Romans 12

Luganda (BIBU1) (BIBULIYA ENTUKUVU)

← Chapter 11 Jump to: Chapter 13 →

1Abooluganda, mbeegayiridde, olw'ekisa kya Katonda, muweereze emibiri gyammwe ng'ekitambiro ekiramu, ekitukuvu, Katonda ky'asiima, kwe kusinza kwammwe okw'omwoyo.

2Muleme kuyisa ng'ensi eno bw'eyisa; mufuuke nga muzza buggya emitima gyammwe, lwe munaakakasa Katonda ky'ayagala, ekirungi, ekisaana, ekituufu.

3Olw'eneema gye nafuna, ŋŋamba buli omu mu mmwe, aleme kwewanika okusinga bw'ali, wabula alowooze ku kubeera omwegendereza, buli omu ng'alabira ku kukkiriza Katonda kwe yamupimira.

4Kubanga nga bwe tulina mu mubiri ebitundu ebingi, sso byonna nga tebikola kimu,

5naffe bwe tuli, yadde tuli bangi, naye ffenna tuli mubiri gumu mu Kristu, ate buli kinnoomu abeera bitundu bya munne.

6Nga bwe tulina ebitone ebyawufu ng'ogerera ku neema eyatuweebwa, tubyeyambe: Oba bulanzi, okusinziira ng'oli bw'akkiriza,

7ow'okuweereza abeere ku kuweereza; omusomesa abeere ku gwa kusomesa,

8abuulirira abeere ku gwa kubuulirira, aliko ky'agaba akiweese mutima gumu; alabirira asseeko omwoyo, agirira ekisa abanaku akikoze na ssanyu.

9Okwagala kwammwe kubulemu obukuusa; ekibi mukikyawe, ekirungi mukinywerereko;

10mwagalane n'okwagala kw'ab'oluganda, musiŋŋane mu kuwaŋŋana ekitiibwa.

11Temuddirira mu kwagala, mubugujje mu Mwoyo, muweereze Omukama.

12Musanyukire mu bye musuubira, mu nnaku nga muguma, mwegayirire lutata.

13Abatuukirivu abali mu bwetaavu, mubadduukirire; abagenyi mubaanirize.

14Ababayigganya mubasabire emikisa; temubakolimira, mubasabire busabizi.

15Musanyuke n'abasanyuka; mukaabe n'abakaaba.

16Buli omu asse kimu ne munne, temwewanika, mukolagane n'abanaku, temweragaalaga bugezi.

17Ekibi nga kibaddewo, temukisasuzangamu kibi, wabula omwoyo mugusse ku ekyo ekirungi eri buli muntu.

18Nga bwe kisoboka, era nga bwe musobola, munoonye okubeera ab'emirembe n'abantu bonna.

19Abooluganda, temuwooleranga ggwanga, wabula mubirekere obusungu bwa Katonda; anti kyawandiikibwa nti: “Okuwoolera eggwanga kyange, nzija kusasula,” Omukama y'agamba.

20Naye ggwe omulabe wo nga muyala, muwe ekyokulya; nga muyonta, muwe ekyokunywa. Bw'okola bw'otyo olituumira ku mutwe gwe amanda agengeredde.

21Towangulibwanga kibi, wabula ekibi kiwangule na kirungi.

← Chapter 11 Jump to: Chapter 13 →