Romans 11

Luganda (BIBU1) (BIBULIYA ENTUKUVU)

← Chapter 10 Jump to: Chapter 12 →

1Awo nno mbuuza, Katonda yayabulira abantu be? N'akatono! Nze nzennyini ndi Muyisirayeli, muzzukulu wa Yiburayimu, ow'omu kika kya Benyamiini.

2Katonda tasuuliriranga bantu be be yamanya okuva edda. Temumanyi Ebiwandiiko ebitukuvu kye byogera ku Eliya ng'alaajanira Katonda olw'Abayisirayeli, nti:

3“Ayi Mukama, abalanzi bo babasse, emyaliiro gyo bagisimbuddewo; nze nzekka nze nsigaddewo, ate nange bannoonya okunzita.”

4Katonda okumwanukula yamugamba atya? Yamugamba nti: “Neeterekeddewo abasajja kasanvu abatakubiranga Baali mavi.”

5Bwe guli na kati; waliwo abaasigalawo, eneema be yeeroboza.

6Oba nno neema, awo nno sibaalobozebwa lwa bikolwa, kubanga olwo eneema teyandibadde neema n'akamu.

7Awo nno kiki? Yisirayeli yalemwa okufuna kye yali agoba; abalondemu be bakifunye; abasigaddewo baaguguba,

8nga bwe kyawandiikibwa nti: “Katonda yabawa omwoyo gw'otulo otungi, amaaso agataalabe, n'amatu agataawulire n'okutuusa ku lunaku luno olwa leero.”

9Dawudi naye n'agamba nti: “Olujjuliro lwabwe lubafuukire omutego, ekitimba, ekyesittazo, ekibonerezo;

10amaaso gaabwe gajjeko ekifu, baleme kulaba, n'emigongo gyabwe gibenduke ennaku zonna.”

11Awo nno mbuuza, beesittala ne bagwa? N'akatono! Kyokka olw'okusobya kwabwe okulokoka kwatuuka ku b'amawanga Yisirayeli alyoke akwatibwe obuggya.

12Oba okusobya kwagaggawaza ensi, era bo okulemwa nga kyagaggawaza ab'amawanga, obugagga bulyenkana wa Yisirayeli yenna ng'akkiriza?

13Kati ab'amawanga mmwe ŋŋamba: Nga nkyali Mutume w'amawanga, omulimu gwange nagussangamu ekitiibwa,

14nga njagala mu b'olulyo lwange nsiikuulemu obuggya, mbeeko abamu mu bo be ndokola.

15Oba okubasuula kyaleeta okutabagana kw'ensi, okubakkiriza kiritegeeza ki? Si kuzza bulamu ababadde abafu?

16Ebibala ebisooka bwe biba ebitukuvu, n'obutta bwonna buba butukuvu; ekikolo bwe kiba ekitukuvu, n'amatabi gonna bwe gaba.

17Naye singa amatabi agamu gawawaagulwako, ate ggwe oliva ey'oku ttale, ne bakuwaayira kuli mu kifo kyago, okugabana ku bugimu bw'oliva,

18leka nno kwetendera ku matabi; bw'oba weetenda jjukira nti si ggwe owaniridde ekikolo, ekikolo kye kikuwaniridde.

19Ojja kugamba nti: “Anti amatabi gaawawaagulwako nze bampaayireko.”

20Kituufu. Gaawawaagulwako olw'obutakkiriza; ggwe wooli lwa kubeera kukkiriza. Awo nno leka kwetenda, tya buti.

21Obanga Katonda amatabi agaakulirako teyagasaasira, nammwe tagenda kubasaasira.

22Mutegeere nno ekisa kya Katonda ate n'obukambwe bwe. Bukambwe ku bali abaagwa, naye ku mmwe kisa kya Katonda singa musigala mu kisa kye, oba si ekyo nammwe mulitemwako.

23Na bali nabo bwe bataligugubira mu butakkiriza bwabwe, baliwaayirwako, kubanga Katonda asobola bulungi okubawaayirako ogwokubiri.

24Oba wasalibwa ku oliva ey'oku ttale kwe wakulira ne bakuwaayira ku oliva ennime, mu butonde ekitali kya bulijjo, nga kiriba kyangu amatabi agaakulirako okuddamu okuwaayirwa ku oliva yaago.

25Abooluganda, saagala mubeere awo nga temumanyi kyama kino, sikulwa nga mweyita abagezi: okuguguba kwajjira kitundu butundu eky'Abayisirayeli, okutuusa ab'amawanga bonna lwe bannaggwayo okuyingira,

26olwo nno Abayisirayeli bonna ne balyoka balokoka, nga bwe kyawandiikibwa nti: “Omulokozi aliva mu Siyoni, aliggyawo mu Yakobo obukafiiri bwonna;

27eno y'eriba endagaano yange nabo, bwe ndiggyawo ebibi byabwe.”

28Weewaawo okusinziira ku Vangili balabe ba Katonda olw'okubeera mmwe; naye okusinziira ku kulondebwa kwabwe, bakyali baganzi olw'okubeera bajjajjaabwe.

29Katonda bw'agaba oba bw'ayita, teyejjusa.

30Nga mmwe luli bwe mwali mutawulira Katonda, ate kati n'abagirira ekisa olw'okubeera obutawulira bwa bali,

31nabo kati tebawulira olw'okubeera ekisa ekibagiriddwa nabo balyoke basaasirwe.

32Kubanga Katonda abantu bonna yabasibira mu butawulira alyoke bonna abasaasire.

33Obugagga, amagezi n'okumanya kwa Katonda nga biwanvu kuzimiriza! By'ateesa nga tebyefumiitirizika, n'amakubo ge nga tegawenjeka!

34Ani yali ategedde Omukama by'alowooza? Ani yali amusalidde ku magezi?

35Ani yali amutonedde nti ye kati amuddize?

36Kubanga byonna byava mu ye, byayita mu ye era bidda wuwe. Atenderezebwe emirembe gyonna. Amiina.

← Chapter 10 Jump to: Chapter 12 →