Numbers 14

Lugbara (E’yo Siza Alatararu Munguniri BIBLIA)

← Chapter 13 Jump to: Chapter 15 →

1’Ba ongulumuru dria nga awu wu o’duko urusi, ’ba owu mindresi ini rra.

2’Ba Israelini dria nga ono Musa pi ma dria Aroni be; ’ba ongulumuru dria nga ’yo yi tia, kini, Mungu ka ndra fe amani odrazu angu Misiriaria ’yeke fo! Azini vini Mungu ka ndra fe amani odrazu angu rokoru ’doria ’yeke fo!

3Yehovani ama ofi angu ’doria, amani ani o’dezu sei ma sia ’doni a’disi ya? Ari’ba yi nga oku amani piyi opa yiniru anzi amani nyiri ’diyi be ra. Bani eri onyiru amani mvizu Misiria ku ya?

4Yi nga e’yo ’yo yi ma eselia, Ama ma pe di ’ba azini ovuzu ama drilia, mvizu Misiria.

5Musa pi Aroni be nga di yi eco o’bukuru va anzi Israelini yi okupi ongulumuru ’diyi ma drilia dria.

6Yosua Nuni mvi pi Kalebu Yefune mvi be, yi ’ba angu ma orile gapi ’diyi ma azi, yi osi yi ma bongo ra,

7yi nga ’yo anzi Israelini ongulumuru ’diyi ma tia dria kini, Angu amani agale alenia eri ma orileni gazuri eri angu onyiru tu.

8Yehova ka ovu amasi ayikosi, eri nga ama eji ofi angu nde ’dari ma alia, eri fezu ama dri; eri angu lesu pini razu alenia anyuoso beri’i.

9Te kiri emi ma mbu nga Yehova ma ruaasi amve ku fo! ma ’ye vini urisi ’ba angu nde ’diyisi ku, yi nyaka amaniru; afa yini yi ta mbazu aniri ku yi ’bo; te Yehovani ama be ci, emi ru yi ku.

10Te ’ba ongulumuru dria ’yo ma o’be yi onisi ra. Diza Yehovani nga di i e’da hema ti ecizaniri ma alia anzi Israelini ’diyi ma milia dria.

11Yehova nga ’yo Musa ma tia, Suru’dori nga ma ’ba aparakaru ewu ngopi ya? Yi ngani vini ma a’i ku ’dini ewu ngopi ya, ma ka tro tali ’ye yi ma eselia kakau ra ti?

12Ma nga di yi dri ja azo muanisi, ma nga yi ga si yi ma ovu ani ’ba mani dika ku, ma nga mi ’ba ovuzu suru amboru azini okporu yi agapi rariru’i.

13Te Musa ’yo Yehova ma tia, Te ’ba Misiria ’diyi nga di e’yoni eri ra, te mi ofu ndra suru ’dori okpo minisi yi ma eseliasi,

14yi nga e’yo nde olu ’ba ovupi angu ’diri ma alia ’diyi ma tia. Te yi eri mi Yehovani ovuzu suru ’dori ma eseliari ma e’yo ’bo; a’disiku ’bani mi Yehova ndrele milia miliarisi, azini iriti minini pa sole yi ma dria, mini dri cele yi ma drilia iriti pa sopi piriruri ma alia etusi, azini aci pa sopi piriruri ma alia inisirisi.

15Te mi ka suru ’dori ofu dria dria, ’ba jururu e’yo kuza mini eripi ’bo ’diyi nga di ’yo kini,

16Yehovani ecole suru ’dori jile ofile angu ndra erini oyoni sozu yi beria kurisi, eri ofu di yi ani angu roko driaria ra,

17Te di, ma zi mi tia, mi fe okpo Opini ma ovu amboru ekile mini ’yolerile, kini,

18Yehova ovu e’yere, ’bani adra mbele ku, eri ma yiki tu, eri e’yo onzi pi wu ezata be ra, te ngani ’ba e’yoni ndele rari ku panga kokoru aluni ku, eri atapi ma e’yo onzi ofe yi ma anzi ma ruaa kpere a’bianzi nari kani a’bianzi suri vu.

19Ma zi mi tia, mi wu suru ’dori ma e’yo onzi yiki mini amboruri vusi fo! ekile mini yi ma e’yo onzi wule engazu o’du yini efuzu Misiriasiria kpere curu’do ’borile.

20Yehova nga di ’yo ra, Ma wu e’yo onzi yini ’bo ekile mini ’yolerile;

21te ada ada mani ovule idri berile, azini ekile diza Yehovanini ngale gale angu dria wudrikuruari ma alia trerile,

22’ba diza mani pi, tali mani ’yele Misiria azini roko dria ’diyi ndrepi ti ’diyini ma o’bile pale mudrini ’do, azini yini ma o’duko erile kurisi,

23ada ada yi ngani angu mani oyoni sole yi ma a’bipi tiari ndre aluni ku; ada ’ba ma ’bapi aparakaru ’diyi ma aluni ngani eri ndre ku.

24Pe lu ati’bo mani Kalebuni nga eri ndreni, erini ovule orindi be ndu i ma alia, erini vini ma vuti bile asi driasi ’borisi, ma nga eri ji angu ndra erini cazu aleniaria ra, a’bianzi eri ma oriru ’diyi nga eri nya yiniru.

25Isu de ’ba Amalekini piyi ovu e’bua ’ba Kananini ’diyi be; drusi emi oja di emi, emi fi rokoa geri Miri Ekaru ma tiarisi,

26Yehova ’yo Musa pi ma tia Aroni be kini,

27Ma nga ovu ’ba ongulumuru onzikanyaru onopi ma ruaa ’diyi be o’du ngopi ya? Ma eri anzi Israelini ma onoza yini onole ma driari ’bo.

28Mi ’yo yi tia, Mani ovule idri berile, Yehova ’yo ra, ekile emini ’yole ma bilearile, ma nga ’ye emi vu trotro ’dinile ada:

29emi avu nga o’de roko ’doria; azini ’ba emini dria yini yi ma kalafe lale, kalafe emini driari vusi, e’dozu ’ba capi eli be kali iri ’diyisi muzu drile, onopi ma dria ’diyi,

30ada ada emi ngani fi angu mani ndra ma dri engale oyo sozu kini, Ma nga fe emi ma ovu aleniaria aluni ku, kiri Kalebu Yefune mvi pi nga fi Yosua Nuni mvi beni.

31Te ma nga anzi nyiri emini, emini ndra ’yole ari’ba ’diyi nga opa ra ’diyi, eji ofizu’i, yi nga angu emini gale siri nini.

32Te emi’i, emi avu nga o’de roko ’dori ma alia.

33Anzi emini nga ovu ’ba acipi aci ’diyiru roko dria eli kali su, yi nga ali o’baza emini ma e’yo onzi ’du yi’i, de nga emi avu jani dri roko dria ku.

34Emi nga e’yo onzi emini ’du eli kali su, o’du ndra emini angu nde ma orile gazu ’diyi vusi, ada o’du kali su, o’du alu aluni dri obizu eli alu alu be ’dini, emi nga asi mani i ojapi emi vu nduri ni ra.

35Ma’i Yehova, ma ’yo e’yo ’bo; ada ada ma nga e’yo ’diri ’ye dria ’ba ongulumuru onzikanyaru yi okupi a’di ’dipi ma be ’diyi ma ruaa: yi nga dri ja roko ’dori ma dria, yi nga odra ’doa. ’Ba mudri angu ma orile gapi a’ita kokoru ’diyini odrazuri

36Te ’ba ndra Musani ti pele angu ma orile gazu emvipi fepi ’ba ongulumuru dria ’diyini onozu Mungu ma dria, yini angu nde ma e’yo ekule onzirisi ’diyi,

37ada ’ba angu ma e’yo ekupi onzi ’diyi odra azo muarurisi Yehova ma milia ra.

38Te ’ba ndra mupi angu ma orile; gapi ’diyi ma eselia, Yosua Nuni mvi pi Kalebu Yefune mvi be awu yini idriru.

39Musa nga e’yo ’diyi olu anzi Israelini ’diyi ma tia dria, ’ba nde nga ovu ani, candisi tu.

40Yi nga enga o’bitisi kula kula, tuzu oni dria uru, kini, Mi ndre, ama ’do, ama nga tu muzu pari Yehovani azileria, amani ezale ’borisi.

41Musa ’yo ra, Emi curu’do azita Yehovani eza, de e’yoni ngani ovu drilebaru ku, ’dini a’disi ya?

42Emi ma tu ku, Yehovani ovule emi ma eselia kurisi, ari’ba kazu emi ofuzu emini o’dezu yi a drilia ku.

43A’disiku ’ba Amelekini piyi ’ba Kananini be yi emi drilia ’da, emi nga o’de sei a sia; emini emi o ajale vile Yehovani kule vutini biko jarisi, e’yo ’disi Yehova ngani ovu emi be ku.

44Te ti, yi tu muzu oni dria afusi, te sanduku aziza Yehovanirini pi Musa be funi pari hema asozuriasi ku.

45’Ba Amalekini ’diyi pi nga di esi va ’ba Kaninini ovupi oni ’dari ma dria ’diyi be, nga yi ofu ra, yi odrozu kpere cazu Horimaa.

← Chapter 13 Jump to: Chapter 15 →