Numbers 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1Yehova nga ’yo Musa tia kini,

2Mi pe ’ba ti muzu angu Kanani mani fele anzi Israelini driri ma orile gazu; suru yi ma a’bipini vusi dria emi pe ’ba ma ti alu alu, ’ba nde alu alu ma ovu ’ba opiru yi ma eselia.

3Musa pe di yi ma ti, engazu roko Paraniariasi, Yehovani e’yoni azilerile, yi dria yi ’ba anzi Israelini ma drilia ’diyi.

4Yi ma ru ’di: Suru Rubenini ma eselia, Samua Zakuri mvi’i;

5suru Simeonini ma eselia, Safati Hori mvi’i;

6suru Yudani ma eselia, Kalebu Yefune mvi’i;

7suru Isakarini ma eselia, Igali Yusufu mvi’i;

8suru Efiraimuni ma eselia, Hosea Nuni mvi’i;

9suru Benyaminini ma eselia, Paliti Rafu mvi’i;

10suru Zebulunini ma eselia, Gadieli Sodi mvi’i;

11suru Yusufuni, efini suru Manaseni ma eselia, Gadi Susi mvi’i;

12suru Danini ma eselia, Amieli Gemali mvi’i;

13suru Aserini ma eselia, Seturi Mikaeli mvi’i;

14suru Nafutalini ma eselia, Nabi Vofisi mvi’i;

15suru Gadini ma eselia, Geueli Maki mvi’i.

16’Diyi ru ’ba Musani ti pele angu ma orile gazu ’diyini. Te Musa nga Hosea Nuni mvi ma ru ’cia Yosua’i.

17Musa nga di yi ma ti pe angu Kananini ma orile gazu, eri ’yo yi ria, Emi tu ’disi geri uruleruria, emi tu angu oni driaria,

18emi ndre angu ovu ngoniru, ’ba ovupi alenia I’diyi be, kani yi okporu, kani yi Okpo kokoru, kani yi were, kani yi kakau yani,

19azini angu yini ovuzu aleniari eri ngonile ya, kani eri onyiru kani onzi ya, azini aku yini ovuzu yi ma alia ’diyi ovu ngonile, ’ba nde adri ovu hema ma alia, kani laku kali okporu be ’diyi ma alia ya,

20te angu ovu ngonile, eri osoru kani a’wiru, pati alenia indi kani yo ya. Te emi ma ovu asi agupinisi, emi cii efi kapi angu nderi ma alia ’diyi ma azi indio Te eri ewu zabibu efini e’dozu nizu iniruri’i.

21Ka’dini yi tu ra, ga angu ma lorile engazu roko Ziniaria kpere Rehobua, kpere pari ’bani fizu Hamatiaria.

22Yi tu geri uruleruria ca Hebironia; isu de Anaki anzipi, Ahimani pi, Sesai pie, Talimai pie, yi ’dale indio (Te yi si ’Hebironi eli aziri de nga sini Zoani Misiriari ku.)

23Yi ca e’bu Esikoliaria, nga arakala zabibu efi kapi ngulungulu ’diyi beri ga va, ’ba iri ’i eri pati ruaa yi ma eselia ejizu; yi nga pati pomegranate ma efi eji indi, elio efi be.

24’Da pari nde ma ru E’bu Esikoliari’i, efi kapi ngulungulu anzi Israelini gale ’dale ’diyi ma e’yosi.

25Yi ka angu ma orile ga ’bo, yi ’nga emvi o’du kali su ma vutia ndo.

26Yi emu eca Musa pi vu Aroni pie, ’ba Israelini ongulumuru ’diyi pie dria roko Paraniaria Kadesia, yi nga e’yoni omvi yi tia, ’ba ongulumuru be dria, nga vini efi kapi angu ndea ’diyi ece yi dri.

27Yi ’yo eri tia kini, Ama ca angu ndra mini ama ti pezuria ’bo, ada eri angu lesu pini razu alenia anyuoso beri’i; efi kapi aleniari ’do.

28Te ti, ’ba ovupi angu nde ma alia ’diyi yi okporu, aku yini yi abi kaliru be amboru tu; azini vini ama ndre Anaki anzipi ’dale indio

29’Ba Amalekini ’diyi ovu angu uruleruria; ’ba Hitini piyi, ’ba Yebusini pie, ’ba Amorini pie, ovu angu oni driaria; ’ba Kananini ovu miri tialero, azini Yoridani ma tialeru indio

30Te Kalebu fe ’bani adrizu ciri Musa ma drilia, eri ’yo ra, Ama ma tu coti angu nde pazu amaniru, amani ecole eri ndele ewa kokorurisi.

31Te ’ba tupi eri be ’diyi nga ’yo kini, Ama econi tuzaru a’di ’dizu ’ba ’diyi be ku, yini ama agale okposi rarisi,

32Yi nga vini angu yini orileni galeri ma e’yo eku onzi Israelini anzipi ma tia, kini, Angu nde amani agale alenia orileni gazuri eri angu ’ba alenia ’diyi ma dri japiri’i; azini ’ba dria amani ndrele ’dayi yi ’ba izutiliru ’diyi.

33Ama ndre ’ba Nefilini Anaki anzipi ovupi ’ba Nefilini ma oriru ’diyi ’dale; ama ovu ani ama ngulupi ma milia ekile kulule, ama ovu vini ’dinile yi ma milia indi.

← Chapter 12 Jump to: Chapter 14 →