Numbers 16 — Lugbara (E’yo Siza Alatararu Munguniri BIBLIA)

1Te Kohati Levi mvi ma mvi lzihari ma mvi Kora pi, Eliabu anzipi pie, yi Datani pi Abiramu be, Oni Peleti mvi pie, yi anzi Rubenini ’diyi, yi nga ’ba oku,

2yi nga pa so Musa ma drilia, yi’i anzi Israelini ma azi ovupi opiru ’ba ongulumuru ma drilia, ’ba omvele fizu okuzaa ovupi ru kuza be turu iri drini kali towi ’diyi be,

3yi nga yi oku Musa pi ma dri aruzu Aroni be, nga ’yo yi tia, Emi oku azi emi dria tu aga ra! Te ’ba ongulumuru ’diyi dria alu alu yi alatararu, azini Yehova ovu yi ma eselia ci; te emi ’ba emi uru ’ba Yehovani yi okupi ongulumuru ’diyi ma drilia opiru emi drisi ’dini a’disi ya?

4Musa ka e’yo ’diri eri ra, eri eco i o’bukuru va.

5Eri nga di ’yo Kora pi ma tia ’ba erini okule ’diyi be dria, kini, O’bitisi Yehovani nga ’ba erini yi a’dipi yari ma e’yo ece, ’ba alatararu ’diyi yi a’dipi yari be, eri nga fe erini esizu i vu ogogoni, ada eri nga ’ba erini peleri fe esizu vu ogogoni.

6Emi ma ’ye ’dini, emi Kora la, emi ’ba erini okule ’diyi be: emi o’du emini otekua obiese vezu ’diyi;

7emi ’ba aci yi ma alia, obiese ’bazu yi ma dria Yehova ma drilia drusi, te eri nga ovu ’dini, ’ba Yehovani ngale peleri nga ovu alatararuni. Emi anzi Levini la, emi oku azi emi dria tu aga ra

8Musa ’yo vini Kora ma tia, mi eri di, emi anzi Levini la!

9Mungu Israelinini emi esele cozu ndu ’ba ongulumuru Israelini ’diyi be, fezu emini esizu i vu ogogo, emini ani bere Yehovani ma azi ngazu, pa sozu ’ba ongulumuru ma milia azi ngazu yi aza kozuri emi milia e’yo wereni ya?

10E’yo erini fezu emi esizu ogogo, emi’i emi adripi Levi ma anzipiru ’diyi pieri, e’yoni wereru ya? Emi nda ovuzu kuhaniru indi ya?

11E’yo ’disi, mi’i, ’ba mini okule ’diyi be dria, emi oku lu emi Yehova ma dri aruzu’i; te Aronini a’dini emini onozu ani eri ma dria ya?

12Musa nga ’ba ti pe Eliabu anzipi Datani pi omvezu Abiramu be, te yi ’yo ra, Ama muni ku.

13Mini ama ofuzu engazu angu lesu pini razu alenia anyu oso beriasi, ama dri jazu rokoari, e’yoni wereru ya? Mi levini mi enyami ’bazu opiru ama drilia indi ya?

14Azini vini mi ejini ama angu lesu pini razu alenia anyu oso beria ku, mi feni vini amvu piyi ama dri amvu zabibuni be ovuzu afa amaniru ku. Mi le ’ba ’diyi ma mile ope ra ya? ma muni ku.

15Te Musa ovu adrasi tu, eri ’yo Yehova tia, Mi ma a’i edeta yini edeleri ku. Ma ’duni akanya alu ’dini yini ku, ma ’yeni vini ’ba aluni yi ma eseliari onzi ku.

16Musa nga ’yo Kora ma tia, Mi ma ovu Yehova ma drilia drusi, ’ba dria mini okule ’diyi pie, mi’i azini yi’i, azini Aroni.

17Emi alu alu ma 0’du emini otekua obiese vezu ’diyi, emi ma o’ba obiese yi ma dria, emi dria alu alu ma cii otekua emini obiese vezu ’diyi ogogo Yehova ma drilia, otekua; obiese vezu turu iri drini kali towi ’diyi; emi Aroni be, emi alu alu ma ovu otekua obiese vezuri be indio

18Yi alu alu o’du di otekua yini obiese vezu ’diyi ra, nga aci o’ba yi ma alia, nga obiese o’ba yi ma dria, nga pa so hema ti ecizaniri ma tilea Musa pi Aroni be tualu.

19Kora nga ’ba ongulumuru oku dria yi ma dri aruzu hema ti ecizaniri ma tilea. Diza Yehovani nga i e’da ’ba ongulumuru ’diyi ma milia dria.

20Yehova nga ’yo Musa pi ma tia Aroni be, kini,

21Emi ma co emi eselia ’ba ongulumuru ’diyi be ndu ndu,ma ma ja yima dri mbelekocici ani.

22Te yi eco yi o’bukuru va, nga ’yo ra, Mungu la! Mungu ’ba dria ma ari be ’diyi ma orindiniri, ’ba alu ka nga e’yo onzi ’yeni, mi nga ani adra ’ba ’ba ongulumuru ’diyi be dria ya?

23Yehova nga di ’yo Musa ma ria, kini,

24Mi ’yo ’ba ongulmuru ’diyi ma tia, kini, Emi ma nga Kora pi ma hema ma ageiasi, Datani pie, Abiramu pie ra.

25Musa nga di enga muzu Datani pi vu Abiramu be; ’ba ’wara Israelini nga eri ma vuti bi ra.

26Eri ’yo ’ba ongulumuru ma tia, kini, Ma matu ’ba emi vu, mi ma da emi ’ba e’yo onzi be ’diyi ma hema ageiasi ra fo, emi elo afa yini ina azi aluni ku, emi kazu dri jazu e’yo onzi yini dria ’diyi ma alia ku.

27E’yo ’disi yi nga di Kora pima hema ma ageiasi Datani pie, Abiramu pie, kala vusi dria ra; Datani pi nga di fu amve Abiramu be, nga pa so hema yini ma tilea oku yini pie, anzipi pie, anzi yiru nyiri ’diyi pie dria.

28Musa nga ’yo ra, Emi nga ni geri ’disi Yehova pe ma ti azi ’diyi ngazu driani; a’disiku ma ’yeni e’yo ’diyi ondua manisi ku.

29’Ba ’diyi ka dra drasi ’ba driani dralerile, kani e’yo ka yi isu e’yoni ’ba dria isulerile, de ’di Yehova peni ma tini ku.

30Te Yehova ka e’yo o’diru ’ba, nyaku ka i ti zi walaru, ka nga yi oki pi afa yini ovuzu yi be ’diyi Vie dria, yi ka nga esi ’bile ’ba drazaniria idriru idriru, ka’dinile emi nga va ra kini ’ba ’diyi ’ba Yehovani aparakaru ’bo.

31Te eri nga eca ’dini, eri ka de e’yo ’diyi ’yozu dria ’bo, nyaku yi ma pa etialeruri asi ira;

32nyaku azi i ti walaru, oki yi pi pi ’ba yi vile joa ’diyi pie, ’ba dria fipi Koraniru ’diyi pie, afa yini pie dria.

33’Dini yi’i azini ’ba dria fipi yiniru ’diyi pie, nga si va idriru idriru ’bile ’ba drazaniria. Nyaku opi i ti yima dria, yi ja dri ’ba ongulumuru ma eseliasi ra.

34’Ba Israelini ovupi yi ma ageia ’diyi aria nga apa awu yiniri ma e’yosi ra, te yi kini, Nyaku kazu i ama okizu indi ku.

35Aci ibi enga Yehova vu, esi va ’ba turu iri drini kali towi obiese evepi edetaru ’diyi evezu teketeke ra.

36Yehova nga ’yo Musa ma tia, kini,

37Mi ’yo Eleazari kuhani Aroni mvi ma tia, eri ma e’du otekua obiese vezu ’diyi aci vepi veri ma aliasi; mi ma ere vini aci nderi ma ti ’darisi ra. Otekua ’diyini ovule alarararurisi,

38ada ’ba e’yo ezapi fepi yi ma ngulupi ma idrini avizu ’diyima otekua obiese vezu ’diyi; ma di yi kparakalaru pari edeta edezuri ma ruaa a’buzu, yini yi fele edetaru Yehova ma driliarisi, e’yo ’disi yi ovu ani alatararu; yi nga ovu anzi Israelini dri ecetaru,

39Kuhani Eleazari nga otekua molaru obiese vezu ’ba acini evele ’diyini fele edetaru ’diyi o’du ra, yi nga yi di ani afa pari edeta edezuri ma ruaa a’buzuriru,

40ovuzu ani anzi Israelini dri afa egata fepiriru, ’dini ani’bo ovupi Aroni ma oriru kuri aluni ma esi ogogo obiese vezu Yehova ma drilia ku, eri kazu ovuzu Kora pile ’ba erini okule ’diyi be ku; ekile Yehovani ’yole eri tia geri Musa vurisirile.

41Te drusi ’dini ’ba ongulumuru anzi Israelini ’diyi dria nga ono Musa pi ma dria Aroni be kini, Emi ofu ’ba Yehovani ’diyi ’bo.

42Te eri nga ecea ’dini, ’ba ongulumuru ka yi oku Musa pi ma dri aruzu Aroni be, yi nga lu hema ti ecizaniri vu; te mi ndre, iriti a’bu eri ma dria ci, azini diza Yehovani e’da ira.

43Musa pi Aroni be nga emu hema ti ecizaniri ma drilia.

44Yehova nga di ’yo Musa tia, kini,

45Mi ma nga ’ba ongulumuru ’diyi ma eseliasi ra, ’ma ma la yi ma dri mbelekocici beni. Yi nga di yi eco o’bukuru va.

46Musa nga ’yo Aroni tia, Mi ’du otekua mini obiese vezuri, mi ma ’ba aci pari edeta edezuriari alenia ci, mi ’ba obiese drinia, mi ji eri mbele ’ba ongulumuru vu, e’yo onzi yini edezu; adrani efule Yehova vu ’borisi, azo muaru e’do di ’bo.

47Aroni nga afa nde ’du Musani ’yolerile, nga nzu ’ba ongulumuru ma eselia; te mi ndre, isu de azo muaru e’do fizu ’ba ma eselia ’bo; eri nga obiese ’ba drinia, ’ba nde ma e’yo onzi edezu.

48Eri so pa ani ’ba odrapi ’bo ’diyi pi ma eselia ’ba idriru ’diyi be; azo muaru nga di i nze ra.

49Isu de ’ba odrapi azo muarurisi ’diyi yi alifu mudri drini su, drini turu aziri, yi ’ba odrapi e’yo Koranisi ’diyi ma ereru.

50Aroni nga di mvi Musa vu hema ti ecizaniri ma tilea; azo muaruri nga di i nze ra.