Romans 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Olw'ekyo nno, wattu ggwe buli muntu asala omusango, naawe tolina buwampanyizo, anti buli lw'osalira oli omusango, naawe oba ogwesalidde, manyanga ekyo ky'olamulamu oli naawe ky'okola.

2Anti tumanyi ng'abakola eby'engeri eyo Katonda abasalira omusango mu bwenkanya.

3Kale, wattu ggwe omuntu, asalira omusango abakola ebyo ate naawe ng'obikola, olowooza oliwona okulamulibwa Katonda?

4Oba weeyibaala ekisa kya Katonda ekingi, obukwatampola bwe n'okugumiikiriza kwe? Tomanyi ng'ekisa kya Katonda kigenderera kukutuusa ku kweddamu?

5Naye olw'obukakanyavu n'obuteenenya bw'omutima gwo, weesombera busungu bwa Katonda ku lunaku lw'alyolesezaako ennamula ye entuufu.

6Kubanga buli muntu alimuweera ng'agerera ku bikolwa bye.

7Abo, abakola obulungi n'obugumiikiriza nga balafuubanira ettendo, ekitiibwa n'obutafa, alibawa obulamu obutaggwaawo;

8naye abo abawalaza empaka, abatagondera mazima, wabula abagondera okukola obubi, ekibalindiridde busungu na bukambwe.

9Ennaku n'obulumi biriba mu buli mutima gwa muntu akola obubi: Omuyudaaya nga y'asooka, Omugereeki n'addako.

10Sso ekitiibwa, ettendo n'eddembe birifunibwa buli akola obulungi; Omuyudaaya nga y'asooka, Omugereeki n'addako.

11Kubanga Katonda taliimu kusosola mu bantu.

12Aboonoona nga tebalina tteeka balizikirira awatali tteeka; n'aboonoona nga balina Etteeka baliramulibwa Etteeka.

13Kubanga si nti abawulira obuwulizi Etteeka be batuukirivu, wabula abatuukiriza Etteeka be balifuuka abatuukirivu.

14Ab'amawanga abatalina Tteeka, mu buwangwa bwabwe bwe bakola ebyo eby'omu Tteeka, bo bennyini beebeerera etteeka, newandibadde nga tebalina Tteeka.

15Bo booleka nti Etteeka kye lyagala kyawandiikibwa mu mitima gyabwe; emmeeme yaabwe ejulira wamu nabo; ebirowoozo byabwe bikubagana nga bibavunaana oba nga bibawolereza

16ku lunaku olwo Katonda lw'aliramula ku bwa Yezu Kristu abantu bye baakisa, ng'Evangili yange bw'egamba.

17Kale nno obanga oyitibwa Muyudaaya, eyeesiga Etteeka, eyeetendera mu Katonda,

18amanyi ky'ayagala, kubanga oyigirizibwa Etteeka, eyeetwala ng'alowooza ekisinga obulungi,

19eyeetwala nti ggwe okulembera bamuzibe, atangaaza abali mu nzikiza,

20nti oli mugunjuzi w'ababuyabuya, omuyigiriza w'abato, alina mu Tteeka amagezi n'amazima,

21ggwe agenda ayigiriza abalala, ate ggwe teweeyigiriza? Ggwe asomesa abalala nti tobbanga, ate ggwe obba?

22Ggwe agamba nti toyendanga, ate ggwe oyenda? Ggwe eyeenyinyala ebifaananyi bya balubaale, ate ggwe onyagulula ebiggwa?

23Ggwe eyeetendera mu Tteeka, ate ggwe onyoomoola Katonda ng'omenya Etteeka?

24Anti nga bwe kyawandiikibwa nti: “Erinnya lya Katonda livumibwa mu b'amawanga olw'okubeera mmwe.”

25Bw'oba otuukiriza Etteeka, olwo okutayirirwa kugasa; naye bw'oba olimenya, okutayirirwa kwo kufuuka obutatayirirwa.

26Oli atali mutayirire bw'akwata ebiragiro by'Etteeka, obutatayirirwa bwe tebubalibwa ng'okutayirirwa?

27Oli atuusa Etteeka, nandibadde mu mubiri gwe si mutayirire, agenda kukusalira omusango okukusinga ggwe alimenya sso ng'oli mutayirire, olirina ne mu buwandiike.

28Oyo si Muyudaaya abeera obubeezi Omuyudaaya kungulu, n'okutayirirwa okwa nnamaddala tekuba kwa kungulu na kwa mubiri bubiri.

29Wabula oyo Muyudaaya ddala aba Omuyudaaya munda, era okutayirirwa okwa nnamaddala kubeera kwa mu mutima na mu mwoyo, naye si mu nnukuta; ettendo lye teriva mu bantu, wabula mu Katonda.

← Chapter 1 Jump to: Chapter 3 →