bwe?

38Kubanga buli akwatirwa nze n'ebigambo byange ensonyi mu zzadde lino esseegu era eryonoonyi, oyo Omwana w'Omuntu naye alimukwatirwa ensonyi lw'alijja mu kitiibwa kya Kitaawe wamu ne bamalayika abatuukirivu.”

← Chapter 7 Jump to: Chapter 9 →

Recommended Reading

Commentary Mark Commentaries → Devotional Mark Devotional Guide → Get This Bible BIBU1 Study Bible →