Romans 13

Luganda (BIBU1) (BIBULIYA ENTUKUVU)

← Chapter 12 Jump to: Chapter 14 →

1Buli muntu agondere abakulu abali mu buyinza, kubanga mpaawo buyinza butava eri Katonda, na bwonna obuliwo kati Katonda ye yabussaawo.

2Awo nno awaganyalira abali mu buyinza awaganyalira Katonda kye yassaawo, era abo abawaganyala balisalirwa omusango okubasinga.

3Abafuzi tebatiisa bantu balungi, wabula ababi. Oyagala obutatya ali mu buyinza? Kola bulungi, ajja kukusiima.

4Anti muweereza wa Katonda olw'obulungi bwo. Naye bw'okola obubi, tya, kubanga ekitala takutte kya busa. Anti muweereza wa Katonda okulaga obusungu bwe ku oyo akola obubi.

5Awo nno muteekwa okuwulira si lwa kutya busungu, naye olw'okubeera emmeeme yammwe ky'egamba.

6Muwe emisolo lwa nsonga ye emu, kubanga bano baweereza ba Katonda olw'okutuukiriza omulimu ogwo bulijjo.

7Bonna mubawe kye balina okuweebwa: ow'omusolo, musolo; ow'empooza, mpooza; ow'ekitiibwa, kitiibwa; ow'obukulu, bukulu.

8Tewabangawo n'omu gwe mulinako bbanja, wabula mpozzi ery'okwagalana; kubanga ayagala munne, aba atuukirizza Etteeka;

9anti ebiragiro: Toyendanga, Tottanga, Tobbanga, Teweegombanga. Oba waliyo mpozzi n'ekiragiro ekirala, byonna bifunzibwa mu kiragiro kimu kino: “Oyagalanga munno nga ggwe wennyini bwe weeyagala.”

10Okwagala tekukolera munno bubi; okwagala nno kyekuva kubeera okutuukiriza Etteeka.

11Mutegeere bulungi obudde buno; kaakati ke kaseera okuva mu tulo; anti okulokoka kuli kumpi naffe okusinga luli nga twakakkiriza;

12ekiro kigenze, olunaku lusembedde. Tweyambule nno ebikolwa eby'ekizikiza, twambale ebyokulwanyisa eby'ekitangaala.

13Tutambule na ssimbo nga mu budde obw'emisana; tuleme kudda mu biduula, mu kutamiira, si mu bitanda na mu kugwenyuka, si mu ndasano na mu kukwatiragana buggya,

14wabula mwambale Mukama Yezu Kristu; muleme kumalira birowoozo ku mubiri nga munoonya bwe munaamatiza amaddu gaagwo.

← Chapter 12 Jump to: Chapter 14 →