Romans 1

Luganda (BIBU1) (BIBULIYA ENTUKUVU)

Jump to: Chapter 2 →

1Nze Pawulo, omuweereza wa Kristu Yezu, eyayitibwa okuba Omutume, ne njawulibwa okulangirira Evangili ya Katonda,

2gye yasuubiza okuva edda ng'ayita mu balanzi ne mu Biwandiiko ebitukuvu,

3eyogera ku Mwana we, oyo mu bw'omuntu ava mu lulyo lwa Dawudi,

4ate eyabalibwa nti Mwana wa Katonda mu maanyi ga Mwoyo ow'obutuukirivu ageeragira mu kuzuukira kwe mu bafu, Yezu Kristu Mukama waffe,

5mwe twafunira omukisa gw'obutume, mu linnya lye tutuuse eri amawanga gonna obuwulize obuva mu kukkiriza;

6mu ago nammwe mwe mubalirwa, mmwe abaayitibwa mubeere aba Yezu Kristu.

7Y'abo bonna abali e Roma, abaagalwa ba Katonda abaayitibwa mubeere abatuukirivu. Eneema ebeere nammwe n'emirembe okuva ewa Katonda Kitaffe n'Omukama Yezu Kristu.

8Okusooka byonna, neebaza Katonda wange nga mpita mu Yezu Kristu ku lwammwe mwenna, kubanga okukkiriza kwammwe kulangirirwa mu nsi yonna.

9Kubanga Katonda gwe mpeereza mu mwoyo gwange, mu Vangili y'Omwana we, ye mujulirwa wange nti mbajjukira buli kadde bulijjo

10mu ssaala zange, nga mpanjaga nti: Katonda ng'abadde ayagadde, ku luno nsobole okubatuukako.

11Anti neegomba okubalabako, ndyoke mbaweeko ku birabo eby'omwoyo okubagumya;

12kwe kugamba nti tugumyaŋŋane olw'okukkiriza okwa buli omu, okwammwe n'okwange.

13Abooluganda, njagala mumanye ng'emirundi mingi nategeka okujja ewammwe, nga njagala mbeeko ebibala bye nkungula mu mmwe nga bwe nabikungula mu b'amawanga abalala, naye n'okutuusa kati nkyalemeseddwa.

14Bonna mbalinako ebbanja: Abagereeki n'abagwira, abayigirize n'abatali bayigirize.

15Kale njagala nammwe abali mu Roma okubayigiriza Evangili.

16Ddala nze Evangili tenkwasa nsonyi, anti ge maanyi ga Katonda okulokola bonna abakkiriza: Omuyudaaya y'asooka, n'Omugereeki n'addako.

17Kubanga mu yo obutuukirivu bwa Katonda mwe bwolekerwa mu kukkiriza okutwala mu kukkiriza; nga bwe kyawandiikibwa nti: “Omutuukirivu aliba mulamu olw'okukkiriza.”

18Anti obusungu bwa Katonda bwayolekebwa okuva mu ggulu ku bikolwa by'abantu byonna eby'obukafiiri n'obutali butuukirivu nga basibira amazima ga Katonda mu butali buutuukirivu.

19Kubanga ekisoboka okumanyika ku Katonda kyaboolekebwa; anti Katonda yakibooleka.

20Okuviira ddala ensi lwe yatondebwa, enfaanana ye eterabika: bwe buyinza bwe obutaggwaawo n'obwakatonda bwe, baabitegeerera bulungi mu ebyo ebyakolebwa; awo nno tebalina buwampanyizo,

21kubanga Katonda bwe baamumanya, tebaamussaamu kitiibwa nga Katonda, era tebaamwebaza, wabula badda mu kulowooza bitagasa, n'omutima gwabwe ogutategeera ne gujjako ekifu.

22Baawozanga tuli bagezi, kazzi nga bafuuse basiru.

23Ekitiibwa kya Katonda atafa ne bakiwaanyisa n'ebifaananyi by'omuntu afa, n'eby'ennyonyi n'ensolo n'ebyewalula.

24Katonda kyeyava abaawaayo eri amaddu g'emitima gyabwe ne mu buseegu, ne mu kujaajaamya bennyini emibiri gyabwe mu bokka na bokka.

25Abo amazima ga Katonda baagakyusa ne bagayita obulimba, ne badda mu kusinza ebitonde, ne balekerera Omutonzi oyo atenderezebwa emirembe gyonna. Amiina!

26Olw'okubeera ekyo Katonda kyeyava abawaayo mu kwegomba okusonyiwaza: anti abakazi baabwe enkozesa y'emibiri ey'obutonde baagiwanyisaamu n'eyo ekontana n'obutonde;

27n'abasajja nabo baava ku nkozesa ey'emibiri ey'obutonde n'abakazi ne babugujja n'okukwatirwagana amaddu bokka na bokka, abasajja nga bakola eby'ensonyi ne basajja bannaabwe, ne bafuna mu bo bennyini empeera egya mu nsobi yaabwe.

28Olw'obutafaayo kumanya Katonda, ne Katonda kyeyava abawaayo eri endowooza ezitajja n'enneeyisa etasaana,

29ne bajjula buli bugwagwa bwonna, obugwenyufu, omululu gw'ebintu, n'ettima, ne bajjula obuggya, obutemu, empaka, obulimba, n'effutwa; ba ŋŋambo,

30bawaayiriza, bakyawa Katonda, bavuma, beekuza, beepansi, bayiiyayiiya ebibi, batenguwa abazadde,

31basiru, batiiratiira, tebalina kwagala, tebalina kisa.

32Abo nandibadde ekiragiro kya Katonda bakimanyi nti abeeyisa bwe batyo basaanira kufa, tebakoma ku kya kubikola kyokka, naye bakkirizaganya n'abo ababikola.

Jump to: Chapter 2 →