Romans 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Awo nno Omuyudaaya asinza ki? Oba kwo okutayirira kugasa ki?

2Okusinga kwo asinga mu buli ngeri. Okusookera ddala, bo be baakwasibwa ebigambo bya Katonda.

3Binaaba bitya abamu mu bo bamala bataba beesigwa? Bo olw'obutaba beesigwa kitta obwesigwa bwa Katonda? N'akatono!

4Katonda ye k'abe w'amazima, ye buli muntu k'abe mulimba, nga bwe kyawandiikibwa nti: “Obeere mutuufu mu bigambo byo, osinge bwe bakuwozesa.”

5Oba ffe obutaba batuukirivu kye kireetera Katonda okulaga obutuukirivu bwe, tunaagamba tutya? Nti Katonda si mutuufu okutulaga obusungu? - singa mbuuza ng'omuntu bwe yandibuuzizza.

6N'akatono! Ggwe ate Katonda yandiramudde atya ensi?

7Oba nze okulimba kireetera obutuukirivu bwa Katonda okuyitirira n'afuna ekitiibwa, lwaki nkyalamulibwa ng'omwonoonyi?

8Olwo lwaki tetukola bibi muveemu ebirungi – ng'abamu bwe batukonjera nti bwe tugamba. Abo nno gubasinga mu butuufu.

9Awo nno kiki? Tubasinga? Nedda, n'akatono, anti navunaanye dda Abayudaaya n'Abagereeki nti bonna bali mu maanyi ga kibi,

10nga bwe kyawandiikibwa nti: “Mpaawo mutuukirivu, teri, n'omu;

11tewali ategeera, tewali anoonya Katonda.

12Bonna bawabye, bonna baweddemu ensa; mpaawo akola kirungi, newandibadde omu ati!

13Omumiro gwabwe ntaana eyasamye, beeyamba ennimi zaabwe okulimba. Obusagwa bw'enswera buli wansi w'emimwa gyabwe.

14Akamwa kaabwe kajjudde ebikolimo n'obukaawu.

15Ebigere byabwe byanguyira okuyiwa omusaayi;

16mu makubo gaabwe mulimu kuzikirira na nnaku.

17Tebamanyi kkubo lya ddembe.

18Tebalinaamu kutya Katonda mu maaso gaabwe.”

19Tumanyi nga byonna Etteeka bye ligamba libigamba abo abakwatibwa Etteeka, buli mumwa gulyoke gubunire, ensi yonna eryoke ebalibwe bw'eri ensobya mu maaso ga Katonda.

20Kubanga tewali alifuuka mutuukirivu mu maaso ge olw'ebikolwa eby'omu Tteeka, kubanga okumanya ekibi kujja na Tteeka.

21Kati nno obutuukirivu bwa Katonda bweyolekera ebweru w'Etteeka, newandibadde nga bwajulirwa Etteeka n'Abalanzi,

22obutuukirivu bwa Katonda obuva ku kukkiriza Yezu Kristu ku bonna abakkiriza. Kubanga tewali njawulo,

23anti bonna baayonoona, baabulwa mu bo ekitiibwa kya Katonda.

24Bafuuka batuukirivu olw'eneema ye eyaweebwa obuwa, olw'okununulibwa mu Kristu Yezu,

25Katonda gwe yassaawo abeere omutango mu musaayi gwe, omutango gwe tufunira mu kukkiriza. Kwali kwoleka butuukirivu bwa Katonda, kubanga mu kugumiikiriza kwa Katonda yasonyiwa ebibi ebyayita,

26yagenderera ayoleke mu budde buno nti ye mutuufu era afuula oyo akkiriza Yezu Kristu n'aba omutuukirivu.

27Kale okwetenda kwaffe kuluwa? Ekyo kirekebwa na bbali. Lwa tteeka ki? Olw'ebyo bye twakola? Nedda, wabula lwa tteeka lya kukkiriza.

28Kubanga tugamba nti omuntu afuuka mutuukirivu lwa kukkiriza, awatali na bikolwa bya mu Tteeka.

29Kazzi Katonda wa Bayudaaya bokka? Ab'amawanga si Katonda waabwe?

30Yee, n'ab'amawanga Katonda waabwe, ndaba Katonda ye omu alifuula omutayirire omutuukirivu olw'okukkiriza n'atali mutayirire olw'okukkiriza.

31Awo nno bwe tukkiriza ng'Etteeka tulidibizza? Nedda! N'okuba Etteeka tuba tukakasa kkakase.

← Chapter 2 Jump to: Chapter 4 →