Numbers 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Te ’ba nga eca ’ba onopi ono ’diyiru, e’yo ovupi onzi Yehova ma bileari ’yozu; Yehova ka e’yo nde eri ra, eri ovu ani adrasi, aci Yehovani nga ti ko yi ma eselia, ’ba evezu pari hema asozuri ma kalati vile asizuria.

2’Ba yi nga ani wu Musa vu; Musa nga di Yehovani zi, aci nga di ’dra ra.

3’Da pari nde ma ru Tabera’i, Yehova ma acini ti kole vele yi ma eseliarisi.

4’Ba ongulumuru yi osapi yi be ’diyi e’do ’ye lisi; anzi Israelini nga vini awu wu dika, kini, A’dini nga ama dri za fe nyazuni ya?

5Ama ega e’bi amani nyale aje kokoru, Misiria ’dayi ma e’yo, olujo pie, ago pie, ojo pie, mutungulu pie, mutungulu aji dropi turi pie;

6te curu’do ama ava oti ra, afa azini aceni aluni ku, ama kiri afa manaru ’diri lu’i.

7Isu de mana nde ovu ekile kulu’bu efile, e’da i vini aya bideliumi rurile.

8’Ba yi adri fu aci kuru kuru eri okuzu, yi adri eri ’i oni dria, kani sizu pati anya sizuri ma alia, yi nga eri ova otaka ma alia, nga eri otu olizaru ngulu ngulu; ajini ovu odu o’diruri ma ajile.

9Andreli ka ’ya pari ’bani hema asozuria inisi, mana nde adri o’de eri be indio

10Musa nga ’ba eri yini awu wuria, ’ba alu alu ’ba yi vile akua, ’diyi be, ’ba alu alu i vile hema ma tilia; Yehova ovu ani adrasi tu, Musa ovu vini candisi indio

11Musa nga di ’yo Yehova ma tia, Mi ’ye ati’bo mini onzi ’dini a’disi ya? Ma isuni asi ndriza mi milia ku a’disi ya, mini suru ’dori dria ma e’yo ’bazu ani ma dria teriru ’doni ya?

12Ma oti ’ba ’diyi dria ma’i ya? Ma osi yi ma’i, mini ani ’yozu ma tia, Mi o’du yi mi agatia, endriani o’dekua ’dulerile, jizu kpere angu mini ndra oyoni sole yi ma a’bipi tiaria ’dini ya?

13Ma inga za isu ngoa ya fezu ’ba ’diyi dri dria? Yini wule ma vu, kini, Mi fe za lama dri, ama ma nya beni, ’dinirisi.

14Ma econi suru ’diri dria ’duzaru ma’i a’dulesi ku, a’disiku e’yo ’diri eri teriru ma dri nzizaru tu aga ra.

15Mi ka le ma ’ye ’dini, ma zi mi tia, bani mini ma fuzu kai curu’do, ma ka asi ndriza isu mi milia ’bo, mi ku ma candi mani amboru turi ndrezu ’dini ku.

16Yehova nga di ’yo Musa ma tia, Mi oku ’ba ’wara Israelini ’diyi ma azi kali aziri jizu ma vu, ’ba mini nile yi ’ba ’wara suru ma eselia, ovupi ambo ambo yi ma drilia ’diyi; mi ji yi hema ti ecizaniri ma alia, yi ma oso pa ’dale mi be.

17Ma nga esi va e’yo ’yozu mi be ’daa, ma nga orindi ovupi mi driari ma esele azini ’du ’ba yi ma dria indi; yi nga ani ’ba nde ’diyi ma teri nzizaruri ’du mi be tualu, mi kazu eri ’duzu dria mi’i a’dulesi ku beni.

18Te mi ma ’yo ’ba ongulumuru ma tia, Emi ’ba emi alaru dru ma e’yosi, te emi nga za nya ra; a’disiku emi owu Yehova ma bilea ’bo, kini, A’dini nga ama dri za feni ya? Te e’yo amani ndra Misiriari onyiru. E’yo ’dirisi Yehovani nga za fe emi dri ra, emi nga nya ra.

19Emi ngani za nya kiri o’du alu, kani o’du iri, kani o’du towi, kani vini o’du mudri, kani o’du kali iri ’diyisi a’dule ku,

20te emi nga za nya mba alu pi, de nga eri efuni emi omvulesi ku, de nga vini irijini gani emi dria ku, emini Yehova ovupi emi eseliari gale sirisi, emini awu wule eri ma drilia kini, Ama efu ndra Misiriasi a’disi ya? ’dinirisi.

21Musa nga vini ’yo ra, ’Ba nde mani ovuzu yi ma eselia ’doyi yi ’ba alifu turu azia acipi pasi ’diyi, te mi ’yo ra, Ma nga za fe yi dri yini nyazu mba alu pi!

22’Ba ma oli anyapa nyiri ’diyi anyapa ’wara be zanini cazu ani yi dri ra ya? ’Ba ma oku e’bi miria ’diyi dria zanini cazu ani yi dri ra ya?

23Yehova nga ’yo Musa tia, Yehova ma dri etru i alinaru ’bo ya? Mi nga ndre curu’do, kani e’yo mani ’yoleri nga i ’ye mi dri ra, kani ku yani.

24Musa nga di fu amve e’yo Yehovani ’yoleri oluzu ’ba ma tia, eri nga ’ba ’wara suru ma eselia ’diyi oku kali aziri, nga yi o’ba hema ma ageiasi kuru.

25Yehova nga di esi va iriti ma alia, nga e’yo ’yo eri be, nga orindi ovupi eri ma driari ma esele azini ’du, nga ’ba ’ba ’wara kali aziri ’diyi ma dria; te eri nga eca ’dini, orindini riria yi ma driaria, yi nga e’yo ondri. Te vutinia yi ’yeni ’dinile dika ku.

26Te ’ba iri ace ’dani pari ’bani hema asozuria, aluri ma ru Elidadi’i, aziniri ma ru Medadi’i; orindi ri yi ma dria, yi ’ba yini yi ma ru osile ’diyi ma azi, te yi funi ndra nga muzu hema vu ku; yi nga e’yo ondri pari ’bani hema asozuria.

27Karilau azini nga nzu e’yoni olu Musa ma tia kini, Elidadi pi Medadi be yi e’yo ondri pari ’bani hema asozuria ’daa.

28Yosua Nuni mvi azi ngapi Musa driri, ’ba ndra erini opele ’diyi ma azi, nga e’yo omvi kini, Opi mani Musa la! mi oga yi dri si.

29Te Musa nga ’yo eri tia, Mi a’ya ’ba ma e’yosi ya? ’Ba ’diyi la! Mungu ka te fe ’ba Yehovani dria ’diyini ofuzu nabiru, Yehovani i ma Orindi ’bazu yi ma dria, ’yeke fo!

30Musa nga di fi pari ’bani hema asozuria, eri’i ’ba ’wara Israelini ’diyi be tualu.

31Oli nga efu Yehova vurisi, nga ali’bo eji engazu miria, nga fe yini o’dezu pari ’bani hema asozuri ma ageia, ekile acita o’du aluni kala aluria, azini acita o’du aluni kala aziniriarile, pari ’bani hema asozuri acezu kuru, ovuzu nyaku ma dria ekile wuale iri ’dipile.

32’Ba nde efu o’du ’darisi etu zu ini be rra, o’du drusiri be dria, ali’bo nde omvuzu; ’ba ka ali’bo omvu were tu ti, eri omvu ini kekele mudri; yi nga yi aja yi dri pari ’bani hema asozuri ma ageia kuru kuru.

33Te zani nga ovuria yi ma tilia de nga yi nyani ku, adra Yehovani nga di ’ba ’diyi ma ruaa, Yehova nga ’ba dri ja azo muaru onzi turisi.

34Omve pari nde ma ru Kibireti-hatava’i, ’yini ’ba ’yepi lisi ’diyi ma avu sale ’dalerisi.

35Engazu Kibiroti-hatavaasi ’ba nga dri ko acizu Hazerotia, yi nga di ovu Hazerotia ra.

← Chapter 10 Jump to: Chapter 12 →